v1xlripaldaafiador004.html
Nos
anos de lonxana mocedade
tódolos
marzos , cando viña o cuco,
o
afiador de roda e parafusa
entraba
na viliña mariñeira
ceibando
o berro longo e desmaiado:
¡o
afiador ...!
(Ramón
Cabanillas)
Ramuín continuou recorrendo as terras do interior, saíndo máis
ou menos das dificultades que se lle foron presentando. Sen
embargo entroulle a curiosidade de viaxar á beira do mar, ós
mesmos lugares onde antano estivera o seu pai.
A súa presencia
acollerana con grande alegría sobre todo polos rapaces que
berraban:
-¡Xa veu o Cuco! ¡Xa veu
o Cuco!
Ramuín non enxergaba como
a el o identificaban co seu pai, pero un velliño que tomaba o
sol a porta da súa casa ó notar a sorpresa do afiador
explicoulle:
-Non se estrañe, pois
eiquí desde hai moito tempo ós afiadores coñéceselles co nome
de "Cucos" e verá o porqué. Esto élle en lembranza
dun grande afiador que puntualmente viña por estas terras o
mesmo que o cuco, de aí o alcume que lle quedou desde entón
para tódolos afiadores que por eiquí se acaroaban. E mire por
onde vostede ten un grande parecido con el, nen que fose o seu
filllo.
Por estas consideracións
cara a persoa do seu pai o afiador facía o traballo como se di
poñendo os catro sentidos. Durante a súa estadia tivo ocasión
de coñecer un mundo do máis reloucante que polo seu modo de
vida era moi distinto do que deixara atrás. Agora Ramuín non se
cansaba de ollar ó mar, aquel mar que atravesara o seu pai para
nunca máis voltar. Uns deses días que estaba a ver o ir e vir
dos vagallóns coñeceu a unha muller aínda rufa, pois malia os
moitos anos cos que apandaba manexaba os remos da gamela como se
dunha moza se tratase. Malia o Ramuín díxolle:
-¿Non cree que xa vai
sendo hora de que descanse?
Entón a muller moi perena
respóndeulle.
-Levo xa unha chea de anos
metido nesto traballando arreo, sobre todo desde que me quedei
viuva dun "vivo". Este é o meu medio de vida, salgo
coa gamela tódolos días que o mar mo permite e con ela pillo o
que cae logo vendo os peixes e así fago uns cartiños para ir
tirando.
-Si mal non entendín,
vostede dixo que era viuva dun vivo, xa me explicará como pode
ser eso e perdoe a miña curiosidade.
-Mire, eu tiven mala sorte
ó casar, pois o meu home resultón un folgazán de primeira
é...
-Aínda que non pretendo
que lle sirva de consolo, a min pasoume o mesmo no meu matrimonio
-atricou o afiador.
-Sintoo, entón saberá o
mal que se pasa e, seguindo co asunto do meu home, direille que
este non daba pancada, enchíase de comer e beber. En tratando de
arranxar o asunto fun a onde o cura, a quen lle contei as miñas
cuitas, pero lexos de darme unha solución díxome:
-Mire, a muller debe levar
as cargas do matrimonio con paciencia e resignación, pois así
nolo enseña o noso Señor Xesucristo.
-Eu respóndinlle que era
o único que me podía axudar, pero que vivía bastante lexos.
-¿E que fixo vostede
entón?
-Pois tratei de solucionar
a cuestión pola via rápida.
-Supoño que se está a
referir o xuzgado, aínda que tampouco se lle pode chamar vía
rápida.
-De que xuzgado me fala
nen farrapos de gaita; mire, o asunto solucionouse cun
palitrocazo co remo da miña gamela, penso que non pode ser a
cousa máis rápida. E ademais advertinlle que como se deixase
volver a ver por estes lares escacharíalle mitade da cabeza que
lle quedaba. O asunto serviu de escarmento porque endexamais
souben máis del.
A historia da vella
pescantina causoulle moita gracia ó Ramuín, ó contrario do que
lle sucedeu un día que estaba xunto a un cantil dexergando o
espéctaculo de ollar como os vagallón rompían sobre os cons
deixando esbarar a xerfa. Cando viu que unha rapaza se atopaba en
perigo de ser arrebatada polos golpes de mar se continuaba na
perigosa situación. Ó afiador aquelo non lle pareceu normal e
tencionou acaroarse a ela, o que conseguiu non sen poucos
esforzos, xa que aínda que estaba acostumado ós lugares esgrevios
aquelo era demasiado para el. A rapaza tan envisa estaba nos seus
pensamentos que non se decatou da presencia do Ramuín ata que
lle dixo:
-Non penso que este sexa o
lugar adecuado para vires tomar o sol.
A rapaza contestoulle
chorando.
-Xa me queda pouco tempo
para eso e para calquer cousa, e senón quere acompañarme máis
val e que se arrede do meu lado, xa que algún dos vagallóns
acabarán por levarme.
O Ramuín non sen poucos
esforzos conseguiu ó cabo afastar a rapaza do perigo e díxolle:
-Por moito desengano
amoroso que teñas, pois seguro que esa é a causa de que te
queiras matar, non penso que sexa tan grave ata o punto de querer
abandonar este mundo.
