¿Pol-o bo camiño? Constituíuse a "Unión Socialista
Galega".
Non eisiste na nosa Terra un partido d-esquerda
galeguista típicamente marxista ¿Causas d-elo? Non temos de nos pôr,
n-iste intre, â sua precura. Intrésanos somentes precurar un vencello
que nos xunga a tódol-os socialistas galegos, que, sentindo fondamente
a vida da Galicia, sentimos tamén as doutriñas marxistas e nos afanamos
en interpretal-as e adaptalas â realidade galega.
Pra nós, Galicia é unha realidade tan crara,
tan especial, que non podemos estar ao marxen d-ela, nin botarnos no
espellismo d-unha vida ficticia levando de bandeira o recramo d-unha
xeneralización perxudicial e d-un universalismo en preno esmorecimento.
Poñemos a Galicia en primeiro prano e logo cobizamos darlle un tipo de
vida que supoña unha verdadeira redención da miseria que arestora
suporta. E iste novo xénero de vida que teimamos dar a Galicia,
artellando centíficamente tódal-as suas posibilidás, é o socialista.
Con ista teima, e pra iste ouxeto, nasce, empulada pol-a forza do ideal
«Unión Socialista Gallega» .
Galicia é unha nazonalidade ibérica con
dereito, pol-o menos, a ser autónoma. Con direito a ser ceibe. Con
direito a empregar a sua língua, orgaizar as suas institucións,
artigoar n-un Código fundamental as suas leises, dar unha base
centífica â sua economía, esprotar axeitadamente as suas fontes de
riqueza, dando á vida de tódolos seus habitantes un novo senso e unha
ourentazón difrente da que agora ten. Co fin de conquerir istes
ouxetivos nasce Unión Socialista Gallega.
E nasce pra toda Galicia Unión Socialista
Gallega co desexo de defender n-ela o programa do Partido Socialista
hespañol, en todos aquiles puntos que se aveñan cos direitos galegos e
cos sentimentos do noso pobo, porque entendemos que a mellor maneira de
conquerir un universalismo racional e humán, e a de avencellar
tódol-os pobos (espertando os seus sentimentos e orgaizando todo o seu
vivir axeitado ás suas caraiterísticas) ao torrente da civilización.
Os pobos se non poden sentir irmáns si se non sinten ceibes, si se non
sinten donos das suas propias persoalidades. Cobizamos un universalismo
perfeito, máis canto máis o arelamos, máis desexamos unha Galicia
inteiramente dona de sí.
Socialistas de toda a vida non podemos
esquencernos nin arredarnos dos postulados básicos do Partido
Socialista hespañol; máis, galegos de nacimento e galegos de
sentimento, tampouco podemos traicionarnos a nós mesmos,
esquencéndonos de que unha das nosas primeiras obrigas é a de axeitar
ises postulados ao vivir da nosa Terra, tratando de organizala d-unha
máis humán e máis ideal.
Xurde, pois, Unión Socialista Gallega, co-a arela vivísima de
incorporar á vida galega a esencia marxista do Partido Socialista hespañol,
arredándonos, en absoluto, de toda concomitancia con doutrinas
burguesas. E co-iste norde imos a orgaizar toda a nazonalidade galega,
pra poder estudar e resolver tódol-os seus probremas e satisfacer
todal-as suas arelas.
A Autonomía é, pra Unión Socialista Gallega
unha custión limiar e fundamental. É a nosa razón de ser, pois se non
precurásemos aixiña unha autonomía integral, non se xustificaría o
noso rexurdimento.
Emporiso, ao nascer, unión Socialista Gallega
acusa a necesidade d-isa autonomía, co fin de que, conquerida que sexa,
poder botarse á loita por unha Galicia de tipo novo orgaizada asegún
as bases centíficas do socialismo moderno. A vida galega non pode
deixarse vencer pol-a «gazmoñería» e pol-a miseria que hoxe a
caraiteriza e lle da un falso aspeito. No fondo, na entraña do pobo
galego, hay algo máis nobre, algo máis encheito de posibilidás que
isa degradación e isa probeza. E, xustamente, isa escondida
potencialidade que aniña no seo de Galicia, esprotada i-escravizada, e
o que precura Unión Socialista Gallega, pra poñela en estado de
desenrolo e de producción.
