BVG     Atrás

Língua que rexeitaron os meus pais Borraran os letreiros dos camiños cos ben amados nomes das antergas vilas, dos silabarios das escolas algareiras borraran o cantar humilde e puro da língua popular. Sóio no escuro das lareiras no apartado silencio dos labregos labios, esquecida das espadas poderosas, borboriñaba a nosa língua triste. Aferrollada fora coma unha delincuente. As maos sen calos do traballo, requintadas e doces, relixiosas, enfeitadas co ouro dos aneis roubados ó suor dos pobres empurraran a lingua nobre e pura a un cadafalso de vergoñas. Meus pais, tamén, amados ignorantes, obedeceran as ordes que o espadón deborcara na poza de Galicia. E, agora, veleiquí a xenreira xusta dos mozos nobres e libertadores tirando do pescozo da aforcada o barazo inxusto, o odio do canalla. Inda folguexas noiva bela, inda tes verbas na tua gorxa magoada, foguetes de carraxe pra cuspirlles ós donos madrileños do billete, da espada e maila cruz. Inda tes folgos língua enxebre nos teus labios de moza asoballada, língua dos meus limiaos, dos meus antergos, inda tes folgo pra bica-los meus ensoños. Estás agora viva nos meus beizos fondos, estás agora viva nos meus dedos de home e acariñando vou teu corpo rebrincante que ten ás de volvoreta nas palabras.                     Se digo Se digo Portugal digo esperanza, amor e lonjanía. O verso longo de Teixeira ven dos solpores da armonía e envolve o mundo na sua capa imensa, solitaria e panteísta. Se digo Portugal digo esperanza, amor e lonjanía. O pensamento de Pessoa triste e sereno ven cheo de ironía, e Torga chanta as suas palabras e ergue o seu canto en rebeldías. Se digo Portugal digo esperanza, amor e lonjanía. O verso medieval de Don Dinís, irmao dos cervos que fuxían, ven beber na mao seca das fontelas que estinharon na terra da inxustiza. Se digo Portugal digo tristura, amor, melanconía. Se digo Portugal digo saudade duma irmá que partíu coas andorinhas e non regresa e non regresa e morre o lume na lareira de Galiza. Se digo Portugal digo: Galiza árvore descepada, patria apodrecida.

© 2006 Biblioteca Virtual Galega