v2camilogonsardesfeita016.html
A miña
viaxe de volta transcorreu normalmente. Quero dicir, sen ningún
Barbas, nin ningún Muíños, por exemplo, para amenizala.
Detereime nela só brevemente.
Ao comezo da viaxe houbo un pequeno
incidente lingüístico, por dicilo dalgún xeito, que me chamou
a atención. Eu acababa de experimentar na Vila algo do caos lingüístico
imperante no País. Algúns, como Zhivago, ou como Aser, ou como
o pálido dono do pastor alemán, negábanse por principio a usar
nin unha soa palabra galega (o que non significa, desde logo, que
fose o castelán propiamente dito o que falaban; aínda que si,
indubidablemente, o que querían falar). Outros, os menos, como
Nestor, esforzábanse en pasar de cando en cando ao galego, para
seguir a corrente. Outros, como Lier ou Plastiras, falaban
habitualmente en galego, pero con conciencia, parecíame, un
tanto anómala; falábano, en parte, como para resultar máis
populares, ou como para demostrar que non tiñan inconveniente en
falalo; pero sempre dando por descontado que o "normal"
era, sen dúbida, o castelán, e que eles sabían ser
perfectamente normais cando o xulgaban oportuno. O Barbas, e o
Fangio, e Merdaseca, e Cabude, e Muíños, expresábanse en
galego, en cambio, con toda naturalidade, sen ningunha clase de
reservas. Todo isto, desde logo, sen ter en conta casos máis
complexos, non comprendidos nos experimentados por min na Vila,
como a Babel da euroemigración -por exemplo, pais sabendo só e
malamente o galego con fillos de expresión holandesa e sobriños
angloparlantes.
Pois ben: ao principio da viaxe, no
autobús, un pai faláballe en galego, preto do meu asento, a un
fillo de poucos anos. Sorprendeume agradablemente. É ben sabido
que, polo xeral, os pais galego-falantes non queren falarlles en
galego aos fillos. Así que a conversa entre aquel pai e aquel
fillo discorría cunha liberdade, cunha soltura, que, aínda que
pareza mentira, eran realmente insólitas no país en casos
semellantes. Pero, de repente, outro paisano, xa de máis idade,
sentado detrás deles, advertiulle nun ton de reproche ao pai en
cuestión:
-Non lle fale en galego ao pequeno.
O pai non respondeu nada.
-Non lle fale en galego, fágame
caso, que é malo para o pequeno -teimou o paisano pedagogo.
Penso que o pai non lle volveu
falar ao pequeno, nin en galego, nin de ningún outro xeito.
Penso que non lle volveu falar en nada durante o resto da viaxe.
O periódico provincial que
comprara na Vila proporcionoume algo de interesante lectura
durante a longa viaxe. Lin a noticia sobre a inauguración
solemne, con presencia de autoridades, nunha vila veciña, dunha nueva
industria: tratábase dun "pub" instalado con
todos los adelantos. O único que viña en galego en todo o
xornal era un comunicado de protesta política, parcialmente
reproducido. Que espléndido -desde un punto de vista
cuantitativo- florecemento do galego -ou do neo-galego- en
panfletos, bandos de alcaldía, libros de texto, pancartas de
manifestacións, pintadas nas paredes, libros de actas. Lin logo
un lúcido artículo animándonos a todos a "potenciar"
os valores gastronómicos da provincia como medio para atraer o
turismo, tanto nacional, como internacional; e unha crónica dun
corresponsal local, que empezaba así: En estos tiempos de la
democracia que hoy tanto está de moda (...) Porque, sen dúbida,
a democracia era só iso, unha moda, fuxidía coma tódalas
modas; e o noso, o único que nos acaía a nós, era deixármonos
mandar sen protesta polos que realmente deben mandar e polos que
nunca deberon deixar de mandar. Non faltaba a noticia dunha
manifestación cos pareados de costume: Equis dimite-el
pueblo no te admite, equis escucha-el pueblo está en lucha
-porque a poética popular debe ir en consonancia cos tempos, e o
progreso é o progreso, e non imos poñérmonos a cantar agora,
como se estivésemos en plena noite medieval, o romance de Don
Gaiferos, (¿Onde vai aquil romeiro - meu romeiro a donde irá?).
