v1xlripaldaafiador010.html
Veña
pra acá afiador
afiei
a navalla miña...
Teño
na festa da Virxe
de
facer trinta feridas.
(Xosé
María Alvarez Blázquez)
Ramuín entrou nun dos corredores dun vagón que tal parecía que
non tiña fin, empurrando a roda ía tropezando con todo o que se
lle poñía por diante o que ocasionaba continuas protestas, e
aínda máis pode ser os vagóns de primeira clase polo que
dicían que non se debía permitir os viaxeiros de categoría
inferior subisen ó tren pola súa zona. O proceder daquela
xente, que viaxaba comodamente sentados sen estreiteces falando
ou lendo ou simplemente dexergando a paisaxe poas fiestras dos
pasillos coa seguridade de que ninguén se apoderará do seus
asientos, enoxou en sobexo o Ramuín quen dixo:
-Virán tempos en que xunto ó
soldado viaxe o xeneral, xunto o labrego o presidente da nación.
¿Acaso non teñen todos as mesmas posadeiras?
Continuando a busca dun lugar en
que puidese refolgar seguiu o afiador, pero o único que
observaba era a faciana de felicidade amosada por todos aqueles
que disfrutaban de asiento e daban conta de variados bocadillos,
así como do viño que lles caia certeiramente nas gorxas
enxoitas polo alamio de fume e carbonilla que se colaba de cando
en vez por algunha xanela. De súpeto ollou un compartimento que
lle pareceu valeiro e pensou que aló podía atopar o tan arelado
descanso, pero non se decatou que enfronte os bancos baleiros ía
unha parella de gardas. A súa sorpresa foi grande cando viu que
no medio dos do tricornio ía o Carqueixa, e laiouse de que a fin
derán con el.
Un dos gardas recoñeceuno e dixo:
-¡Que señor afiador! Segue
vostede coa súa tocata, pois mire por onde eiquí levamos un
admirador seu.
O Ramuín non dixo palabra e
arredouse do lugar coa tristura de ver o amigo en tal situación.
Continuou o seu devalar polos vagóns onde puido comprobar a
grande bullangueira que había en algúns, sobre todo os ocupados
por soldados que volvían ás súas casas despois de cumplir un
servicio militar bastante máis longo que o do Pepiño. Canso de
andar baroutas empurrando a tarazana e cando xa desesperaba de
atopar algún vagón libre, deu cun compartimento onde tan só
viaxaban un home e unha muller, eso si, tanto un como outro
ocupaban case todo o banco do seu lado, e non viron con agrado
que entrase o afiador, quen saudou.
-¡Boas tardes teñan vostedes!
A parella a que ninguén aburara
pensou que así ía continuar ata o seu destino, devolveu o
saúdo duinha maneira un tanto fusca. Despois o Ramuín
díxolles:
-Vou acomodar a miña Pepa de xeito
que ninguén proteste.
A parella pensou como era natural
que outro pasaxeiro ía tamén acomodarse o seu carón, o que
aumentou a súa inquendanza ó saber que agora tiñan que
realizar a viaxe con varias persoas. Ó cabo viron que o afiador
regresaba non cun viaxeiro senón coa tarazana que non sen pouco
traballo conseguiu meter no compartimento.
-Así que esta é a súa
compañeira, pois nós pensamos que se trataba dunha persoa .
-Bon, para min si, levamos moitos
anos xuntos e así continuaremos penso eu.
Entón o home indicoulle que
podería ter a súa dificultade co taniscador por mor da Pepa.
Pero Ramuín quitouno de dúbidas ó dicirlle que tamén levaba
billete en regla para ela. Despois de tanto traxín quedouse
dormido e ó pouco tempo xa soneaba e así continuaría, pero o
balbordo que facían os compañeiros de vaixe fixo que
despertase. Entón puido ollar como a muller subía as vaporosas
saias e o home afloxaba lizgairo o cinto do pantalón. Por un
momento pensou no peor, mais logo decatouse que se trabucaba
porque tanto un como o outro levaban uns bulsos pendurados
debaixo da saia e do pantalón. E que a medida que ían sacando guindaban
pola fiestra do tren. Sendo recollidos por xente que axiña
desaparecía coa mercancía. Non había ningunha dúbida, aquela
xente adicábase ó estraperlo e todos os movimentos tíñanos
moi estudiados, o que indicaba que operación viñan de realizala
moitas veces.
