Pasa fractura
na casa o máis difícil
encadeamento
Este enxordecer
dunha mesma no vértigo
é a verdade
Átese móbil
causa primeira corda
da orixe sal
A marca poro
non delata ningunha
vea tan estranxeira
Dádiva logo
pura roca cristal
ensombrecido
A rede asoma
cando se afunde toda
finxindo pulmóns
Creada a serpe
vocabular os lazos
indivisibles
Dentro do peixe
respira a flor do pelo
da boneca soa
A chuzos case
docemente prende
á chama o corpo
O líquido aboca
á obriga de crear
intimidade
Cal forte escrita
presa entre sangue
a pel líquida
Ática xudea
responde á escada
abrindo a trenza
Por que antergas non
serven a ficción propia
e a tinta avanza?
Advirta serea
diversos métodos
que contaxian a voz
Que esta torre
atrape o barco perdido
do desexo
|