BVG     Atrás    Índice de Páxinas

Polos arrabaldes do mundo ven
voando
soando
zoando
unha vella palleta.
Detrás da palleta
             mollados
           engurrados
          requeimados
uns beizos que se erguen.
Detrás dos beizos
                dorido
              encollido
            envellecido
un home que se albisca:
                                                 Galego Spirituals.

Non precisan de ti Leuter Enésimo
a túa palleta
a túa vella gorxa
os teus beizos refollados
polo amor e a nortada.
Son as túas mans:
                                       10 dedos
                                       20 e tantos artellos e 10 unllas
                                       2 pulsos
                                       unhas ducias de veas
                                       algún músculo e ósos
                                       xa case que apresos
o que queren de ti
en Düsseldorf
en Bilbo
ou Basilea.

Polos arrabaldes do mundo veñen
zoando
engurrados
doridos
unha vella palleta
uns beizos
e un home que se albisca dondamente
ciscando a súa xenreira no bulleiro:
                                                 Galego Spirituals

© 2006 Biblioteca Virtual Galega