Rematado o cometido, a parella
agora ,como podía, tencionaba acomodarse debido ós atrancos que
a roda lles causaba para poder situar os pés, cousa que fixeron
despois de non poucas dificultades.
O Ramuín ollaba para eles
comprobando como os voluminosos corpos que amosaban ó principio
disminuíran agora dunha maneira considerable.
O xardesco movimento do taniscador
ó abrir a porta do compartimento despertou ós viaxeiros cando
este pronunciou as consabida frase de a cotío:
-¡Billetes por favor!
Mais a súa faciana arrubiouse pola
carraxe cando viu o espacio que ocupaba a tarazana, o que fixo
que esgutiase:
-¡Pero que diaño é esto!
Ante as palabras que o taniscador
pronunciara, o afiador alporizouse debido ó mal trato que recibía
o seu instrumento de traballo e dixo:
-Esto non é ningún diaño, só
faltaba eso, aldraxar a Pepa, pois deberá saber vostede que ela
é a miña compañeira xa hai unha chea de anos e non lle permito
a vostede nin a ninguén ese torgo de voz con ela, cando ademais
viaxa co seu correspondente billete.
Malia as palabras do afiador, o
taniscador continuou coas súas amenazas dicindo:
-De que billete me fala vostede,
acaso non sabe as normas, que un calimbornio de semellante
tamaño debe de ser facturado, e non pode en modo algún ocupar o
sitio destinado ós viaxeiros.
-Mire, xa me está vostede a encher
os nefres -di o afiador-, primeiro trata a Pepa de diaño e agora
de calimbornio. ¡Abonda xa de aldraxes!
O taniscador sen darse conta pisou
o pedal da tarazana, o que fixo se puxese en movimento a roda
onde tiña apoiada a man e berrou.
-¡Ai, ai ! Que me pela a man o
diaño.
-Pero home quite o pé do pedal,
senón nin a raspa lle vai a quedar, ademais que a Pepa xa lle
dixen que non se pode aldraxar, logo non se estrañe que se
defenda.
Esto fixo que o taniscador calmase
os seus azos e dixese a modo de disculpa:
-Bon retiro as miñas anteriores
palabras e agora dígame cara onde vai co seu apero de traballo
-Dirixome a París, onde tratarei
de buscarme a vida como un guaripo máis.
Sen embargo, entre tanta galra o
taniscador esqueceuse do miolo da cuestión e dixo:
-Mire, eu síntoo moito, pero terá
que baixar na vindeira estación e facturar o diaño, ou como se
chame.
Pero o Ramuín amosoulle o billete
que traía quitándoo da alxibeira; aquel ó velo dixo:
-Non sei quen é o que
verdadeiramente está máis tolo, se o xefe da estación ou
vostede -e outra vez, debido a carraxe, a cor avermellada
chegoulle, esta vez, ata as orellas.
Logo Ramuín díxolle moi pereno:
-Pero, malia todo eso, o xefe é o
xefe ¿ou non?
Tendo como resposta:
-¡Sexa pois!
E dando un portazo o taniscador
arredouse. A parella que ante os sucesos acaecidos mantiverase en
silencio agora deu señais de vida dicindo:
-Polo que vexo contra vostede nada
se pode facer pois está moi organizado.
Ó que lle respondeu o afiador:
-Para andar por este mundo, onde
como di o rapaso todas son trampas, hai que procurar ser moi
espilidos. Pero, falando de todo un pouco, polo que vexo vostedes
tamén teñen a súa organización, ademais adelgazan nun abrir e
cerrar ollos sen necesidade de receta médica. E tamén son uns
verdadeiros trasnos, pois fan desaparecer as cousas en menos do
que canta un galo.
A parella, ante a confianza que
desprendía o Ramuín na conversa, comezou a portarse dunha
maneira amable, moi lexos de aquela aptitude xardesca que
amosaran o principio, así dicíanlle:
-Bon, non pense que a operación de
facer desaparecer as bolsas de café, pois ese é o material que
guindamos polas fiestras, non ten o seu traballo, do que vostede
tan só viu a parte final, pero ata chegar eiquí hai un longo
camiño que recorrer.
Así o home comezou a súa
explicación depois de estirar as pernas o que lle permitía a
tarazana.
-Mire, nós temos que aproveitar
tódolos tantos e para eso valémonos de certas festas que se
celebran polo pais, aproveitando que os que tiveron unha grave
enfermidade van ofrecidos nuns ataudes que traemos de Portugal,
pero que son un pretexto para que podamos transportar o café no
doble fondo deles.
