v1xlripaldaafiador003.html
E
saben os teus ollos de cómaros e pinos
-Tamén
a noite afía no vento rel que brua
salaios
e friaxes de serra infida e nua
E
saben os teus beizos de anceios peleriños.
(Manuel
Luis Acuña)
Así coa incomparable compañeira á que bautizara co nome de
Pepa, Ramuín botouse a recorrer camiños e congostas. En certa
ocasión, un tanto canso, pois o sol apretaba, detívose diante
dunha fonte que deitaba auga moi fresca por estar nun lugar
avesío.
Despois de refolgar ó pe dun
carballo, aproveitou para asar un isco de lardo coa compaña dun
cacho de pan.
Entón viu como se movían unhas
xestas, atopándose coa sorpresa da presencia do lobo, quen sen
dúbida atraído polo cheiro do lardo acaroárase. O home entón
xa pensou que ía ser presa da fera e comezou a laiarse:
-Adeus miña tarazana querida,
adeus rebolo, adeus auga das oreteiras, miñas andolias xa non
andarán máis camiños porque xa estou na boca do mirco...
O lobo, ante tales berros do
afiador, inesperadamente arredouse do lugar. Ramuín despois de
tantas emocións quedouse dormido, botando unha soneta prolongada
como amosaba os ronquidos que botaba.
O despertar de novo quedou
abraíado ó dexergar ós poucos metros del a un home con
revolver e pistola ó cinto e boa escopeta, quen estaba a dar boa
conta do queixo e do pan e mesmo do isco. Ó ver o Ramuín
disculpouse dicíndolle:
- Perdóeme vostede a liberdade de
apropiarme da súa mantenza, pero a fame non espera, ademais como
dormía deume lástima despertalo.
O afiador unha vez que se
tranquilizou puido artellar a fin palabra e dixo:
-Vexo que vai moi ben armado ó
xuzgar polo boquelo e boquela que leva ó cinto sen que me
esqueza da escopeta que podía empleala para a caza, pero as
outras armas non son precisamente para eses menesteres, ademais a
guerra xa rematou hai tempo e...
-Non para min -andruviono o
descoñecido- e antes de nada vou presentarme, son o Carqueixa
e...
-¡Como o fuxido do monte!
-Pois si.
-¿E pode saberse en que bando
loitou ? Bon, que parvada de pregunta, se anda escapado é dos
que perderon.
-Pois non esté tan seguro, pois
gañase quen gañase eu tiña a cousa fastidiada porque non tomei
parte en ningún bando, por tanto recibiría os paus dun e dos
outros.
-Xa me decato e agora ten que andar
dun lado para outro a pillar o que poida e tendo sempre detrás
das súas trazas os belbas.
-Non lle falta a vostede razón,
andan detrás de min como auténticos furóns. Aínda que polo de
agora funme librando veremos en adiante o que pasa. E como non
convén andar moito tempo polos mesmos lugares vou a cambiar de
aires, así que marcharei para a costa.
-O meu desexo, amigo Carqueixa, é
que a sorte te acompañe pois vas necesitala.
-Moitas gracias, meu amigo, antes
de marchar quero dicirche que sempre que te decates da miña
presencia en algún lugar tocarás o chifro dunha maneira
diferente, segundo anden os gardas cerca ou non, a tocata imola
acordar agora.
Así, despois do que conviñeran,
ámbolos dous despidíronse.
Continuando o afiador o seu
cometido, chegou a unha aldea xa cando a noite comezaba a facer
acto de presencia, polo que a xente ía tornando as casas despois
de rematar as labouras no campo. A súa preocupación era agora o
lugar onde pasar a noite; para eso dirixiuse á baiuca onde
pediría información e aproveitaría para tomar uns grolos de
viño.
Aló mantivo unha animada conversa
cuns e con outros, e falouse de todo e tamén do Carqueixa
despois dun anaco o Ramuín preguntou:
-¿Hai por eiquí algun meixuo para
dormir ?
