Xabier Vila-Coia

     Nacím na parróquia de Coia (Vigo) na antiga casa de pedra da minha bisavoa, á beira do cruceiro e do caminho real. Crieime, pois, num ambiente rururbano (hoje ja completamente urbano). Estudei o ensino primário no Colégio Público Eijo Garay e o secundário no Instituto Santa Irene, na opçom de "ciéncias puras".
     Um dos primeiros fitos da minha vida foi cando, obrigado polas circunstáncias e a origem obreira familiar, tivem que comezar a trabalhar aos 16 anos como aprendiz de fontaneiro na antiga Fontaneria Seoane de Vigo; e logo na Asesoria Laboral Blázquez-Astorga. Mentras, estudava por nouturno os últimos cursos de bacherelato e o c.o.u.
     Pudem comezar, grazas ao dinheiro que cobrava do paro, os estudos de medicina em Compostela. Nom forom bem as cousas. Rematouse o paro e os cartos e tivem que voltar a Vigo pra fazer infermeria.
     Num ano morrerom os meus pais, bem novinhos. Cum irmám no cárcere por fazer a transiçom á sua maneira idealista e revolucionária, outro em Ceuta aprendendo a obedecer e a morrer sem protestar e outro na diáspora catalana, tivem que lhes ajudar e safar para sacar adiante todas as cousas que os velhos deixaram sem rematar.
     Marchei, namorado, para Barcelona, onde morei perto dum ano. Aproveiteino para especializarme em Dietética e Nutriçom na sua "Universitat Central", e tamém para fazer um curso de interpretaçom cinematográfica no "Centre d´Estudis Cinematogràfics de Catalunya". Dalí para Palma de Mallorca. Outra volta Compostela ,em cuja sede do "Institut International de Sexologie Scientifique de Gèneve" obtivem o seu "Certificado de Educador em Sexualidade Humana", e dispois Madrid. Cidade onde, na u.c.m., licencieime em Ciéncias Políticas e Sociologia e fum "Premio Nacional de Terminaçom de Estudos Universitários". Os estudos de doutoramento fíxenos em Antropologia Social, num Programa sobre a costrucçom das identidades socioculturais e de género. Dispois fixem o "Curso de Especializaçom em Ciéncia Política e Direito Constitucional" do "Centro de Estudios Políticos y Constitucionales".
     Grazas ás bolsas que me derom morei em Brasil e Argentina, e conhecim paises como Chile, Uruguai e Paraguai. Tamém morei umha tempada em París.
     Conto todo isto porque penso que a trajectória vital dumha pesoa é fundamental para comprender o que di (ou escreve), como o di (ou escreve) e porque o di (ou escreve). O meu único livro até agora, GALIZA C i B [HERRIAK SENSE FRONTEIRAS], recolhe muitas das cousas aprendidas e experimentadas nese proceso. E, por riba de todo, recolhe as duas grandes paixons da minha vida: o sexo e a política. Cando me perguntam porque raçom som precisamente esas as minhas paixons, sempre respondo o mesmo: porque em ambas as duas actividades humanas o objectivo último é foder ao próximo.

Web do autor