v9carballohistoriadegalicia
A. Gramsci da esta definición de Historia:" A Historia é
unha ciencia que se ocupa do home, de cantos máis homes sexa
posíbel, de todos os homes- e mulleres- do mundo en canto que se
unen entre sí en sociedade, traballan, loitan e se melloran a si
mesmos". É unha boa definición, e mesmo axeitada a como
se fai hoxe a Historia. Non sempre foi así; como na
Química ou nas Matemáticas, a Historia tivo un longo
proceso de configuración.
Precedeunos unha Historia antiga, outra medieval, e desde o s. XVIII
acelerouse a opción por unha Historia científica que
recolle as intucicións de Tucídedes, de Tácito e
dos Humanistas. Logo da experimentación dos historiadores dos
"Anales", (na 1ª 1/2 do s. XX), estamos empeñados nun tipo
de ciencia histórica como coñecemento de
aproximación á realidade do camiñar da humanidade.
Servíronos a Antropoloxía e a Socioloxía -como
desde sempre a Xeografía e a Cronoloxía- e podemos
utilizar métodos estatísticos que nos satisfacen na busca
de certidumes tanto de estruturas a longo prazo como de rupturas
coxunturais. A Historia consegue gran iluminación do pasado ao
interpretar os momentos de cambio.
Non é o noso obxectivo a acumulación de datos, é
posuir unha boa hermenéutica. A Historia é unha ciencia
moi complexa que postula elaboracións en equipa, inda que
historiadores avezados por anos a esta tarefa poden lograr construtos
apaixoantes de interpretación respetábel.
Nesta liña estáse a facer a Historia de Galiza. Temos
antecedentes de interés: crónicas medievais, nobiliarios
renacentistas, investigacións desde a lingua como as de
Sarmiento no s. XVIII, as poderosas aportacións do XIX de M. M.
Murguía e de A. López Ferreira, máis perto as da
"Xeración Nós". Monografías colectivas
espléndidas como "A Terra de Melide", ensaios de Otero Pedraio
etc.
Foi a partir dos anos setenta cando se renovou metodolóxicamente
a historiografía galega. Hoxe ten nas facultades de
Xeografía e Historia das universidades de Galiza os mellores
obradoiros e as mellores entregas tanto de especialización como
de divulgación.
Nós, desde a editoral ANT, intentamos aportar un gran de area
con ensaios desde investigacións serias para unha
divulgación valiosa. Estamos de todo en contra da
manipulación da Historia. Serviu durante séculos como
instrumento do poder para dominar aos súditos cara proxectos de
conquista.Ten de servir agora como ciencia para a liberdade persoal e
universal.
BVG
Atrás
