v1xlripaldaafiador007.html
Vel
ehi ven o afiador
asubía
que asubía
Co
seu carro de unha roda
é
como a besta xunguida
(Xosé
María Alvarez Blázquez)
Unha vez que Ramuín achegouse de novo a casa comprobou que a
muller non cambiara en nada, máis ben se podía dicir que estaba
de peor xorne que nunca, debido ademais ó que fachendeaban
algúns emigrantes da súa estadía por Europa, por eso lle
dicía ó afiador:
-Ti despois de tanto tempo fóra da
casa ¿que é o que traes? Fíxate no Pedro da Raña, ese si que
pode dicirse que é un home, ademais fíxate no agasallo co que
obsequiou a muller: un anel de brillantes, e non só eso, hai que
ver o elegante e fino que se puxo. E ti sempre o mesmo, feito un
paifoco amarrado á roda.
En verdade que a Petra non cambiara
nada. Sen embargo, agora Ramuín o que lle importaba era coñecer
se todo o que dicía a muller sobre o Pedro era certo, de maneira
que achegouse á baiuca, lugar onde acudía case que tódolos
día a contar as súas fazañas. Así o atopou no momento que lle
estaba a dicir ó taberneiro:
-¡Como me serves a cervexa en
semellante vaso! Non sabes que tes que usar un vaso fino. O
taberneiro, como xa estaba cheo das enxangadas do Pedro, díxolle:
-Mira, como sigas amolándome, a fe
que vouche servir a cervexa no vaso fino que mereces: a maseira
dos porcos.
Así deste xeito o Ramuín íase
enterando das cousas do Raña, unha veces porque coincidía con
el na baiuca e outras veces por comentarios da xente, como nunha
ocasión que oíu falar a un.
-Parece ser que o outro día estivo
o Raña na capital e pidiu un wisque, entón o camareiro
preguntoulle se tiña preferencia por alguha marca en particular,
o Raña moi convencido díxolle que el quería do mellor. Así o
camaeiro trouxolle unha das botellas consideradas caras, pero
ante a súa sorpresa viu como o Raña rexeitábao pois aquel non
lle servía. Entón o camareiro serviulle un dos máis baratos.
Unha vez que lle chegou ó padal asegurou que aquel era o mellor,
que a el era moi dificil enganalo, xa que desta bebida entendía
moito.
-O camareiro -dixo o Ramuín- debeu
cobrarlle o wisque como se fose o máis caro para que
escarmentase.
-Dito e feito, pero eso non foi
todo, senón que ó saír do lugar o Pedro pronunciou as palabras
que repetía a cotío desde a súa chegada ¡Que incultura! ¡
Que incultura! cando algunha cousa non lle ía ó direito.
A conversa continuou, porque o que
máis e o que menos tiña algo que contar sobre o Pedro, así
falou agora outro.
-Tamén dicía que era moi
entendido en roupa, así un dia na feira acercouse a un dos
tenderetes de roupa a mercar unha camisas e comprobou que eran
polo menos dez veces máis baratas que no país onde estivera. O
que fixo que se alporizase en sobexo, dicindo que aló eran uns
completos ladróns. Os que o acompañaban entón repetironlle a
coro ¡Que incultura! ¡Que incultura!.
Así un día e outro o Raña
continuou coas súas parvadas ata que xa non foron novidade para
a xente, polo que se acabaron os comentarios. Pois a xente dicía
que se parvo era cando se marchou, parvo volvía.
Esto fixo cavilar ó Ramuín ó
pensar que se un babión como o Pedro gañara os cartos de
maneira tan doada, porque non o intentaba el, que se consideraba
bastante máis espilido.
Así dispúxose a preparar a viaxe,
Francia foi o país polo que se dicidiu e dentro del a cidade de
París era a que lle atraía máis. Moitos foron na aldea os que
tencionaron que non saíse da casa, pois coa roda nada ía a
facer. Sen embargo, lexos de acobardarse, o Ramuín colleu azos
dicíndolles os seus veciños:
-Se o meu bato chegou coa roda ás
Américas tamén o podo facer eu a un país que está bastante
máis cerca.
Así un día o afiador colleu a
congosta que o levaría a encrucillada e aló agardou que pasase
o coche de liña, comenzaba deste modo unha aventura que ía
resultar do máis reloucante.