BVG     Atrás    Índice de Páxinas

De mañá cedo, ando polo camiño adiante buscando algo que o tempo levou de min, dende que aínda era moito mozo e pensava que todo por onde eu ía pisando xa era meu, procurando en cada pedra do camiño, axexo e rebusco debaixo de todas elas, unha por unha, pra encontrar a sombra do que eu perdin. Ando polos carreiros do monte d'Alén, nas ladeiras e nas beiras dos regueiros, e entre os muros dos prados caídos, subo no medio das laxes e outeiros atallo polo monte de xestas e pinos, onde cabei unha estivada de centeo pra reencontrar o eco de meus asubíos. Ando por entre as pedras de suavela e nos carreiros feitos polos gandeiros, piso nas pedras que eu sentei un día axexando alá encima o coto de Bernalda, vexo o Sol nacer, peseniño, nos outeiros, alumeando o camiño dos meus pasos pra encontrar as bágoas que eu chorei Ando polas carballeiras, pisando nestas follas secas polo tempo, piso ben de mansiño, pra non despertar o soño de un meu amigo paxariño que un día de miña primavera subía de póla en póla na árbore, devagariño, para poder brincar cos seu fillos no niño

© 2006 Biblioteca Virtual Galega