BVG     Atrás

"La tour frappée par la foudre" Un día contarás que viches cos teus ollos sucumbir con estrépito os símbolos e os muros e o cadro apocalíptico que debuxou o naipe do arcano dezaseis no tapete do mundo. Dirás do teu asombro, do pánico das bolsas, do arrepío que ascende polo espiñazo arriba, do temor de que acaso serán moitas as cousas que xamais han de ser do xeito que eran antes. Mais se gardas os fíos que han tecer o relato que no incerto futuro se lembrará das horas destes tempos inquietos, garda tamén esoutros que falan das nacións condenadas a morte, das riolas da fame a atravesar fronteiras, das farturas que move o comercio da guerra e as macabras colleitas dos campos de minas, das mulleres sen rostro que sofren en silencio, das balsas da miseria buscando a banda oposta e o brazo multiforme das necias ambicións. Algún día serán só cousas do pasado. Pero o presente é tempo de non calar a boca, e mais de preguntar en mans de quén estamos e lembrar as palabras daquel romano antigo: que a paz xusta é mellor ca todas as victorias. ¡Que Alá misericorde nos dea sentidiño! Gonzalo Navaza

© 2006 Biblioteca Virtual Galega