v2vitorvaqueiroxeneraisdeafrica003.html
8 de xullo, segunda feira
Como todos os días, desde que me
decatei da súa presenza o día 2 do mes que andamos, hoxe chegou
exactamente ás 9,45. Vin o seu carro, un modelo luxoso de
Citroën, cor verde escura, avanzando ronceiro desde a rúa de
Tomás A. Alonso. Ao ultrapasar a curva puxo o pisca-pisca e
arrumou o vehículo, con notábel desteridade, entre o Renault
Space verde -cuxo dono, xogaría o pescozo, é narcotraficante:
na cidade buliga, malfadadamente, esta praga sinistra- e o Ibiza
vermello, que me é descoñecido, ateigado de autocolantes co
símbolo GZ. Ao cabo, a viatura ficou detida baixo a miña
xanela. Desde o meu punto de observación eu espreitaba todos os
seus movementos. Puxou para acima a alavanca do freo, virouse,
tirou dunha carteira, que se achaba no asento traseiro, unha
revista de fotografías e, despois de verificar algún pequeno
axuste sobre os mandos da radio, folleouna con mans abandonadas,
sen vontade, como se simplemente desexara que transcorrera o
tempo. Como sempre ás dez en punto, puxo en marcha de novo o
automóbil e perdeuse no trafego da mañá, cara a Alameda de
Bouzas.
9 de xullo, terza feira
Hoxe -eu mexíame no desasosego
provocado polo seu retraso- chegou ás 9,56, o automóbil
circulando máis rápido do que de costume. Unha das
características basilares das cidades contemporáneas é que
nelas pervagan peóns e viaturas que posúen de máis a máis
presa e que avanzan de máis a máis vagar, dificultosamente, na
soidade multitudinaria, con aparencia de seres sen materia. Desde
a fiestra, ollando por unha fírgoa que astuciosamente
construíra entre os cortinados, puiden ollar os seus pantalóns
vaqueiros, a camisola branca, os brazos morenados, un pequeno
reloxio no seu pulso esquerdo. Mal arrumara o coche cando prendeu
un cigarro, que se mexía entre unhas mans que delataban anguria
ou nerviosismo, e que tirara dun pacote azul e letras brancas,
ou, se callar, branco e letras azuis, non me acorda xa o dado.
Non puxo, o cal me confirmou as miñas impresións sobre o seu
estado de ánimo, o freo de man, nin acendeu a radio. Deu só
catro chupadas e, subitaneamente, como se lembrase algo, apagou o
cigarro e colleu o roteiro da Alameda.
10 de xullo, cuarta feira
Cúmprese o sétimo día -o sábado
e domingo non veu- e, por primeira vez, na súa indumentaria non
figura o pantalón. Probabelmente a posición normal da
condución, xunto co reiterado movemento dos pés que o cambio de
marchas esixe, fixeron que a saia se soerguese un palmo por riba
dos xoellos. Situou o seu carro case na vertical da miña xanela,
remaneceu inmóbil despois de desligar o motor e sospeitei que os
seus pes ficaran pousados, estáticos, sobre os pedais do freo e
a embraiaxe. Desde o primeiro andar no que se acha situada a
miña vivenda puiden ver o conxunto formado polas sandalias,
desde as que se elevaban unhas pernas delgadas que unha saia
cubría deficientemente e baixo a que se mergullaba unha chambra.
Todo ese conxunto harmónico -sandalias, coxas, saia, chambra-
estaba constituído por unha única gama composta por diferentes
tonalidades de cores atabacadas. Apoiou as mans no volante e
tamborilou sobre el con dozura, dunha maneira arrítmica, como se
a súa mente estivese a lembrar, ou a tentar lembrar, algunha
melodía esquecida no tempo e na memoria. Despois dalgúns
minutos, deitou as palmas esticadas sobre os seus xoellos e
fíxoas escorregar con vagareza en dirección ás virillas. Con
este movemento, a saia ergueuse lixeiramente. De súpeto, como se
sospeitase que alguén a observaba, baixou a saia e comezou un
aceno, tentando ollar cara acima. Eu, instintivamente, recuei,
sen darlle vista a face, cousa da que agora me laio. Fiquei tras
dos cortinados, ampeando, e pouco tempo máis tarde escoitei o
acendido do motor e como se perdía na lonxura.
11 de xullo, quinta feira
Esta noite a miña mente tencionou
usurpar as funcións da realidade soñando coa muller da viatura
que, con puntualidade rigorosa, chega diariamente ao pé da miña
casa e cuxa face, até o de hoxe, resulta inaccesíbel para os
meus ollos. Nos espazos oníricos que eu fabricara desfilaron
representacións de máscaras que identifiquei sucesivamente con
exemplares procedentes de entroidos venecianos, do xamanista da
taiga, da ópera chinesa, da traxedia grega, do irrio peliqueiro
e dalgunhas sobrecolledoras creacións de Laxeiro. Máis tarde
sucedéronse imaxes arreguizantes de figuras de rostros
esgazados, de caveiras medoñas e sorrintes que se multiplicaban
en gargalladas cíclicas e que se esparexeron até as horas da
vixilia baixo forma de espíritos, de entes inconcebíbeis, como
un delirium tremens obstinado e, desde o interior do pesadelo,
reflectín en Conímbriga e, outra vez, nas caveiras. O soño
presentaba unha estrutura reiterativa: a muller do carro
consumaba o aceno que comezara onte -cando eu recuei a me agachar
detrás dos cortinados- e, no rectángulo constituído polo vidro
do parabrisas, aparecía un ricto paralítico concretado en
caveiras ou máscaras monstruosas, xa que non era humana a súa
face.
