v1xlripaldaafiador009.html
Non
hai para este home camiños estranos
máquina
de arreo tódalas guchías
i
as súas andolias ao longo dos días
avantan
variles polos meridianos.
(Ben
Cho Sei)
Unha vez que Ramuín achegouse a estrada principal ían a comezar
para el os primeiros catanos da viaxe.
O afiador deixou que subira a xente
que tamén acudira en gran número desde diversos lugares e xa
cando se dispuñía a subir ó coche este arrancou, polo que o
home deu en berrar.
-¡Pare compadre! Que nos tamén
queremos subir.
Entón o conductor disculpouse dicíndolle:
-Perdoe vostede, pero é que como o
vin coa roda pensei que seguía camiño.
O Ramuín tencionou meter a roda
pola porta, o que sorprendeu ó conductor, que lle recriminou a
súa actitude e díxolle:
-¡Que fai vostede? Non se decata
que a roda non pode viaxar no medio dos pasaxeiros.
E sen máis explicacións puxo en
marcha o coche, pois xa a xente comezaba a inquendarse pola tardanza
en saír. Así o afiador quedou como se di plantado no medio da
estrada pero, lexos de acoquinarse, ollou para a roda e dixo:
-Pepa, ti adiante eu detrás, veña.
¡Andolias ó camiño!
E deste modo dirixiuse á capital,
a camiñata non lle importaba por estar afeito a elas, sen
embargo tiña medo de non chegar con tempo de coller o tren.
Malia a sorte aliouse con el e recolleuno un camión que se
dirixía a cidade cun fato de cabuxos que debido a xebralos das
súas nais facían un grande estrondo abouxando os oídos.
A fin chegou á estación onde
collería os billetes para a fronteira e despois tería que
coller outro que o deixaría directamente en París, onde o
agardaba o sobriño da Petra, moito máis sociable que a tía.
Xa nos andeis da estación aló
producíanse as mesmas escenas de sempre: o bico da noiva, da nai,
as apertas dos amigos ó despedirse, a faciana de preocupación
dos emigrantes, reflexo do desacougo por non saber o que lles
agarda, xentes que veñen dun lado e doutro con maletas, paquetes
e demais bultos, a ledicía dos soldados que torna a casa... E a
esto únense os que con grandes presas se dirixen ós portelos
para coller o billete, entre os que se atopa Ramuín, que
deixando a roda nun cornello agarda fouperiramente o turno para
ser despachado, o que se produce despois de non pouca espera.
-Un billete para París -dice.
Entón o engargado de despachalo sóltalle
unha retafia de consellos:
-Leva vostede algún vulto de
tamaño considerable.
-Bon non creo que se lle poida
chamar vulto a miña Pepa... pero se vostede o di... pois...
-Entón, non hai voltas que darlle,
son dous billetes -di o porteleiro.
O afiador, sorprendido por estas
palabras, di un pouco alporizado
-¡Madia leva! Que teña que pagar
tamén pola miña compañeira.
Como o empleado observase no
afiador unha actitude negativa a pagar dixo:
-¡Escoite amigo! Acaso non vai
ocupar un sitio como todo o mundo, acaso non vai a desgastar o
asento coas súas posadeiras...
Como a conversa xa se facía
demasiado longa os que agardaban paciente o turno para coller
billete comezaron en amosar o descontento e tamén trataron de
espilido o Ramuín, así comentaba un:
-Menudo paxaro, quería pasar a
súa parienta sen mercarlle o billete.
Eso mesmo digo eu, veña, que acabe
dunha vez que se nos vai a facer de noite eiquí.
Ramuín non lle quedou máis
remedio que coller os dous billetes, unha vez que fixo esto
dirixiuse ó cornello onde deixara a tarazana e como empurraba a
máis dun, dixéronlle que non debía de ter presa, pois o tren
traía un retraso bastante considerable.
Entón para que a espera non fose
tan aburrida entrou nunha baiuca, da que se podían oír os
altofalantes anunciando as chegadas e as saídas dos trens.
A baiuca tiña o estrado moi vello,
de xeito que ó trepar enriba del as táboas rexían, as paredes
indicaban pola pátina que as cubría grande humidade e unha
antuca que se movía ó menos refacho de vento era a única luz
que dispuña, xunto a que entraba por unha pequena xanela. O dono,
de faciana moi curtida e cunha expresión seria e de poucos
amigos. Nun recanto, sentada nun tallo, unha vella daba voltas e
voltas a un vaso de leite tencionando esluir un terrón de azucre
que tiña no fondo.
Noutro lugar uns siaeiros botaban
unha timba cunhas cartas que apenas se podían ver os debuxos
polo amarfañadas que estaban debido ó seu uso a cotio. En fin
outros bebían viño a pequenos gulapos para así facer que
durase moito máis o contido. Este era máis ou menos o panorama
que dexergaba Ramuín desde o mostrador onde se atopaba apoiado.
Pediu un vaso de viño e dispúxose a esperar o tren.
No seu recanto a vella deixou de
dar voltas ó azucre e acaroouse ó mostrador a pedir un boliño
de pan, pero o único que atopou foi a faciana fusca do dono da
baiuca que lle dixo:
-Máña cando teñas cobrado o saco
de papais poderás tomar o boliño, por hoxe abondache co vasiño
de leite.
Sen tempos de escasece, fame, non
hai fiuza de ninguén todos andan a espreita tencionando coller o
que poden, cazar e non ser cazados.
A vella olla para o Ramuín, el
enxerga, polo que quita unha moedas do peto e dallas a vella,
coas que xa pode comprar o arelado boliño.