Ó que lle respondeu o taberneiro .
-Non lle vai ser nada doado atopar
pousada, xa sabe, a xente anda un pouco receosa polo asunto do
escapado e por eso non ofrece pousada a ninguén.
O Ramuín, xa cando se dispoñía a
atravesar o sarego da porta, oíu ó taberneiro que lle dicía:
-Agarde un momento, pois non me
lembraba que perto deiquí ó chegar a unha encrucillada e
apartando á esquerda hai un camiño que conduce a un caseirón
moi antergo que se coñece co nome do "Pazo dos
Axusticiados", onde de seguro lle darán pousada.
Entón o afiador, movido pola
curiosidade, preguntou:
-¿E a que se debe tal nome?
-Iso sería un pouco longo de
contar e cada un sabe a historia á súa maneira, non obstante
podo dicirlle que no pazo vive un home un tanto estraño, ó
dicir da xente, pero de seguro que el satisfará a súa
curiosidade.
O dar co pazo foille doado despois
de seguir as indicacións que lle deran; aló estaba o vello
caseirón rodeado por un muro ancho en sobexo, ó que se entraba
por unha cancilla de ferro. O seu aspecto nas noites de luar
debía de ser feiticeiro e fantasgomérico. Coa fin de que lle
abrisen, tocou o chifro e deseguida oubeou un can que alertou ó
mordomo, quen se acaroou ata a cancela e dixo:
-¡Un afiador ! Hai tempo que
agardaba a visita dalgún de vostedes.
O Ramuín respóndeulle moi
contento pola fiuza que o señor lle amosaba.
-¿E logo non se achegan por eiquí
a miúdo outros compañeiros? Ou cicais cóllenlle medo ó doco
que defende a casa.
-Non hai caso, as causas son outras
E sen máis o mordomo levou a
Ramuín xunto ó amo, quen se atopaba sentado nunha poltrona do
salón. Ó ver ó afiador dixo:
-Tome acomodo, espero que non lle
moleste a chimenea acesa, porque malia a época do ano en que nos
atopamos polas noites refresca sempre por esta zona. Ademais, un
xa vai vello e gosta do calor do lume. Mentras o meu mordomo
prepara a cena imos falar do que interesa. Como pode apreciar
eiquí hai obras de arte en mal estado.
O afiador seguía a conversa daquel
home que, a medida que avanzaba, resultáballe do máis
interesante. Así seguiu a falar o vello.
-Teño entendido que vostedes non
só arranxan paraguas, senón que tamén son parafuseiros ¿Estou
no certo?
-Pois si, ten razón; ademais do
noso cometido de sempre tamén sabemos facer algo de todo.
Ramuín puido apreciar na cara do
home a satisfacción que as súas palabras lle producían ó dono
do pazo, así unha vez que cearon mandou o mordomo que trouxera
unha copas e abrindo unha botella de champaña dixo:
-Sempre me gostou brindar con este
viño porque é unha maneira de renderlle homenaxe ó meu avó e
tamén a un capitán francés, ámbolos morreron con honor. Pero
como xa vai sendo tarde e vostede estará canso retirarémonos a
descansar, o mordomo indicaralle o lugar para.
-Non é necesario -atricouno
Ramuín- xa sei onde está a palleira, vina cando entraba.
Entón o dono do pazo alporizouse
en grande maneira e cun forte torgo de voz preguntou:
-¿Ese é o lugar que lle ofecen
por aí para dormir?
-Pois si, que quere que lle diga,
as palleiras, xunto cos fornos, son as miñas meixuos.
-Así tratan ós artistas neste
mundo de incultos, pero eiquí non vai a ser o caso, vostede
ocupará o cuarto no que no seu día estivo o capitán francés;
así concédolle o máis alto honor que lle pode rendir a miña
casa.
