BVG     Atrás

 

Eu brandín a lanza de don Quixote                                                                      e levei o escudo de don Lanzarote.                                                                      Eu percorrín Francia, África e Constantinopla co Tirant,                                                                      estudei a máxica palabra de Chilam Balam,                                                                      vin no Camiño das Estrelas florece-la lanza de Roldán,                                                                      loitei no bando de Sandokán                                                                      e colgueime nunha liana con Tarzán.                                                                      Atravesei Suecia voando,                                                                      pasei mil e unha noites con Xerezade contando,                                                                      entrei na illa dos demos con Rama loitando                                                                      e na de Robinson Crusoe, buscando... e buscando...                                                                      Sufrín prisión con Ollantai                                                                      e cantei na China con Li Ioucai.                                                                      Fíxenme amigo de Huckleberry Finn,                                                                      co último mohicano convivín,                                                                      collín no colo o can de Tintín                                                                      e con Gulliver en ananiño me convertín.                                                                      A beberaxe de Panorámix tomei,                                                                      polo espello de Alicia pasei                                                                      e en Tutira carneiros maorís criei.                                                                      Dei con Phileas Fogg a volta ó mundo                                                                      e coñecín o vello contador vagabundo.      Estas e outras moitas aventuras son as que me conta o avó de cabo a rabo no Reino da Palabra, que é como lle chamo eu á súa galería.      A casa do avó está nun fisterra atlántico mirando ó mar bravo coa galería acugulada de trebellos que lembran navegacións e travesías. A min particularmente cáusame moita admiración un enorme mascarón de proa coa figura dunha serea, posiblemente senlleiro resto dalgún barco pirata.      Meu avó pasou a vida atracando en portos sen nome, sucando embravecidos mares e aprendendo as máis diversas linguas. Agora, a través dos ollos da galería, segue ós seus oitenta anos tecendo velas e anoando cabos.      -Fun eu pequeno e fun eu mozo e aínda o noso idioma non posuía belidos libros -dime.      -Pero, avó, ¿como sabes tantas cousas, se non tiñas libros cando eras neno?      -¡Antes da letra, foi a palabra! -contéstame sempre.      Hoxe eu podo ler cantas historias e aventuras queira e non se me pasa pola cabeza que en tempos pasados non existiran fermosos escritos na lingua dos meus antepasados. Por iso penso que o avó coñece tantos personaxes grazas ó misterioso mascarón e ós solitarios navegares entre as ondas e as estrelas.      A min gústame escoita-los contos e tamén me gustan os libros.      Se na túa lingua aínda non existen libros ou non liches tódolos que che gustaría ler, debes descubrir unha máscara, un mascarón, unha avoa, un avó, unha escritora, un escritor e mesmo ser ti a inventora ou o inventor.      Na casa ou na escola acharás un ordenador ou un lapis cargado de máxicas letras para crea-lo reino da túa propia Palabra. Verás que cousas bonitas e que emocionantes aventuras se poden escribir coas verbas do idioma que falas.      ¡Como me gustaría que a partir desta mensaxe tódolos reinos da Palabra estivesen unidos polos máis fermosos libros!

© 2006 Biblioteca Virtual Galega