BVG     Voltar atrás

A María. Siamesa. A Diana. Marabillosamente defectuosa. A meus pais. Que me disfrutan e me sofren. A Ramón. Por sempre en París.

I Chegou a fin da osmose. Prostrada no leito, Iris saborea a amargura Dun prospecto con pasaporte. Cadaleitos de sentimentos Desfilan polo cuarto Como as ovellas do sono. Un neno morto e desdentado Desgárralle as vísceras E envórcaas no chan. Bágoas inutilmente derramadas Tinguen a estancia de gris. Moito gris. Por todas partes. A imperdoabilidade de morrer en calcetíns, A antiestética morte anticipada Golpéalle os miolos. Cuestión de hermenéutica. Pero as tesoiras do tempo Encargaranse de recortar Os anacos de corazón putrefacto. II Retrato de muller. Tristura vírica. Peitos de leite e fame Bico de auga e sangue. Soidade. Tristura vírica. Invadindo un planeta De peixe morto E monte negro e afumado. Monotonía. Tristura vírica. Queimando facianas Aniquilando acenos. Matando, lenta e constante. Amor. Tristura vírica. Non podo menos que chorar Dende estas soidades E estas monotonías Cubertas de muller. III A paixón solitaria Que cruza o limiar de tabúes arroupados Estremece un leito tendido, liso e chan. Un sexo despreza a solidariedade E os caninos doentes Que desgarran mapas voluptuosos. Invasións de pracer Fan tremer ventre, beizos e pés. ELA ESTÁ SOA. Hai un sexo a partes iguais Que despreza a solidariedade Odia os caninos doentes. Prefire a paixón solitaria. Un sexo partido Ferido de morte. Da morte do abandono E do pracer finxido.

 

© 2006 Biblioteca Virtual Galega