-Pero si o café arrecende o seu,
de que maneira evitaban eso -di o afiador.
-Pois empleando outro cheiro aínda
máis forte como follas de loureiro, para dese modo contrarerstar
o ulido co café.
Mentras tiña lugar a conversa
entre o Ramuín e os contrabandistas algo estaba a pasar no
vagón onde ía o Carqueixa, quen dirixindose ós guardias dixo:
-Doime a barriga, teño ganas de ir
ó escusado, xa que como vostedes enxergarán estou nervioso,
pois non sei o que van facer conmigo.
-Non debes preocuparte por eso,
pois o que che vai suceder está claro, o irche a retorcer o
gañote como outros moitos que foron caendo.
Estas palabras, dun dos gardas,
agora puxeron en verdade inquedo o Carqueixa, o que fixo que o
outro guarda, moito máis humano que o seu compañeiro, tratase
de tranquilizalo dicíndolle:
-A perdiz mentras voe non é do
cazador, así que teña confianza, e agora de seguido atenderemos
a súa petición.
Como o escusado estaba no vagón
onde ía o Ramuín, por forza tiñan que pasar diante do
compartimento onde el se atopaba.
O Carqueixa detívose e fixo un
aceno para saudar ó afiador, pero pronto empurrouno un dos
gardias dicíndolle:
-Deixe o músico de zarzuela e de
óperas e tira para diante
O Ramuín non dixo palabra e baixou
a cabeza.
Un dos gardas, unha vez que
chegaron o lugar, díxolle o escapado
-Veña, entre e faga o que teña
que facer, pero deixe a porta aberta.
-¡Home! Non me dirá vostede que
desexa ser padriño da merda xa que onde son eu así lle chaman o
que mira para o que caga.
-¡Era o que me faltaba!- berrou o
garda- malia cada vez que eu diga ¿está o paxariño? ti
deberás contestar: pío, pío.
E así estiveron durante certo
tempo que o Carqueixa aproveitaba para romper a ventá buscando
espacio para saltar, ata que o garda xa canso díxolle
-Mira, xa levamos eiquí bastante
tempo coa mesma cantinela, así que abre a porta e sae dunha
vez...
-Como vostede queira, pero xa sabe
o título que vai a ganar, así que...
-Bon, tampouco se trata de que
apande con semellante agasallo, por tanto vou deixarlle un anaco
máis para que realice as súas necesidades.
Despois da espera volveu a repetir
o garda:
-¿Está o paxariño?
E como insistía unha e outra vez
sen recibir resposta algunha, falou o compañeiro que estaba un
pouco arredado.
-Penso que o paxariño xa emprendeu
o vo.
O garda deu unha patada a porta e
puido comprobar que o Carqueixa fuxira pola ventá tal como se
propuxera, indo a caer enriba dunhas xestas que fixeron que
amainara o golpe, logo afastouse do lugar arripiolando todo o que
puido.
Os guardias mandaron para o tren e
correron detrás por ver se lle podían acadalo, pero do Carqueixa
non atoparon nin trazas, polo que dixo un dos gardas:
-Pouco importa que corramos, o
Carqueixa está no seu mundo onde se defende como peixe na auga.
-Pero senón corremos a xente que
nos está a mirar dirá que somos uns inútiles.
Así o fixeron, pero sen resultado
algún, por tanto decidiron volver ó tren e mandaron que
arrancase de novo, indo a sentarse no compartimento onde viaxaba
o Ramuín con grande abraio da parella que temía que foran
descubertos. O mesmo tempo que os gardas limpaban a suor das
súas frontes arfaban profundamente a consecuencia da percorrida
que viñan de dar. E dirixíndose ó Ramuín dixo un deles:
-Toque vostede o que queira, tempo
imos ter, xa que que o noso cometido xa rematou, teremos que
volver a aldea empurrar o arado, pois eso é o que nos espera
como consecuencia do noso fracaso.
E despois de dicir esto un dos
gardas notou un forte ulido a café polo que dixo:
-¡Vaites! ¡Vaites! Así que
tamén hai eiquí contrabandistas.
-Como viran que tanto o home como a
compañeira se inquedaban ó ser descubertos, tranquilizounos o
outro garda.
-Non teñen porque preocuparse, nós
xa polo pouco tempo que nos queda, non imos denuncialos, por
tanto acouguen.
A fin sen máis novidades que
reseñar, o Ramuín chegou a Irún, onde xa escarmentado polo que
lle pasara, esta vez facturou a Pepa.