BVG Atrás |
Éter |
||
|
|
|
Éter
O éter é nos libros un líquido inflamable un gas que arde o ar máis puro a esfera sobre a esfera. Tu un peixe no Índico lubricán a rosácea ascendendo Soa no trevo ou no trebón que foi o idioma enteiro para nós. A curación son a que che canta e a que danza coa punta do pé que é coa punta dun horto que é coa punta da pouta dunha osa arcaica fenta dos Ancares. A curación. Se me hei continuar na preñez da paporrubia ... cando contas os meus anos polos círculos e os círculos ventrais quen non te queira ver que non me mire quen non queira saber que non retorne ó líquido redondo dos dous Neve Vermella. Alimentar a hormona dun abrazo pequeniño enchéndote despacio oio cruzar o solpor polo recanto da Plaza de la Soledad, 1963, en Venezuela oio a miña propia indíxena morena pisándome no peito para traerme ó mundo canda ti sinto cómo aprendes o seseo predorsal antes cás letras porque é unha formación de coral na gorxa dos galegos. Eu estaba no ar na comadrona no prado descomunal que amamanta un sentimento roxo na Amazonia eu andaba sementando picóns de patacas novas sobre o dígrafo NH para que mo pronuncies na nunca patria do amor dos choronís á sombra molecular dun coco na non soberanía nacional do amor de arepas tostadas e cambures. Indio indio indio indio o éter é nos libros un líquido inflamable un gas que arde o ar máis puro a esfera sobre a esfera son eu sentada sobre ti a lumeirada meirande a Neve a Neve Vermella do caudal todo do Orinoco a Fonmiñá Indio indio indio sentada sobre ti a corrente da emigración retorna sen fin coma un arroás rubíndome ás meixelas Indio indio sentada sobre ti volven e van os barcos dos portos de Vigo e da Coruña indio sentada sobre ti hai un Océano que chamo por nomes e apelidos sentada sobre ti realizo a transfusión dos vivos e dos mortos de Galicia ás súas viúvas sentada sobre ti coloco as pernas en forma de cartografia atlántica así sei que me torno cobriza cubríndote e na miña lingua era o éter un Indio indio indio indio indio indio indio indio.
|
|
|
© 2006 Biblioteca Virtual Galega |