Mentres tanto -viña tamén no periódico-
veciños da que ata agora fora unha das nosas montañas máis
inaccesibles e ailladas enfrontábanse coa sociedade, con capital
canadiense e surafricano, que se establecera alí, non para
axudalos, naturalmente, senón para sacar concentrados de zinc e
chumbo.
Durante algún tempo, tiven sentado
á miña beira a un tratante de gando que ía para a feira de non
sei onde. Falamos dun cacique moi famoso. ¿Por que se metería
en política se xa tiña todo canto diñeiro podía querer? ¿Por
que se metería en política en vez de disfrutar tranquilamente
da súa riqueza? Este era un misterio impenetrable para o
tratante. Porque aquela pregunta el formulábaa sen sombra de
ironía. Era evidente que, para el, "meterse en política"
soamente estaba xustificado se un non era rico e quería selo.
Aceptaba isto como unha lei natural.
Durante o camiño pasabamos a miúdo
por inhóspitos bosques de piñeiros intrusos, cando non de
eucaliptos. Nas cunetas ou gabias das estradas sucedíanse montóns
de lixo con predominio do plástico. ¡Lástima dos vellos
legoeiros!
Polo demais, a paisaxe aparecía
toda destragada pola carne viva de aqueles ladrillos rechinantes,
presentes mesmo nas mínimas aldeas; pero con máis abundancia,
desde logo, nas numerosas vilas edificadas a unha e outra beira
da estrada, e nas cidades. Vilas e cidades, non fai falta dicilo,
con estafermos de só dez ou quince anos xa de aspecto ruinoso, e
con montóns de varredura case tan vellos coma os propios
estafermos, e con quilómetros de aceras que levaban máis de
corenta anos agardando a ser construídas (¿non dicía aquel
profesor de Dereito que os tributos en Roma comenzaran por no
existir?).
De vez en cando, aparecían
cemiterios de coches ou enormes, aparatosas edificacións que non
eran fábricas, senón discotecas -Monday, Chelsea,
"Tiffanis" (sic), etc.
A derradeira parte da viaxe fíxena,
xa de noite, cun mariñeiro que navegara durante quince anos nun
barco noruegués. Faloume de Fredrikstad, de Bergen, de
Sandefjord, de Oslo, dos camaróns que se vendían baratísimos
desde os barcos nos peiraos xunto da R(dhusplassen -el mesmo
pronunciou debidamente estes nomes propios, porque aprendera a
lingua dos seus patrons-, da neve derretida que baixaba desde as
montañas aos fiordos.
Supoñía que, a tales horas, a
denuncia de Dª Lidia M. F., neta nada menos que de quen era
neta, estaría xa feliz e definitivamente "parada" por
Nestor. Do Barbas e Fangio aínda non terían, probablemente,
noticias na Vila. Seguramente o primeiro xa non andaría en
"panos menores"; pero o segundo seguiría lucindo o
letreiro de Kentucky University. Tampouco se sabería, pois, se
finalmente Fangio gañara o desafío, xa que non a aposta; se
dera feito a viaxe ata o Uruguay en menos de vinte minutos. Pero,
polo menos, non se oíra falar de ningún accidente. Lier contárame
as últimas palabras do Barbas, xa a punto de meterse no coche.
-Cando digo que hai "platillo
volante", hai "platillo volante"; e cando digo que
hai terremoto, hai terremoto.
-¡Terremoto! -exclamaba Fangio
escandalizado, rindo ás gargalladas-. Pero ¿que terremoto
houbo, quéresme dicir?
-Aínda estamos a tempo. E, se non
o hai, xa me encargarei eu de facelo -rematou o Barbas
solemnemente.
