A manta da solidariedade

Victoria Lojo Vicente

n2victorialojomantadasolidariedade.html

Nestes mundos de caixóns de xastre
modestas modistas
e non aguerridos guerreiros
mesturan con firmes puntadas
esquecidas verdades.

Tanto ten
e ten tanto.

Costureiras e non de puñaladas
esfiañan acostumadas costumes
erguéndose en armas sen puñal
só fío, agulla e dedal.

para uns tanto ten
para outros ten tanto.

Armas brandas e non brancas
confeccionan con cadenetas ben asentadas
libres liberdades outrora encadeadas

Os menos tanto lles ten
ós máis tenlles tanto.

Manta mantida a conciencia
cobertor de conciencias tantas
loito de loita ata no leito
alfinete de desesperanzas.

Esperar tanto ten
desesperar ten tanto.

Camiños de reencontrados desenganos
van destecendo carentes paces
miñas, túas de todos
o fío das vontades.

!Quen fai coma quen!
!Quen non é quen de facer tanto!

Enfiando con puntadas certeiras
pretas ou alongadas
aquí ou ala
tralos montes tralo océano
fiando fino ante tantas monstruosidades.

¿A quen tanto lle ten?
¿A cales lles ten tanto?


Cadanseu un tecido
morte a uniformidade.
Liños las calcetas ou ganchos
para unir as desigualdades.

A eles tanto lles ten
a nós tennos tanto.

A non ser coser e cantar
Ós que só lles ten contar ter
tanto lles ten.
Ós que só queren que se lles teña en conta
tenlles tanto.


logoDeputación logoBVG © 2006 Biblioteca Virtual Galega