mb3xesusrdguezlopez.html
Xesús Rodríguez López
naceu en Lugo o 28 de Xullo de 1859. Licenciouse en Medicina en Santiago en
1881. A partir desta data, desempeñou a profesión de médico na súa terra
natal, onde morreu o 24 de Marzo de 1917.
A súa carreira literaria comezou coa publicación dun
poema intitulado Cousas d'as mulleres, que consta de vintesete
capítulos máis un epílogo. Nesta obra o autor fai unha descrición dos
costumes dos labregos.
Algunhas das súas composicións aparecen recollidas en
coleccións como Pasaxeiras ou Gallegadas. A máis
coñecida é a muiñeira que leva por título "O bico".
Alén da súa condición como poeta, Rodríguez López
cultivou a novela longa en prosa, con A Cruz de Salgueiro. Esta obra foi
publicada en 1899 pola imprenta de El Regional, mais xa fora publicada
anos antes, por entregas, na revista Galicia, que dirixía na Coruña
Andrés Martínez Salazar. A Cruz de Salgueiro é un longo relato
costumista de carácter didáctico.
En 1915 deu a coñecer a comedia O chufón,
partindo dalgunhas das escenas dun drama co mesmo título do escritor José
María López Castiñeiras.
Xesús Rodríguez López é un escritor realista e costumista, que reflicte nos seus textos a fala popular da súa propia terra.
|