Xavier Frías Conde

     Nacín en Salamanca mais de familia eonaviega (Terra Eo-Navia, Asturias); teño daquela o galego como lingua familiar. Boa parte da miña carreira está centrada na pescuda, estudo e promoción da lingua galega en Asturias. A miña tese de doutoramento centrouse, precisamente, no estudo do galego exterior desde Asturias até Cáceres.
     Son doutor en filoloxía románica, licenciado en filoloxía inglesa e diplomado en ciencias da educación. Traballei no ensino primario e secundario desde 1988 até 2000, en 1999 comecei a dar aulas na universidade e aquí sigo. Dedícome nomeadamente á lingüística e a tradución, os dous campos básicos da docencia. A propósito da tradución, teño traducido abondas cousas para o galego, entre elas moita poesía que pouco a pouco vai saíndo á luz.
     A miña obra ten poesía, teatro infantil, narrativa infantil e investigación filolóxica como se pode aprezar. Teño boa parte da miña obra escrita en galego eonaviego. Ocúpome da Biblioteca Virtual Eonaviega e promovo outras actividades literarias na rede, como o espazo Litterae con algúns colegas. Tamén traballo polas linguas románicas minoritarias desde diversos ángulos, como se pode ver en Romania Minor.