Meendinho

(? - ?)

     A figura de Meendinho, como a de tantos outros trobadores medievais, está rodeada de misterio. Porén, parece probábel que fose orixinario da ría de Vigo a xulgar pola única cantiga del conservada, que xira á volta da Illa de San Simón. Así mesmo, o seu nome (tal vez Men, Meen ou Mendo) é un antropónimo ligado á zona sul da Galiza; en Pontevedra houbo unha rúa denominada "dos Meendinos" e mesmo en Quintela (Redondela) existe un lugar que recebe o nome de O Mendo, desde onde se pode albiscar a Illa de San Simón.
     A súa condición de xograr parece estar apuntada polo facto de aparecer o seu nome sen a compañía dun apelido. O diminutivo suxere aínda unha posíbel orixe humilde.
     A composición que de Mendinho se conserva (datada a finais do séc. XIII ou principios de XIV) vén sendo considerada unanimemente pola crítica como unha das cantigas de amigo máis relevantes da literatura galego-portuguesa. Encóntrase no Cancioneiro da Vaticana e no da Biblioteca Nacional de Lisboa.
     O Día das Letras de 1998 estivo dedicado a este xograr e a outras dúas destacadas figuras da nosa lírica medieval, Martin Codax e Joan de Cangas.