Aquela noite o amolador tardou en
pegar ollo; o lugar estaba para el cheo de misterio, non deixando
de matinar na persoa que dormira nel .Ó cabo cavilando nestas
cousas quedou dormido.
O vindeiro día comezou a tarefa de
restaurar xarróns, vasixas... pero sempre agardando o momento a
tergo para saber do misterio que pechaban aquelas centenarias
paredes. Así chegou un día que o señor lle dixo:
-Había tempo que desexaba ter todo
esto preparado, sen embargo ninguén quería pasar do sarego da
cancela . E ben certo que cando ocurre un malfado a xente
deseguida arrédase do lugar entrándolle as máis disparatadas
manías.
Ramuín atopou a ocasión por fin
tan alerada e preguntou:
-Senón é moito falar quixese
saber de onde lle ven o nome de "Pazo dos
Axusticiados".
-Sabía que acabaría por
inquerirme esa cuestión; o certo é que os feitos, atando cabos
deiquí e daló, puideron ocurrir así:
Naquel tempo os franceses entraron
no país, por causas xa coñecidas, e foron ocupando as
principais vilas e cidades. Eiquí, en vista das boas condicións
que ofrecía o pazo, decidiron quedarse. O capitán da tropa
pidiu ó meu avó permiso para pasar a noite; por certo, hai que
dicir que tiña moi boas maneiras, aquela noite o capitán xunto
co tenente estiveron de sarao. O meu avó deseguida se decatou da
grande cultura que amosaba o capitán francés e dixolle:"
Vostede fala cun acento que semella bretón". A esto respondeulle
moi complacido o capitán: "Si, son de Bretaña, unha terra
parecida á súa e amada por todos nós por mor das súas tradicións
e danzas, o son do binou e da bombarda; sen embargo, teño medo
de non poder volver a ela, estas continuas guerras arruinan o
noso país e botan a perder a xuventude. A unidade das terras tal
como pretende o noso emperador é de todo imposible, pois cada
pobo ten o seu propio modo de ser e costumes, tan só un home
preso de semellante doidice pode pensar lograr tales
desatinos".
Ante as palabras do capitán o
tenente asorouse e dixo: "Un capitán francés non pode
falar deste xeito e menos tratando de louco o noso invicto
emperador, terá que dar conta desta traición".
O meu avó, como pensou que a cousa
podía ir a peor polo enzuque do tenente, tencionou apaciguar os
azos dicindo:
-"Bon, como xa é tarde e
vostedes teñen un longo camiño por diante sería conveniente
retirarnos a refolgar.
Así o fixeron, malia o vindeiro
día no quinteiro do pazo había grande rebumbio, a causa era que
o capitán resistíase de ser empurrado cara o muro, pero
decatándose de que toda resistencia era inutil aceptou o seu
destino, e así acribillárono a balazos.
O meu avó dexergou aquela barbarie
desde a fiestra do salón derrubándose sen azos sobre unha das
poltronas, esta foi a triste fin do oficial francés. Como a
curiosidade do Ramuín non quedou satisfeita andruviou:
-Bon, a xente fala do pazo dos
axusticiados pero eu de momento só hai un, podía aclararme todo
esto.
Entón respóndeulle o Señor que
parecía enviso nos seus pensamentos, sen embargo axiña tomou de
novo o fio da conversa.
-Mire, uns meses despois acudiron
ó pazo novas tropas, aínda que esta vez non eran francesas,
malia quen as mandaba viña co propósito de aclarar todo o que
sucedera no pazo, polo que dixo ó meu avó: "Vostede deu
abeiro ós soldados franceses xunto cos seus xefes, por tanto é
un traidor", ó que lle replicou o meu avó: "eu non
son ningún traidor; ademais, cómo quería que me enfrontase a
eles, pois non creo puidese facer moito coa miña escopeta de
caza". Estas palabras foron rexeitadas polo oficial da tropa
dicindo"un verdadeiro patriota é o que debería de facer
nun destes caso por tanto"...