CAPITULO XXI
PASEOS EPILOGAIS CON D. ISAURO |
Vas
pola acera e, cada tres pasos, unha longa parada. Arrincas de
novo; outros tres pasos e nova parada, ¿non é esgotador?
-¿Como era o apelido...?
-Do apelido non me acordo. Non o
sei: pode que nin mo dixera. É un tipo como de corenta e poucos
anos, pálido, con entradas moi fondas. Vestido coma de dandy. E,
xa digo, sempre falando de pistolas de nove largo e de cans
pastores alemáns.
-Ha ser ese.
Era polo mediodía, case á hora de
xantar. D. Isauro e mais eu chegaramos, neste paseo, ben máis
lonxe que outras veces. O tráfico, despois da avalancha
subseguinte ao cerre de comercios e oficinas, tornárase algo máis
lixeiro. De vez en cando, pasaban aínda pequenos de ritmo lento
de volta dos colexios, coas enormes carteiras. O sol, máis de
primavera serodia que de outono, pegaba con forza. O clima era
aquí moito máis benigno que na Vila.
-Ha ser ese -repetiu D. Isauro.
Agora estaba parado. Tamén eu,
claro é.
-Xa ves ti. Ese rapaz, sempre no
Frente de Xuventudes, ¿non se chamaba así? En cambio, o pai, o
pobre Salvador, foi un dos que mataron por sorteo.
-¿Por sorteo?
-Por sorteo -corroborou D. Isauro.
D. Isauro quedou mirando para min.
Era algo que soía facer, certamente; pero agora pareceume unha
mirada como de firmeza ante a miña posible incredulidade ou ante
o meu asombro. Anque, a dicir verdade, máis que incredulidade ou
asombro, o que había en min agora -como en moitos outros
momentos das miñas conversas con D. Isauro- era incomprensión.
Malia que non era a primeira vez tampouco que oíra falar de
aqueles sinistros sorteos.
-Pero, ¿onde foi o sorteo?
-Alí mesmo, supoño.
Resposta que me deixaba na mesma
confusión en que estaba.
-Pero, ¿como o fixeron?
-Boeno, eu non sei como o fixeron.
"Eles" tiñan unha chea de presos republicanos. E ao
que lle tocaba en cada sorteo, sacábano fóra da prisión para
pegarlle un par de tiros. Despois podía aparecer tirado en
calquera cuneta.
-¿Foi no trinta e seis?
-Pois sería no trinta e seis,
claro -contestoume D. Isauro coa inseguridade que lle daba o ser
consciente de que a súa memoria xa non estaba para datas.
Camiñabamos de novo, evitando como
podiamos os excrementos de can. D. Isauro ía caviloso, quizais
un tanto sombrío. Aínda non mercara o periódico; con
seguridade, non o había mercar ata a tarde.
-Así que xa ves. A vida éche así.
Eche unha verdadeira coña. Cantos fillos de republicanos saíron
falanxistas fanáticos. E ao revés. Os netos do Camarada, dixéronme
que están todos en partidos de esquerda... pero da esquerda máis
violenta; máis aló do partido comunista. E iso que teñen un
pai ben rico. Dono hoxe, como xa che contei, de moitas das terras
de... de...
Eu acudín en axuda da súa
memoria.
-Si, xa me contou: do pai do
Barbas.
Pero D. Isauro non quedou
satisfeito coa miña axuda. Ao contrario do que me acontecía a
min, para el o importante era o pai, e o fillo só unha anécdota
case despreciable. A parte de que o nome de "Barbas"
case nin lle soaba; así que seguiu esforzándose en sacar á luz
aquel outro nome que se lle resistía (desta vez, eu non lle
emprestei axuda ningunha, porque non me enteirei ben de que era o
que realmente quería sacar á luz ata que pronunciou o nome);
por fin, os seus esforzos triunfaron:
-D. Uxío. D. Uxío de Sanmamede.
