Galo Salinas

(1852 - 1926)

 

 
Obras
Biografía
 
mb2galosalinas.html

     Galo Salinas naceu na Coruña en 1852. Con doce anos de idade emigrou a Montevideo, onde traballaría desde moi novo como comerciante. De regreso á Galiza en 1876, Salinas estableceuse en Pontedeume como mestre, mais acabou deixando esta profesión para se dedicar ao xornalismo na Coruña. Na cidade herculina fundou e dirixiu a Revista Gallega. Semanario de Literatura e intereses regionales (1895-1907), onde participarían, entre outros, Leandro Carré, Francisco Tettamancy e Florencio Vaamonde. Convertiuse nun dos asiduos á tertulia da Cova Céltica e, en contacto co ideario rexionalista e as súas máis destacadas figuras, redixiu El regionalismo gallego. Estudio social (1892).
     Nestes anos comezou a súa actividade literaria. "O Hino popular regional" (1893), con música de Varela Silvari, a súa composición épico-lendaria de signo costumista ¡Lenda de horrore! A mitra de ferro ardente (1894) e o poema en tres cantos ¡Galicia! (1894) datan desta época. No seo do movimento rexionalista, Salinas realizou desde diversos frentes un labor clave a prol da construción dunha dramaturxia galega. De feito, foi un dos primeiros escritores galegos en publicar obra dramática: A torre de Peito Burdelo. Drama hestórico nun auto i en verso (1891), ¡Filla! (1892)...
     Un ano despois da aparición da Revista Gallega, o coruñés publicou a súa Memoria acerca de la dramática gallega. Causas de su poco desarrollo e influencia que en el mismo puede ejercer el Regionalismo, onde tende unha ponte entre o pensamento rexionalista e a normalización cultural de Galiza, pondo en destaque o relevante papel do teatro neste proceso. Participou no nacemento da coruñesa Escola Rexional de Declamación (1902-1904), dirixida por el nunha primeira xeira, nun intento de crear un grupo teatral que encenase pezas en galego, para, desta maneira, estimular a escrita teatral.
     Para alén das xa citadas, Salinas foi autor dun bon número de pezas teatrais estreadas na súa época. Paralelamente, o dramaturgo desenvolveu unha inxente produción teatral en español. Faleceu na súa vila natal en 1926.

 

logoDeputación logoBVG © 2006 Biblioteca Virtual Galega