O meu avó non lle deixou rematar
dicíndolle: "mire, eu non lle entendo de patriotismo nin de
salvapatrias, eso deixollo para vostedes". O capitán, que
tal era o grado de quen mandaba a tropa, mandou acaroar o meu
avó cara o muro, onde tivo o mesmo final que o oficial francés.
Tanto un como o outro non querían a violencia sendo víctimas
dela, esta é a historia pola que lle quedou ó pazo o nome co
que se coñece agora.
Deste xeito quedou satisfeita a
curiosidade do afiador que continuou varios días máis
disfrutando da conversa do señor, quen unha vez deu por rematada
a súa laboura despidiuse do Ramuín na porta do pazo.
-Perdoe non poida acompañalo ata a
cancela de entrada pero é que as pernas xa non me responden. Non
se esqueza de volver algún día por eiquí se pode.
Así llo prometeo o amolador
despedíndose del cunha forte aperta, moi contento de servir a un
auténtico cabaleiro.
E de novo viuse no camiño e como a
mañá era fresca facía que empurrase a tarazana con forza.
Ademais que desexaba percorrer o máis pronto posible aqueles
lugares isolados. Enviso como ía nos seus pensamentos, pois
despois do acontecido no pazo a cousa non era para menos, non se
decatou da presencia dunha parella de gardas que lle berraron:
-¿Eis amigo, como anda o negocio?
Ramuín instintivamente sacou o
chifro e interpretou a tocata que conviñera co Carqueixa cousa
que estrañou ós gardas, así díxolle un:
-Non vexo a santo de que ven a
poñerse a utilizar o subiote así de súpeto, tendo en conta
ademais de que por eiquí non hai casa algunha e por tanto xente
que lle vaia a sair ó paso.
O afiador como puido tencionou sair
do paso dicíndolles:
-Perdoen vostedes, pero é que para
facer máis levadeira a miña andaina toco de cando en vez pezas
musicais: unha habanera, un preludio de opera ou zarzuela... e a
presencia de tan importantes autoridades aínda me animou máis a
elo.
Os gardas non moi convencidos
seguiron escoitando ó afiador quen esta vez dixo:
-E falando de todo un pouco que
prefiren vostedes. ¿Ópera ou zarzuela?
Sorprendido pola pregunta un dos
gardas respóndeulle tatexando
-Pois a nós ... o que se dice
ópera... en fin...
O Ramuín observou o seu azoramento
e tratou de continuar coa súa retranca.
-¡Xa vexo, xa vexo! Ó mellor de
zarzuela quizais me podan dicir algo.
O que falou agora foi o compañeiro
do garda que por aí andaba de cultura segundo as súas palabras.
-Pois zarzuela... o que se di
zarzuela...
Ante os coñecementos musicais que
amosaba a parella, o Ramuín decidiu acabar con aquela situación
que xa estaba resultando un tanto fóra de tono e dixo:
-Se lles parece deixamos o concerto
para outra ocasión.
E sen máis continuou o camiño
entonando a mesma tocata do principio. O que fixo que un dos
gardas dixese:
-Non sei... Non sei ... pero este
home...
-Si, eu penso que ten moita pibela.
Interrumpiuno o compañeiro que
miraba en fite como desaparecía o afiador.
O Ramuín aínda que cada vez máis
afastado do lugar de cando en vez volvese a cabeza e ollase para
atrás por si era seguido.
Despois de atravesar aqueles
lugares xardescos o Ramuín atopou un grupo de casas, o que lle
indicaba que estaba ante unha nova freguesía; era xa mediodía,
polo que se dispuxo a buscar algún sitio onde poidese comer,
algo xa que a fame xa lle apurraba o seu.