Logo, pasou de novo ao fillo do
Camarada ou, dito de outro xeito: ao pai dos rapaces
ultraesquerdistas:
-Apropiouse de fincas de D. Uxío a
base de préstamos. D. Uxío sempre estaba pedíndolle cartos.
Para xogalos, claro. El dáballe os préstamos sobre as súas
fincas.
Xa mo contara. Xa falaramos, en
realidade, de todo o relativo ao meu rápido paso pola Vila. É
dicir, de todo o que xulguei oportuno falar. Mesmo de Ventura, o
primo autoenclaustrado de Nestor. Por certo que, ao mencionalo
eu, D. Isauro dixera: Pero "ese" ¿aínda vive?
De todas maneiras, había persoas e
asuntos que, por diversas razóns, eu pasara por alto. Por
exemplo: Plastiras, Fangio, a historia da mesa de mármore e a do
"platillo volante", a traxedia fluvial do seu curmán
Zhivago. Aínda que de este, por raro que pareza, case nada lle
contara a D. Isauro. E, a verdade sexa dita de novo, D. Isauro a
penas se interesara polo Dr. Zhivago.
O que aínda non me comunicara D.
Isauro era o que agregou a continuación:
-O Lier fixo outro tanto nos últimos
anos de D. Uxío.
-¿Lier? -preguntei .
-Lier. ¿Non o sabías?
E logo, unha nova noticia sobre
Lier ou, mellor dito, a mesma noticia ampliada. D. Isauro
comentou:
-Lier é dos que máis se adicou á
especulación.
Fixo unha pausa.
-Pero non á especulación filosófica,
¿eh? -advertiume intimamente divertido polo seu propio chiste-.
Falo da especulación de terreos.
Seguramente era un chiste que el
gustaba de repetir sempre que se lle presentaba ocasión.
Agora fun eu o que, non sei ben por
que, cambiou de asunto, para reincidir no inmediatamente
anterior. Empecei a preguntar:
-¿E os netos do Camarada...?
Pero D. Isauro interrompeume:
-Xa che digo, rapaces
ultracomunistas, se é que se pode dicir esta palabra.
Seguramente, a experiencia do seu
propio fillo dáballe a D. Isauro unha sensibilidade especial
para aquel tipo de rupturas político-ideolóxicas nas familias.
Xa que, directa ou indirectamente,
falara das extremas dereita e esquerda, pensei que era boa
oportunidade para lembrar a un personaxe do que tampouco
trataramos aínda:
-Vde. seguramente ten que coñecer
a un tal Luís da Costa... Un que marchou para Caracas e non se
volveu saber máis nada del.
-Ese estaba guillado -contestoume
D. Isauro, rápido e despectivo-. Pero non era nin moito menos
coma o tío. Pepe si que era criminal. O Virollo.
-¿O Virollo era tío de...?
-Claro que non tiña el toda a
culpa. A el dirixíano desde a Coveira. Cando foi ao Ateneo a
matar ao pobre Rombao xa saíra da Coveira medio pimplado. Preparárano
ben alí. O pobre do Souto interpúxose, e o Pepe matouno tamén.
Todo isto que che conto foi xa pouco antes de estalar o
Movemento.
Fixo unha pausa. Logo seguiu:
-O enterro do Rombao estaba cheo de
republicanos. Eran do Frente Popular. Antes de abandonar o
cemiterio cantaron a Internacional. Despois do enterro quixeron
plantar lume á casa dos da Costa. Que, por certo, hoxe está en
ruínas, non sei se a viches. Se non é por Felipe Pazos, que os
convenceu de que non o fixeran... Botoulles diante da casa unha
arenga tremenda, unha "filípica", como dicía eu... Se
non é polo Felipe, queiman a casa. Felipe Pazos, o pobre Felipe,
era de D. Manuel Azaña. De Izquierda Republicana. Unha belísima
persoa; moi amigo meu. Acabaron fusilándoo tamén.