Pasan as horas e o Ramuín apura un
vaso e outro para ir matando o tempo, pero xa a cabeza comeza a
darlle voltas, debido que a calidade do viño e mala en sobexo. A
cabo dunhas hora o taberneiro observa a súa inquendanza e
preguntalle:
-Vostede leva eiquí xa un chea de
tempo sen que sexa moito preguntar ¿E que agarda a alguén ?
-Pois si, agardo o meu tren .
-Por hoxe xa lle pasaron tódolos
trens que o debían de facer, se lle parece amoseme os billetes e
poderemos saber cando o fixo o seu.
O Ramuín amosallos o taberneiro,
este comproba que o tren que el debía coller fora un dos
primeiros en pasar.
O afiador entre os vasos de viño
que lle marearon o sentido e tamén ó distraese cos personaxes
tan choqueiros que na baiuca entraban o caso foi que non se
decatou do paso do tren. E por riba o taberneiro aínda botaba
máis leña o lume como se di para preocupar o fiador, así
dille:
-Pero vostede ¿non oíu polos
altofalantes o anuncio da saída do tren para Irún?
O Ramuín decatouse de que non
tiña disculpa algunha, pero tampouco estaba disposto a quedarse
así como así sen facer nada, por tanto unha vez máis botou man
da súa retranca e moi pereno dixolle o taberneiro:
-Pois , si señor que escoitei ós
altofalantes pero resulta que non anunciaron o nome do meu tren,
xa que o tren que eu deseño non é para ir un, senón para ir
dous, a Pepa e máis eu. Por tanto voua facer a correspondente
protesta ó xefe de estación.
O taberneiro non saía do seu asoro
e xa cando o afiador saía da baiuca dixo:
-Mira por onde estiven a falar cun
tolo sen sabelo.
Mentras o amolador dirixiuse cara o
despacho do xefe de estación para facer unha reclamación. O
xefe unha vez que o escoitou non saía do seu abraio e dixolle:
-Pero vostede non escoitou ós
altofalantes que anunciaban as saídas de cada tren ben as
claras.
-Si señor, pois eu teño un oído
tan fino como o do raposo, pero eu teño que dicirlle que os meus
biletes indican sen ningunha clase de dúbidas que é para ir
dous. E non me dirá vostede que ese tren nomearono os
altofalantes. Senon fan as cousas ó direito eu non teño que
lles facer.
-Así que vostede agarda o tren
para ir dous. ¿Onde está o outro pasaxeiro?
-Está arrumbado nun cornello
agardando a que eu a empuxe, refírome a Pepa a tarazana.
O xefe viu que as cousas que dicía
aquel home eran un completo desatino, polo que lle dixo:
-Entón vostede quere facer unha
reclamación en toda regla .
-Bon, diriamos que en tódolos
renglóns que fagan falta
O caso era que o xefe da estación
xa se metera había uns días nun asunto serio polo que lle
peligrara o posto. Aínda que como era normal a reclamación do
Ramuín en principio como se di non tiña nin pés nin cabeza,
non obstante, polo feito de haber unha reclamación xa traía
consigo unha dura advertencia para o causante. Xa que as veces
nin se leía en que consistían, bastaba só co feito da denuncia
para encerellar a alguén nun lío.
Debido a estas circunstancias que
coñecía ben o xefe da estación, tratou de que o afiador se
viñese ás boas, polo que dixo:
-Mire, fareille unha autorización
para vostede e...
-A Pepa -tricoulle Ramuín- e
senón é moita molestia poña tamén o seu nome nos papeis.
De maneira que o afiador deste modo
puido viaxar de novo sen perder os cartos dos billetes, ademais
iría agora nun tren máis direto, así a chegada sería máis ou
menos como a que tiña prevista se collera o anterior tren.
Cando o xefe por fin viu que o
Ramuín saía da oficina puido respirar tranquilo, entón un dos
empleados que seguira a conversa desde a súa mesa comentou:
-A esta xente tan ignorante non se
debería deixar saír da súa aldea, a quen se lle ocurre andar
con estas parvadas que causan riso.
O xefe, que continuaba mirando pola
fiestra, e ó decatarse quen a tarazana era a Pepa dixo:
-Desde logo eiquí alguén estase a
rir, o caso é que desgraciadamente eses non somos nós.
Como a oficina estaba lonxe do
andén por onde paraba o tren, o afiador tería que librar unha
nova batalla, abrirse paso entre aquela furaleda de xente. Pois
xa se vía ó lonxe como a máquina de vapor, arrousando unha
chea de vagóns, daba a última curva semellando a unha serpe
calandreando antes de facer a entrada na estación.
Pouco a pouco íanse agotando os
minutos de parada que o tren tiña, a xente apurabase o máximo,
mesmo o Ramuín no seu afan de chegar o máis pronto posible
atropellaba coa tarazana a un que outro viaxeiro, o que lle
valía que recibise un montón de aldraxes que el parecía non oír,
enviso como ía. De súpeto chegou o inevitable, o inconfundible
torgo do altofalantes que anunciaban " ren rápido con
destino a Irún estacionado en vía terceira andén segundo vai
efectura a súa saída de inmediato".
Despois de non poucos esforzos conseguiu subir a un dos vagóns,
uns minutos antes que a descomunal máquina dese o último asubío
para anunciar a saída ó mesmo tempo que as bielas e manivelas
principiaban os seus movimentos, xunto coas refachos de vapor.
Hai que dicir que esto fóralle posible gracias a unha
caritativas mans que lle axudaron, pois o subir a Pepa non
resultara cousa doada.
Agora atopábase ante unha nova
tarefa, buscar un acomodo nun asiento, o que tiña a súa
dificultade, xa que como era costume o tren ía ateigado de
xente.