TONANTSI
Renovado polo fume do copal
Entro no círculo
Concertado polas 7 direccións
Onde o mundo se asemella
Novamente a si mesmo
Iste é o meu movemento
O movemento da miña orixe
O gatillo que me dispara
Alén ata o alén de min
Iste é o meu nacemento o meu
Inacabado nacemento
O útero que me procrea
Sen deixar de concibirme
E eu danzo danzo danzo
Como antes da existencia
Sabendo que o grande espectro
Dos seres que me arrodean
Anima unha soa vida
Os meus pés baten o chan
Invocando o seu substrato
O humus vindicativo
Que zumega do interior
As miñas mans fían o ar
Conforman tódalas formas
Aprehendendo por un intre
A humildade do seu fluír
E eu danzo danzo danzo
Como antes de min mesmo
Sabendo que igual que todo
Canto alenta niste espazo
Son o centro do creado
Son o centro do creado
Mais de socato as sementes
Das maracas se maian
As peles dos tambores
Se destensan de espanto
E unha man máis poderosa
Cá embriaguez conxurada
Espalla a istes danzantes
Polo firmamento
HOME-PAXARO
(Cova de Lascaux)
O home que deveu paxaro
Danzou no pozo da espenuca
E coa lama das súas pegadas
Modelou a nosa visión
O home que deveu un uro
Ó trote ó bruazo das mandas
Debuxou coa verga estendida
A liña do noso horizonte
BISONTE BRADANDO
(Cova de Altamira)
Da fenda saíu
A grande femia
E da fenda mesma
O gran bisonte
Nas tebras que xorden das tebras
Atopáronse os dous
Animais alucinados
Ela deitouse no teito
E amosoulle a súa aberta
Il achegouse ata ela
Probouna uliscouna
Viuse a través dela
E sentiu un degoro tremendo
De volver á escuridade
Que alustraba máis aló
Trala greta da súa greta
E o degoro turrou dil
Encheu o espazo de sangue
E no instante de almallala
Unha vez por vez primeira
O seu brúo rachou
Toda esta bóveda
DOLMEN DA CORVEIRA
Para achegarme a il
Houben de atravesar
Dúas chousas
A herba estaba tan húmida
A terra tan lenturenta
Que me enchoupei
Toda a roupa
Ecoaban os chíos contra todo
O ceo aquí e aló
Como se fora il mesmo
Unha laverca multiplicada
En diferentes sons
Dentro da media lúa
Onde antano medraban os ósos
Cara á seguinte vida
Achou abeiro un palitroque
Dixital
A penas fica nada
Diste sagrario de pedras
Repartidas agora
Polas cerrumes dos prados
Mais ó tocalas unha a unha
Agarimando a cafurna
Diste ventre nupcial
Recoñecín
O pulo exacto das bestas
RÍO LOR
Desvelado pola luz
Que deitan no verao
As chorimas
E os breixos
Río Lor
Rea de notas
Pingando
Do trobo doce
Do vento...
Se meto as mans
Canda ti
Se meto os pés
Canda ti
E me esquezo
En qué lugar da nenez
Que nunca tiven
Sairei
Con qué segredo
Na boca
Con qué misterio
Nos beizos?
Río Lor
Río raposo
Río cuco
Río troita
Lenzo
De tódalas facianas
Que se albiscaron en ti
Devaladas polo tempo...
Se me queres ben
Se algo enxergas
De min
Devólveme o intre
No que aquela voz
Ameazada
Debaixo do teu silencio
Ollou os meus ollos
Berrou o meu nome
Sen sabelo
Río Lor
Víbora nova
Toba e Eiroa
Pai e Nai
Do meu Amor
|
BVG
Atrás