E así na súa procura veu a dar
ata a igrexa chamándolle a atención a grandiosidade do edificio
que tiña ó seu carón, tratábase da retoral, detívose a
dexergala sen decatarse que era ateivado polo abade que, desde
unha ventá, invitábao a que entrase. Unha vez dentro
expresoulle o seu entusiasmo dicíndolle:
-¡Loubado sexa Deus! Non se
estrañe pola miña alegría, pero é que necesitábamos moito a
súa presencia, xa que pronto será a festa do patrón e deverán
estar os coitelos en condicións para que poidan trinchar o
cabuxo e demais viandas sen dificultade algunha.
-Si, pero antes desexaría tomar un
bocado, pois a gadulla é grande; ademais o meu desexo é o de
refrescarme nunha oreta xa que a camiñata foi grande.
-¡Como non! Pase á cociña e que
lle sirva a miña ama unha taza de caldo se é que aínda non o botaron
ó caldeiro dos porcos, vostede ben sabe que na aldea as sobras
nunca se perden.
-Por min que sigan a non perderse,
xa que ollei antes unha tóla onde mercarei o que necesite.
Así o fixo o amolador e, despois
de dar boa conta dun pedazo de queixo con pan, volveu a retoral ,
e puxose man a obra que en sobexo lle agardaba, segundo puido
apreciar pola cantidade de coitelos que debería afiar. O
traballo levoulle toda a tarde e xa cando se acaroaba ó final de
novo o crego fixo acto de presencia con desexos de conversa co
amolador.
-Como vostede poderá comprobar
atopase nunha das máis grandes retorais en moitas leguas a
redonda como se dice, agora vai ter oportunidade de coñecela.
E así o crego foille enseñando as
adegas, as tullas para o trigo e centeo, as despensas coa carne
de porco, as arcas para o pan e, como non, tódalas estancias da
retoral entre as que estaba o grande salón onde se reunía coa
familia, moi numerosa, cando lles quería dar unha enchenta, ou
cos cregos do entorno, por ser el o dirixente ou conselleiro
deles. Unha vez que rematou de amosarlle todo ó afiador
díxolle:
-Como verá hai que fornecerse de
todo o necesario, pois uns anos son máis xenerosos que outros,
por tanto estes tapan os buratos que deixan os demais...
-Polo que vexo nese aspecto eiquí
non hai cuidado, ten para tapar e tapar.
-Pois de momento non teño queixa e
da abundancia das nosas arcas están enteirados os ladróns que
sempre tiveron nos seus puntos de mira as casas retorais;
pódolle contar uns cantos casos, entre eles o do
"Truco", que roubou nunha retoral vinte mil reais
obrigando a descalzar ó abade para logo baterlle cos seus
propios zapatos na cabeza; outros que tamén fixeron das súas
foron o "Ventosela" e mais o "Louzán". Non
obstante, o máis salientable de todos foi Xan Quinto, que no seu
ataque a unha retoral matou o cura e a súa sobriña.
Ramuín seguía moi atento a
conversa do cura e quixo saber máis cousas sobre o asunto destes
bandoleiros, así preguntoulle:
-Malia todo eso que vostede me
conta, segundo teño entendido, parece ser que os cregos non
foron mancos na defensa dos seus intereses.
-Pois leva razón, xa que nós
tamén sabemos defendernos ata o punto que puxemos a máis dun
con pes en polvoreda. Podo falarlle dun compañeiro que mantivo a
raia a unha cuadrilla de bandoleiros disparando dese a fiestra, a
pesar de ter un brazo inutilizado ó ser acadado polos disparos
dos contrincantes. O mesmo fixo outro disparando polas torneiras
da retoral que fixo que os asaltantes fuxisen como cans
escaldados. Ultimamente fálase moito dun escapado que anda por
estes lares, pero si ven será recibido como se debe. E dicindo
esto o crego levou ó afiador a un cuarto cheo de armas o que lle
fixo dicir:
-¡Madia leva ! Nesta caxegueira
hai armas para combatir a todo un exército.
