Exilio

Señor das Lixelas

Respirei os zumes todos deses tempos dourados e escollín a memoria por ilícito presente

 

Respirei os zumes todos deses tempos dourados
e escollín a memoria por ilícito presente:
nestes anos tan tráxicos de ventos varredores e adeuses até nunca,
Historia, Historia, Historia, puta traidora da miña loucura.
Quixen erguer modestas torres do pasado,
quixen gardar en áureos marcos as paisaxes indefensas do retorno.
Non deixaron facer e desfixeron,
os sempre destrutores,
os hoxe inimigos da pureza, da beleza, da carne, amor e vida.
E agora, que agardar dos meus oficios?
Pagar con sufrimento esta demencia innata, esta controversia que me enfronta
a unha humanidade perecedoira.
Mais non deixarme ser, ser eu o meu final,
vivir e que me mate a anguria de non velo.


logoDeputación logoBVG © 2006 Biblioteca Virtual Galega