Pol-o minifundismo da sua propiedade, por non
ter unha [ilexible] fortemente orgaizada, nin unha nobreza poderosa,
Galicia tópase na máis doada das situacións pra poder encauzar a sua
vida asegún o centifismo socialista, multipricando d-unha maneira máis
racional a sua producción e aumentando d-unha maneira insospeitada as
suas fontes de riqueza.
Unha laboura pensada, centífica, honrada,
farános donos d-unha riqueza que deica agora non tivo Galicia
n-oustante ser dona de tódal-as suas fontes.
Queremos orgaizar a nosa industria, a nosa
agricultura, a nosa vida económica d-unha maneira armónica e conxunta,
mais sin esquencer a nosa valoración espritual, creando ao mesmo tempo
unha cultura, un pensamento, un tipo de civilización paralelo ao
rexurdir económico.
Non ofrecemos ren. Somentes pedimos homes de
boa vontade que queiran a Galicia e que comulguen co ideario socialista.
Homes que veñen a traballar aos nosos comités e as nosas
institucións, con esprito de sacrificio, sin ambición de sinecuras e
prebendas.
Homes que veñan dispostos a impoñer en
Galicia as ideias e as formas de goberno socialista, máis por meio d-un
traballo arreo. Quen non esteña disposto a sacrificarse pol-o
conquerimento d-unha Galicia mellor e ceibe, pol-o tanto, que non veña
ás nosas fías e que se absteña de entrar nos nosos comités.
Queremos unha Galicia autónoma e ceibe, das
imposicións d-un centralismo «pernicioso».
Temos de crear ou espertar a obriga de amar a
Galicia por enriba de tódal-as cousas e de tódol-os negocios de tipo
persoal, porque vemos o esquencimento en que se topa isto polo noso
cometido a unha escravitude política e administrativa da que ninguén
precura quitalo; porque gobernándonos por nós mesmos poderemos
arranxar os nosos máis íntimos probremas, examinar ás nosas
persoalidades e votar eficazmente aos nosos gobernantes.
Autonomía que ten de nos ceibar do caciquismo
centralista, da fame e da escravitude tributaria e moral en que nos teñen
sumidos os poderes do Estado central.
Non podemos decir cal será o porvir que lle está reservado na nosa
Terra á «Unión Socialista Gallega». O que sí podemos asegurar é
que os camiños que en todo o manifesto se asinalan con os que
necesariamente deben seguir tódol-os socialistas galegos, se queren dar
contido xusto e de realidade ás suas arelas e non seguir sendo
víctimas da gobernación uniformista de Madrid, imposta da o mesmo
por un goberno burguês que pol-o partido socialista.
É o camiño que os galeguistas temos indicado moitas vegadas aos que
manifestaban frialdade na defensa da causa de Galicia co pretexto da sua
ideoloxía máis o menos marxista, pois ela ben sabíamos nós que non
podía ser razón de fundamento máis que pra os que teñen do
internazonalismo e de outros postulados a mesma idea que calquer rapaz
da escola.
Así o teñen comprendido os socialistas cataláns, que romperon hay
tempo as amarras que os xunguían a Madrid e son, como se está vendo,
os máis bariles defensores da liberdade da sua Terra.
Pol-a nosa parte, recibimos con ledicia iste manifesto con que a
«Unión
Socialista Gallega» comparece diante do noso pobo, porque ven a
demostrar que no campo ermo do socialismo galego escomenza a dar fruto a
semente que xenerosamente espallamos un día e outro a tódol-os
ourizontes.
E que, dentro d-unha Galicia xa dona dos seus destinos e ceibe pra se
gobernar de seu, como conveña a tódal-as suas caraiterísticas, se
teime despois de estabrecer normas socialistas, parécenos moi
lexítimo, inda que ista afirmación nosa lle poida producir estrañeza a
certas xentes.
Co que endexamais transixiremos é cos partidos xunguidos a Madrid,
calquera que sexa a sua ideoloxía, porque iles son os responsabres de
tódol-os males que á nosa Terra lle veñen acontecendo. |