-Pois esta vostede no certo, amigo,
xa que a retoral foi unha sorte de cuartel durante a guerra
contra os franceses na que os cregos loitamos como verdadeiros
soldados, morrendo na loita un número bastante considerable.
Unha vez que o crego lle amosou
tódalas dependencias díxolle:
-Como pode ver esto custa moito o
sostelo, as aportacións dos feligreses cada vez son máis
pequenas, non se decatan como dicía o apóstol que o que
traballa no altar debe vivir do altar, o que non deixa de ser
unha grande verdade.
-¿Que verdade? -preguntou o
afiador.
-¡Cal vai a ser, a nosa!
-respóndeulle o cura moi alporizado.
-Tamén é verdade -díxolle
Ramuín- que a perdida de fé sempre vai unida a un maior
espelimento da xente.
Neste momento da conversa que cada
vez se ía encerellando máis, apareceu a sobriña do cura
pavoneandose diante do afiador, o que fixo que dixera o abade:
-Segundo pode ver teño unha
sobriña moi fermosa, pero non vou a deixar que outro Xan Quinto
faga das súas con ela.
-Desde logo ten a quen parecerse
-di o afiador.
-Razón non lle falta , malia que
non me coñeceu vostede nos meus anos mozos.
Entón a señora ama que seguía a
conversa un pouco arredada vendo o rumbo que estaba a tomar
esgutiou:
-¡Señor cura! ¡Señor cura!
Este decatouse de que metera a zoca
e tencionou de arranxar a cousa dicindo:
-¡Xa te entendo ! ¡Xa te entendo!
Non sei o que digo, a culpa tena este anisete cando bebo uns
grolos demais.
O caso é que entre unha cousas e
outras a noite botábase enriba e o afiador quixo saber onde ía
pasala, cousa que lle fixo saber o cura, quen lle dixo:
-¡Como non!. E ata vai a ter sorte
pois aínda non se segou a herba, polo que ten a palleira libre.
O Ramuín rosmou:
-Auténtica caridade cristiá a
deste zoina, sen colchón nin parrela non se conforma o que non
quere.
O lumbrigar o día enxeitou a
palleira, doíalle todo o corpo de estar deitado nas laxes, pois
así era o solo e por tanto non era cousa de botar aló máis
tempo. Ademais tiña a boca seca e desexaba refrescarse na
primeira oreteira que atopase.
Despois de varias horas de camiñar
viu a un home que baixaba por unha congosta que levaba ó monte
de aspecto bragoleteiro cunha roupas moi usadas porque non lle
ían a medida, semellaba non de bon xorne ó ir ía falando só,
contra uns e contra outros.
O Ramuín coa fin de que se aledase
un pouco saudouno, o que fixo que o home quedáse sorprendido
dicindo:
-Como se coñece que vostede non é
destas terras, pois de ser así pasaría de largo aínda que me
vise guindado no chan.
-¡Home! Penso que o saudar e o
menos que se pode facer.
-Así debería de ser pero o
Gaiolas que así é como me chaman, non entra nesas normas.
-Vostede é un grande madrugador, e
perdoe a miña curiosidade, pero...
Sen darlle tempo a que continuase,
o Gaiolas andruviono dicíndolle:
-Mire, sempre antes do abrente subo
ó monte armar as miñas gaiolas, de aí ven o alcume co que se
me coñece, e unha laboura de tempo e paciencia, logo ó solpor
veño a ollar o que caeu. Endexamais me gostou cazar por outros
medios que non sexan estos, eu empleo as miñas mañas e os
animais deben emplear a súas para non caer nas trapelas.Como
verá é a eterna loita pola supervivencia.
