BVG     Atrás

AMOR NA DISTANCIA Agardo as túas cartas coa voz debuxada en cada letra. Agardo as túas cartas como polas chaves que me abren as portas do día. Agardo as túas cartas para seguir unido a ti, nunha paisaxe que foi nosa, cando o tempo era un fiel amigo.                De Poemas da cinza o tempo é unha árbore da que caen os días cunha obsesión outonal a vida, o tempo poboado de paxaros a morte é a árbore seca da vida onde aniñan paxaros mortos                De Todo morte Ansiedade dos ollos Mananciais salgados da suor As mans, gadoupa e seda Bocas que se ofrecen e buscan Galope de corazóns e sangue Perseguido val que as pernas definen Ríos desfacéndose en escumas E unha luz de prata nos bosques da alta noite                De Rosa íntima 13 ¿De onde vés? ¿Que país foi a túa infancia? ¿Que luzada inaugurou os teus abrentes? ¿Que cicatrices te fixeron medrar? ¿Que vestidos estreou o teu desexo? ¿Que camiños te trouxeron? Non o sei. Non sei nada de ti. Pero eses ollos, eses ollos, esa transparencia ofendida.                De Inventario de fragmentos

© 2006 Biblioteca Virtual Galega