BVG     Atrás    Índice de Páxinas

Sentado a raxeira, entre pinos e carrascos de tardiña, ollando os raios do Sol a brillar neste silencio pechado onde apenas escoito o vento estalar, devagariño, mansiño a soprar, ondeando de pino en pino, susurrando, batendo asas, acariciando súas verdes follas a ondear. De cabeza baixa, miro cada pedra do camiño: pizarras, croios e pedras brillantes do "trono", apalpo esta "herba de rato" que medra no carreiriño. Este vento que leva pra ben lonxe de min, de pino en pino, zoando, esta miña amargura de ánima e esta miña solidón no medio de tanto abandono. Miro para esta carrasqueira florida entre os carreiros do Casteliño, Ouceiras e Cabadón, ben pretiño destes regatos onde nace o río Avia, estes carreiriños deica a Chousa, onde as urces choravan a tristura de súas cañotas que os ferreiros queimaron no lume de súas forxas. Estas pedras das calzadas para o carro de bois, estas calzadas de pizarra feitas a chapacuña polos labregos, en maña de frío e xeada, batendo pico e picachón, apuntados na forxa co carvón "afogado" nos buracos da carvoeira, cañotas arrancadas, abafadas e quimadas na Chousa .

© 2006 Biblioteca Virtual Galega