BVG Atrás |
Cariocas |
||
|
(Texto íntegro) |
|
v2hvillarjaneirocariocas.html ...
A ver, señora. Obedeza dunha vez e non me enfade.
¿O que?
Faga o que lle acabo de mandar, ande. Deixe de retorcerse e levante o trapo.
O que está baixo do trapo non é nada.
Xa sei que non é nada, pero levánteo.
Pero se non é nada, ho. ¿Que ía tapar eu con ese pano?
¿Quere que pasemos dentro do mostrador e a ver que máis aparece?
Se non é nada...
El fai que quere entrar e ela ergue o trapo.
Non era nada, pero a min parécenme cariocas antirregulamentarias.
¿Que quere dicir?
Ben sabe o que quero dicir. ¿Non le os carteis? Isto non se pode vender.
Xa non o vendo, señor.
¿Como que non o vende? ¿Para que as ten aí? ¿Quérenos facer parvos?
Non, señor. Iso estaba no bandullo das rabadas e saíu ó abrilas. Tíñao para os gatiños dunha clienta.
Conque para uns gatiños... ¿Que che parece?
O outro segue mudo.
Isto non ten venda, señor. ¿Ou non o ve? ¿Compraríamas vostede?
Eu vexo todo. Claro que vexo. A ver, ho, entra aí e pésalle aquel lote.
¡Pésalle o carallo!
¿Como di, señora? ¿Vostede sabe o que di e a quen llo di?
¿E logo non podo dicir carallo, se me apetece?
Pois non, mire por onde.
Ela fai cruces no peito:
¡Xesús, María e Xosé!
Este carallo vaille custar vintecinco mil por riba do que resulte das medidas.
¡Pero se ata o di Reixa pola televisión! Fai un sol de carallo, fai un sol de carallo. E repíteo dúas veces.
El pódeo dicir e non pasa nada. Pero o seu é un carallo de desacato.
Xesús, Xesús... Con todos os meus pecados...
El ó outro, que segue mudo e quieto:
Entra aí e apunta...
|
|
|
© 2006 Biblioteca Virtual Galega |