-¿E que foi do Pepe da Costa, do
Virollo?
-"Ese" creo que acabou
suicidándose. Non sei onde, pero parece que acabou suicidándose.
Logo, entre sarcástico e feliz, D.
Isauro comentou:
-É o mellor que puido facer.
D. Isauro engadiu:
-Pero a min, aínda máis noxo que
o Virollo, deumo o caso dun cuñado del, o Gumersindo. Non era da
Vila, viñera non sei se de Madrid e puxera na Vila unha reloxería.
Despois da guerra marchou para Madrid outra vez e non sei o que
foi del. Pero ao que ía. Matar, non matou a ninguén, esa é
pura verdade. Dese delito está limpo. Pero non se perdía unha
execución. Era, ¿como diría eu?, o seu pasatempo favorito. E
sempre voltaba das execucións maravillado. Sempre contando o
emocionantes que foran, o bonitas que foran. Anque as víctimas
tiveran sido amigos del, coma o Felipe Pazos. O caso é que na
Vila acabou perdendo tódalas amistades, eu penso que con razón.
Vamos, iso paréceme a min.
Camiñamos uns pasos calados.
Despois D. Isauro díxome:
-¿Así que viches ao Aser?
-No Ateneo. Estaba no Ateneo, pola
noite, bebendo whisky.
-Sempre foi o amigo máis íntimo
do meu fillo na Vila. É unha pena. Ten o fígado desfeito, e xa
ves. Non para de beber. Whisky, ou coñac, ou ron, ou o que sexa.
Pero que lle vas facer. Cada un é libre de matarse como lle veña
en gana.
Pareceume que falara, por unha
parte, con certo ton de distancia, porque, no fondo, tería
preferido para o seu fillo un amigo íntimo diferente e, por
outra parte, con sentimento, porque ,despois de todo,
"era" o amigo íntimo do seu fillo. Ao mesmo tempo, eu
ía comprobando como, ao volver a persoas e asuntos dos que xa
trataramos, D. Isauro revelábame datos novos, ás veces de máis
interese que os que me dera a coñecer antes.
Tendo en conta esta circunstancia,
pregunteille:
-¿Está seguro logo de que Lier
viviu case sempre na Vila?
-¿Lier? Pois eu penso que sempre.
Eu fun amigo do pai. Pola aldea ían de cando en cando; pero o
que se di vivir, nunca viviron na aldea.
En certa maneira, eu estaba
perplexo pola relativa claridade con que aquela mañá -aquel
mediodía- estaba funcionando D. Isauro. Ás veces, como neste
caso, contestaba nun estilo irreprochablemente axustado á
pregunta.
-¿E Nestor?
-¿Nestor? -repetiu D. Isauro.
-Si. ¿É certo que viviu case
sempre en Mallorca, como me dixo Lier?
-Boeno... Nestor marcharía para
Mallorca polo cincuenta e tantos.
-¿E antes de marchar para
Mallorca? ¿Vivía de ordinario na Vila?
-Claro.
-¿De pequeno tamén? ¿E de mozo?
-Claro. Sempre.
D. Isauro estaba estrañado de que
eu puidera ter tantas dúbidas sobre aquel punto. Notábase ben
que estaba estrañado.
-É que me dixo Lier...-ía
repetir, mais novamente agora fun interrompido por D. Isauro.
-Lier coñéceo ben -afirmou-.
Vendeulle moitas fincas. Era coma o seu axente na Vila.
Non lle vendera "todas"
as fincas. Pero si moitas. E había rúas enteiras de casas
edificadas sobre antigas propiedades de Nestor.
-É que Lier díxome que Nestor
vivira case sempre en Mallorca, xa desde pequeno -puiden dicir
finalmente, sen interrupcions de D. Isauro
E D. Isauro, pola súa banda,
repetiu:
-Lier coñécecho ben.