Despois desta palabras o Gaiolas
permaneceu uns momentos calado o que aproveitou o Ramuín para
dicir:
-Vexo que estará en contra os que
convirten o monte nunha verdadeira carnicería, querendo acabar
pola via rápida empregando furóns e outros métodos para
obrigar os animais a saír á forza dos seus tobos.
O Gaiolas por uns momentos
alporizouse xa que o Ramuín viña de lembrarlle unha das súas
teimas: a caza ilegal polo, que lle dixo:
-Agora, si que atopou vostede o
miolo da cuestión, con relación a eso direille que estou moi
enoxado coa maioría da xente, pois o que máis ou que menos ten
algo que rañar sobre todo algúns que deberían dar exemplo, non
é necesario dar nomes pero ós que estorbo porque xa non é a
primeira vez que os collo en plena faena. Por eso conto con moi
poucos amigos na aldea, ademais consideranme un vagabundo porque
vivo arredado nunha poubea nun mal colchón de palla e por se
todo esto fose pouco din que son un mal exemplo para a aldea.
De novo Ramuín atricou a conversa
dicindo con retranca:
-Será por cazar honradamente.
¿Non si?
-Poida que sexa así, dicíalle que
todos estaban en contra de min, aínda que esto non é de todo
certo, xa que o taberneiro e mailo mestre axúdanme, por eso xa
recibiron un toque de atención do cura e mais dos gardas.
Como o afiador quedara un pouco
estrañado polas palabras do Gaiolas, este decatouse delo e
díxolle:
-Mire, ás veces o mestre dame uns
cartiños, non moitos, xa que o pobre non pode ó non nadar
precisamente na abundancia . E o taberneiro agasállame coa
correspondente botella de viño. Ámbolos dous reciben as súas
criticas porque segundo esta clase de xente o que fan é
viciarme, como lle dicía, ó ser un mal exemplo para a
freguesía andan buscando a maneira de recluírme nun asilo da
cidade. E temo que rematarán algún día non moi lonxano por
conseguilo.
O afiador acompañou ó Gaiolas ata
a aldea, pois invitárao a tomar unhas cuncas de viño na baiuca,
aínda que non puido levar a cabo o seu propósito xa que
decatouse de que nese momento atopábase no lugar os que menos
desexaba: o cura xunto co cabo dos gardas. Entón aló mesmo
despidiuse do Ramuín, quen si entrou na baiuca cando
precisamente o crego lle estaba sermoneando o taberneiro
dicíndolle:
-Vostede está a fomentar os vicios
do Gaiolas ó darlle tanto viño, xa que con frecuencia vese
guindado pola estrada, o que ademais de constituír un grande
perigo para el, resulta un mal exemplo na vecindade.
Naqueles momentos entrou o mestre,
quen tamén recibiu a súa chamada ó orde, esta vez por parte do
garda.
-E deso ten a culpa o ensinante ó
darlle cartos, pois teño comprobado que pasa pola porta da
escola con frecuencia, o que tampouco é un exemplo edificante
para os rapaces.
-O que eu lle dou -deféndese o
mestre- penso que non lle chegará nin para un cuartillo de viño,
así que xa me dirá. ..
-Bon, deixemos esta cuestión, que
xa se arranxará ó seu debido tempo, e saboreemos este anisete.
E así rematou a cuestión o crego.
O garda e o cura abandonaron a
taberna e o Ramuín, que permanecera calado escoitando os
desatinos de ámbalas persoas, mirou para o taberneiro como
agardando unha resposta, este decatándose delo díxolle:
-Que lle quere, as cousas son así,
a esta xente non se lle pode levar a contraria, sempre creen ter
a razón.
-Si , está no certo -respondeu o
afiador-.
Quen apurou a cunca de viño e saiu
da baiuca, esta vez contra o seu custume de parar a exercer a
súa laboura por onde pasaba, colleu a tarazana e continuou
camiño, xa que polo trato que a xente daba ó Gaiolas pensou que
non merecían ningunha atención pola súa parte.