BVG Atrás |
Escolma de poemas |
||
|
Escolma texto completo |
|
v1lreinuñezescolmapoemas.html AGRO SEN CANCELO INMENSO, coma as brañas da nenez, habitadas polo ecoar das galopadas das greas. Libre, coma o amor que o mozo comparte por vez primeira na beira do mar. Meu, coma nada máis. Coma nada. O agro sen cancelo da túa alegría. (De A rolda invisible) ESTADOS DA ALMA DO verán que alampa indo e vindo atlántico pola area, a azul alegría da marea. Das tardiñas en cidades do Norte bravo, a tristeza que nos fai máis humanos. E das horas de leria cara á illa da amizade, o niño revolto da verdade. (De A casa na brétema) BOTÁNICA SALGUEIRO chorón. Son bágoas as súas follas: o meu corazón hoxe. Este teu corazón. Limoeiro en flor. É un sol o seu recendo, coma sempre o teu corpo. Esa miña prisión. (De A casa na brétema) ASÍS EN LOURO MONTE Louro pelado. A lagoa dos patos. A parella lanzando unha botella ó mar. Regatos do verán. Augas e unhas mans que alí lavarán seivas de amor puro. Camiños de por Muros. Solitarios e duros de andar, entre xuncos. (Os frades coidan a horta) Arroaces na porta da ría, prata absorta que brinca. Campá tola rezando no eirado. Monte Louro pelado. Vía Crucis que andamos con paso namorado. Unha frecha cruzándonos. (De A casa na brétema) A MEDROSA DA ALEGRÍA NON lle deu tempo a se facer vella e xa é a súa patria a memoria. Noiva da terra e da chuvia, recorda á nena triste de Ortoño, soa. Era algo despois a mociña fea -salóns dos románticos, en Compostela- que carrexa nos seus ollos a cinza da morte, e loce cabelos de nazarena. Non lle deu tempo a se facer vella, e xa é un corpo que viste loitos por fillos que deu para seren cravos desangrando o corazón do tronco. Fuxir da acción, contempla-lo mundo marchar mentres ara no pensamento a saudade e fóra chove miúdo, é todo o seu vivir, de amor sedento. Para un tren na estación de preto, e sempre o medo ó mal que nel chega, ou a el non sobe, nesta muller para. O sol de costas faina sombra negra. Caracois de fume saen da casa gabeando a tarde con trote manso. Veos subir no ceo, de si cansos, a noiva da terra e a chuvia. Que escribe. Son as palabras que pasando o dedo pola area do ido levan ó alén. Teme alá o inferno, e por iso pide máis dores aquí ca nunca ninguén. Sufra por todos a filla do cura. Que cargue o peso de tódalas culpas. (De A casa na brétema)
|
|
|
© 2006 Biblioteca Virtual Galega |