Naturalmente, eu seguía sen saber
que era o que quería dicir exactamente D. Isauro con aquilo de
que Lier o coñecía ben. En consecuencia, acordei formularlle a
miña pregunta unha vez máis, pero agora nun estilo máis enérxico:
-Entón, ¿é certo ou non é que
Nestor viviu sempre en Mallorca?
-Nestor marchou a vivir a Mallorca
no ano cincuenta e tantos -insistiu D. Isauro-. Mellor dito,
primeiro pasou uns anos vivindo en Alicante, e despois foi cando
se trasladou a Mallorca.
-¿E antes? Antes de vivir en
Mallorca, quero dicir. ¿Vivira sempre na Vila?
-Na Vila. Claro. Nestor sempre
viviu na Vila.
Contestoume como se á súa vez
preguntase: ¿Onde ía vivir se non?
Eu calei. D. Isauro, tras dunha
pausa, recolleu o tema da fortuna de Nestor.
-Ademais de herdar toda a fortuna
do pai, foi tamén herdeiro único do seu curmán, Miguel Anxel.
Nova noticia sorpresiva para min.
-¿Miguel Ánxel era curmán de
Nestor? ¿Ó que mataron cando ...?
-O pai de Nestor, D. Ernesto Torre,
o vello cacique, que nacera e vivira nas Filipinas e o pai de
Miguel Ánxel, eran irmáns. Boeno -rectificou D. Isauro-, chámolle
vello cacique, pero eu penso que D. Ernesto empezou a exercer de
cacique despois de 1908. Tivo que desbancar a outros caciques máis
antigos ca el.
Miguel Ánxel era solteiro e fillo
único, seguiu informándome D. Isauro. De maneira que, ao el
morrer, Nestor, tamén fillo único, e solteiro de aquela,
heredara tamén a súa fortuna.
-¿En que ano o mataron, a Miguel
Anxel?
Arrepentinme da pregunta
inmediatamente despois de tela feito. Era abusar da memoria de D.
Isauro, pensei. Xa sabía que era particularmente refractaria ás
datas.
-Pois sería no trinta e oito, ou
no trinta e sete -dixo sen a menor seguridade.
Cando estaba malferido, botando o
sangue polo ventre, o único que lles pedía aos amigos da
Coveira que acudiran a socorrelo, e que o deitaran nun sofá,
dentro da propia Coveira -eran as tantas da noite-, era que lle
puxesen un pito na boca, para darlle unha chupada.
-¿E non se sabe por que o mataron?
Lembrábame de terlle feito a D.
Isauro esta mesma pregunta a vez anterior. E D. Isauro
respondeume exactamente como me respondera a vez anterior a outra
pregunta miña sobre o Camarada:
-Líos entre "eles"
-dixo.
Pero, seguidamente, deume máis
información:
-El "sabía" moito.
"Sabía" demasiado. Tivera un posto importantísimo. Un
posto de máxima confianza entre os que dirixían de aquela o
Movemento en toda España.
-¿Xa non o tiña?
-Xa non o tiña. Estaba medio
castigado. Non sei por que. Confinado na Vila. Líos entre
"eles" -repetiu.
De repente, atopámonos con que un
camión nos interrompía o paso. Estaba atravesado na acera por
causa dunha obra, un sinistro estafermo que empezaran a erguer
rapidamente xusto na última posibilidade -no último solar- que
lle quedaba á rúa para contar, polo menos, cun pequeno espacio
aberto, unha mísera praza, un diminuto xardín.
Pero aquel desastre era aceptado
sen protesta. Ou, mellor dito, non se vía o desastre. Víase o
desastre como un paso cara adiante, cara á grandeza, cara ao
modelo erroneamente imaxinado -calquera capital civilizada,
Londres, Paris, New York, por exemplo. Este era o grande calexón
sen saída. A xente non se decataba de que o que se daba era
outro paso atrás; de que a ex-cidade equivalía xa máis ou
menos a: tódalas incomodidades de Londres etc., multiplicadas
por cen mil; menos todas, menos absolutamente todas as evidentes
avantaxes das grandes -e non só en sentido cuantitaivo-
capitais.
