vb2uxiobreogandieguez.html
Uxío-Breogan Diéguez
Cequiel (Madrid, 1978).
Formouse en diversas
localidades españolas e galegas (Madrid, Valladolid, Noia, Compostela?).
Recén chegado á Galiza
foi precoz o seu interese pola escrita xornalística e o ensaio; redixindo textos
de opinión sobre actualidade e pensamento, para alén dos editoriais, no marco de
A Fume de Caroço, periódico estudantil editado en Noia da mao dos
Comités Abertos de Estudantes (CAE), dos que participou como integrante da
súa dirección nacional.
Xa na Universidade de Santiago de Compostela (USC), na
que se licenciou en Historia, contribuíu a impulsar xunto outras e outros
compañeiros voceiros como Almáciga, editado polos Comités Abertos de
Faculdade (CAF).
Xunto ao seu labor militante -foi membro da Xunta de
Faculdade e do Claustro universitario ao longo do tempo que cursou a
licenciatura en Historia-, comezou a investigar arredor da historia do
nacionalismo galego, primeiro na cronoloxía 1960-1980 e, ao pouco, na franxa
1916-1936..
En base ás súas investigacións, foi chamado no 2002
pola Fundación Alexandre Bóveda (FAB) para se integrar na Xunta Reitora
desta. No ano 2003 asumiu a xerencia da devandita fundación no marco da antesala
das celebracións do centenario do nacionalista asesinado que daba e dá nome a
aquela entidade.
Naquel mesmo ano publicaría a FAB a obra A Asemblea
de Concellos de Galiza Pro-Estatuto, edición ao coidado do propio
Uxío-Breogán, quen foi encarregado de introducir cun breve artigo aquel texto
central do proceso soberanista galego.
E foi tamén aquel 2003 no que Uxío-Breogán ficou como
finalista nos premios Manuel Murguía de investigación histórica e
Vicente Risco de Investigación en Ciencias Sociais.
Un ano no que este historiador co-fundaría Murguía, Revista Galega de
Historia, publicación impulsionada para encher unha lagoa, como tantas,
existente no país; unha revista cuadrimestral, monolingüe en galego, que combina
investigación e divulgación histórica contendo, aliás, entrevistas, reseñas de
libros, presentación de museus e arquivos, etcétera, tendo en rede o site web
www.revistamurguia.com.
Como investigador Uxío-Breogán destaca pola
biografía que escribíu sobre Álvaro
de las Casas (Galaxia, 2003; 250pp) así como sobre o nacionalismo xuvenil
na II República, nomeadamente Ultreya; sendo diversas as ponencias que ten
redixido para varios congresos nos que ten participado, así como artigos
publicados en diversas revistas, caso de A Trabe de Ouro, Grial, Terra
e Tempo, etc. Destacando a súa Tese de Doutoramento arredor do nacionalismo
galego entre o golpe militar reaccionario do 1936 e a súa concreción en chave
frentista na segunda metade do pasado século XX.
Na actualidade
Uxío-Breogán Diéguez combina o seu traballo no seo da Fundación Moncho
Reboiras para o Estudo e a
Divulgación da Cuestión Social e Sndical en Galiza e no marco da
Universidade da Coruña da que é profesor.
|