A xoven novamente
sorprendeu o afiador dicíndolle:
-Eu non teño ningún
desengano como vostede dice, mátome por amar demasiado.
-Pois con eso non contaba
xa me dirás entón cal é o motivo de que estes amorantada dese
xeito.
-Mire, a miña familia
vive pobremente, por eso os meus pais queren que case co Foncho
que ten ó seu mando a frota pesqueira da vila, pero a min pouco
me importan as súas riquezas, ademais de ser xa moi vello para
min e noxento pois tense rido de moitas rapazas.
-Por desgracia o que me
contas non é novidade algunha, pero desde logo eso non che vai a
pasar a ti, gracias a este asubiote que levo no bulso.
De súpeto a rapaza baixou
a cabeza e púxose a saloucar, o que sorprendeo a Ramuín, que
lle dixo:
-¿Que diaño pasa agora?
-E que o meu noivo Pedro
tamén ía a face-lo mesmo ca min, cando saise a pescar coa súa
gamela.
-¡Quen non quere caldo
sete tazas! -esgutiou o afiador-, pero deseguido recobrou a
calama dicindo:
-Veña, azancoa, que non
temos tempo que perder.
Ámbolos chegaron no
momento en que Pedro estaba disposto a sair, contándolle Elena,
que ese era o seu nome, todo o que lle acontecera sen esquecerse
do asunto do chifro, o que lle fixo pensar:
-E non será que ese home
esté tolo, pois o que me dices non é para considerar que ande
con demasiada cordura.
-Tolos estabamos nós polo
que íamos facer, eu teño completa fiuza neste home e ti débela
ter de igual maneira.
Por uns días o Ramuín
deixou a roda e comenzou a recorrer aqueles lugares esgrevios coa
seguridade de que atoparía ó Carqueixa, cousa que non tardou en
ocurrir pois un día viu o escapado sentado nuns cons e
berroulle:
-¡Eis Carqueixa!
Quen tan pronto como se
decatou da presencia do seu amigo acaroouse xunto a el e foi
cando o afiador lle dixo:
-Sabía que te atoparía
por eiquí, pois dixérasme que ías a cambiar de aires.
-Segundo podo observar ti
tamén fixeches o mesmo, e falando de todo un pouco, que novas me
traes.
O Ramuín contoulle todo o
que lle sucedera coa parella de noivos sen esquecerse dos
propositos que tiña o cacique da vila para coa rapaza, unha vez
que acabou díxolle ó Carqueixa.
-Non te preocupes, que a
ese tiña ganas de arreglar contas con ese galopín xa que
segundo me puiden enterar abusa dos mariñeiros pagándolles o
que lle peta e despidíndoos tamén cando lle vén en gana. Deixa
esto nas miñas mans, verás como se lle dará xeito a todo.
O Carqueixa non tardou en
presentarse na casa do Foncho e fíxolle a seguinte petición:
-Mire vostede, estou nun
grande apuro, pois teño unha débeda cun ricachón e senón lla
pago terá que casar coa miña filla, que é o único que el
acepta para poder perdoarma. Ela está disposta pola familia en
unirse a tal porco e por tanto...
Entón interrumpiu o
Foncho
-Eso a min non me importa
nada, estaría apañado se cada un con problemas viñese onda min
para que llos sulucionase, ademais que o mundo está cheo de
porcos.
Ante as palabras do Foncho
respóndeulle o Carqueixa moi pereno.
-Ten vostede moita razón
e un deses porcos está diante de min, pero deixémonos de
palabras e vaia afloxando a carteira, senón vai aínda máis
aumentar de peso con estas onzas de chumbo que lle meta no peito.
Ademais concederá un préstamo a fondo perdido, claro está, a
un tal Pedro, supoño que lle sonará, de maneira que poida
mercar un barco para faenar. E a cousa non remata eiquí, pois
firmará contrato indifinido a cada un dos mariñeiros ó seu
cargo. Senón cumple deixareille o peito coma se dun coador se
tratase. ¡Palabra do Carqueixa!
O Foncho, ó escoitar tal
nome, entroulle unha suor fría como de morte e deixouse caer
sobre a poltrona facendo ruxir tódolos seus muelles.
O Ramuín inda quedou
varios día na vila e puido comprobar como o Foncho ía cumplindo
todo o mandado, pero antes de partir quixo despedirse da vella
pescantina cando como un día calquer se dispoñía a realizar a
súa tarefa e díxolle:
-Cando volva a casa
quizais se atope cunha novidade, logo pasoulle as mans polas
meixelas a modo de anaina en señal de despedida e agardou uns
momentos que desaparecese coa súa gamela no horizonte aquela
extraordinaria muller que malia os moitos anos o mar seguía a
respetar.
A vila despidiu con
entusiasmo ó Ramuín, quen ó pasar coa súa roda diante dos
enamorados dedicoulles a súa máis fermosa tocata. Entón Elena
dixolle ó seu noivo:
-Decíache que debiamos
confiar nel e como ves así sucedeu.
-Si, foi un home de
palabra -dixo Pedro, ollando para el cheo de admiración.
Xa entre o fusco e o lusco
chegou a vella pescantina a casa e atopouse coa agradable
sorpresa de que diante da porta tiña un motor fora borda para a
gamela, o que lle fixo dicir:
-¡Que raio de afiador!