Nunha das paredes da obra lin: Matar
rojos es un deporte. E noutra parede, na acera de enfronte: Eleccións
= farsa. Non votes. E aínda noutra: Galegos non
votar-que nos volven engañar.
D. Isauro e mais eu demos volta.
-Moitas burradas, moitas salvaxadas
se fixeron naqueles tempos -comentou D. Isauro agora, como referíndose
a tempos moi remotos.
Entón foi cando a min se me
ocorreu comunicarlle o meu fracaso, por se, en realidade, D.
Isauro sabía tamén do asasinato do Perito de Guitián máis do
que ata o entón aparentara saber, e se decidía a poñer algo da
súa parte para compensar minimamente a total ausencia de
resultados que traía da Vila.
-O que non atopei na Vila -díxenlle-
foi a ninguén que puidese darme informes sobre o asasinato do
Perito de Guitián.
D. Isauro parou en seco. Mirou para
min. Non sei se agora os seus ollos verdes acochados nas gafas
brillaban intimamente divertidos.
-¿Sabes quen é o único que che
podía contar todo?
-¿Quen?
Puxo unha man arredor da boca como
para evitar que a súa voz se espallase e chegase a oídos
indesexados, en vez de ir única e exclusivamente aos meus. Logo,
achegou a man así colocada, máis ou menos en forma de tubo, ata
a miña orella. E díxome en secreto:
-Nestor.
Afastou rapidamente a cara da miña
orella, e quedou cun sorriso enigmático, satisfeito e irónico.
-Pero non se che ocorra
preguntarlle nada -advertiume de seguida, poñendo un xesto como
se quixese dicirme: ¡Moita precaución!
De todas maneiras, agora xa falara
coa súa voz normal.
-El sábeo todo e mais ninguén llo
contou -agregou en voz un pouco máis baixa.
Eu seguía calado.
-Pero ¡non vaias preguntarlle
nada, moito coidado con preguntarlle nada! -repetía D. Isauro,
insondable como nunca.
Só se me ocorreu esta estúpida
pregunta:
-Pero, ¿non era aínda moi novo?
-Novo, claro que era novo. Hai esa
grande atenuante.
Non se me ocorreu dicir máis nada.
Non comprendía nada. O meu desconcerto era xa irresoluble.
Pasou, baixa, unha avioneta,
despregando na cola un anuncio comercial.
Demos uns cantos pasos máis en
silencio. Por fin, D. Isauro preguntoume:
-¿E que tal tempo quedaba por aló?
Máis fresco que aquí, ¿non?
-Máis fresco.
Novos pasos, agora xa, supoñía
eu, directamente encamiñados ao portal da casa de D. Isauro.
-Oíches, ¿canto pagas ti, se non
é indiscreción preguntalo, polos gastos comúns do teu
edificio: ascensor, porteiro, limpeza das escaleiras, todo iso?
Se non é indiscreción.
-Boeno... Eu penso que sobre catro
mil -contestei mecanicamente.
D. Isauro parou.
-Pois eu pago máis de sete mil. ¿Non
é unha barbaridade? A min paréceme un abuso, francamente. Eu,
se dependera de min namais, vendía o piso. Sete mil pesetas
mensuais. ¿Non é unha barbaridade?
Eu asentía coa cabeza. Pero, en
realidade, non pensaba no abuso, nas sete mil pesetas pagadas
mensualmente por D. Isauro por gastos de comunidade.
Pensaba en que, na miña próxima
visita á Vila, máis me valía esquecerme definitivamente do
Perito de Guitián, e deixarme levar polos prudentes consellos do
sabio e suave Lier, e ir con el pola noite ao Ateneo (era de supoñer
que, desta vez, non houbese ningún incidente especial, ningún síntoma
de terremoto, ningún suicidio), para limitarme a falar con Deus,
o secretario do Xulgado, dos arcanos do Camiño Francés.