12 de xullo, sexta feira
Como diariamente, aproveitando a
regandixa entre os dous cortinados, estou á espreita dos
movementos da muller do Citroën, actitude que vai xerando
paseniñamente no meu interior unha sensación de entremetemento
polo labor de esculca que a diario exercito na súa intimidade.
Este entremetemento vaise, aliás, afortalando con doses a cada
máis crecentes de complexo de culpabilidade, pois de certo ela
ignora -iso acredito, alomenos- a miña actividade, que acho se
podería cualificar de indigna, pois implica a penetración
-aborrezo este termo, mais non se me ocorre outro máis axeitado-
sen o seu consentimento, nun espazo que, con certeza, ela desexa
que fique no segredo. Porén, malia tentalo, non podo evitar que
o seu rostro -quero dicir, en realidade, a hipótese de chegar a
coñecelo- exerza sobre min unha forza de atracción
irresistíbel e estea a mudar nunha expectativa desacougante,
que, nomeadamente nas últimas xornadas, de maneira case
ininterrompida, me devora as entrañas.
13 de xullo, sábado, 14,30 horas
Ao longo de toda a mañá agardei
infrutuosamente a súa chegada.
14 de xullo, domingo, 12,25 horas
Hoxe tampouco non veu. Até a
segunda feira este día domingo vaise constituír nunha espera
magoante e interminábel. Temo que xa non volte.
15 de xullo, segunda feira
A súa ausencia de onte e antonte
mergulloume na anguria. Barallei a posibilidade de xa máis nunca
vela. Á noite, reconstruíndo minudentemente os días
transcorridos desde o 4, decateime que a pasada fin de semana
tampouco non viñera. A constatación da súa ausencia na
anterior fin de semana produciume un efecto de acougo e fíxome
supor que a súa presenza en Bouzas ten a ver con actividades que
non se desenvolven en días feriados. Se callar, traballa desde
hai pouco -se así non fose, teríame decatado- nalgún lugar
viciño, xa que as horas ás que chega son compatíbeis cos
horarios de apertura de certos estabelecementos. Probabelmente
sexa a dona, ou terá un posto de responsabilidade, pois, en caso
contrario, o soldo seríalle insuficiente para satisfacer o prezo
dese carro que agora mesmo está aí, novamente baixo a miña
xanela, mentres ela, outravolta, semella que agardase, en van,
por algo, extraordinario ou non, que había de acontecer nas
vésperas das 10 horas de todos os días.
16 de xullo, terza feira
Debería deixar este posto
emboscado, loitar contra a bremanza que me desasosega, descer con
ardimento as escaleiras e ollala fronte a fronte. Non obstante,
unha sensación, descoñecida por min até o día de hoxe,
paralisa o meu corpo e todos os meus actos, pois manifesta o
feitío dun mao presentimento, dun agoiro nocente, porque temo,
sen apoio razoado debo recoñecelo, ollar unha faciana
arrepiante, na que se ache gravado o sinal inequívoco da doenza
ou da morte, da fereza imborrábel que os accidentes deixan, ou
da nódoa vitalicia producida polas dores da mente. Coido que o
soño da pasada semana non é alleo a estes meus sentimentos
aflitivos.
17 de xullo, cuarta feira
Véxoa no lugar de costume e, desde
algúns minutos -agora son as 9,59- estanse a desenvolver unha
renque de acontecementos que comezan a facer comprensíbel a
puntualidade rigorosa da muller do Citroën, así como as
ausencias de sábado e domingo. Chegou ás 9,45. Vin como abría
o bolso e como del tiraba aparellos cosméticos, encargados,
supoño, de mellorar o aspecto xeral da súa face. Vinlle as
mans, as mans recollendo habelenciosamente a máscara de pestanas
destinada a uns ollos que aínda non coñezo, as mans describindo
rotacións curtas e uniformes sobre a materia química destinada
ao empoado da face que aínda se me agacha, as mans manuseando a
barra avermellada, destinada a uns labres que eu non tiña ollado
até o día de hoxe, porque agora vexo, é a primeira vez, uns
beizos vigorosos, só uns beizos, achegándose ao espello
retrovisor, uns beizos africanos, pensei, e, subitaneamente vexo
todo con intacta clareza, e deduzo, por fin, que a muller
protagoniza cotidianamente encontros encubertos, encontros
inducidos, como todos os encontros deste xorne, pola urxencia do
sexo, promovido, á súa vez, pola urxencia do atavismo e a
soidade. Cando tomei conciencia da realidade dos feitos, o
abafallo, a envexa, os ciumes e a carraxe alagáronme
sucesivamente, porque -vouno albiscando aos poucos- a muller do
carro está a devorar algo no interior da miña mente. Agora, ao
cabo, entendo a súa ausencia as fins de semana baixo a miña
xanela, porque as datas feriadas son desfavorábeis ás xuntanzas
de amantes subrepticios.
18 de xullo, quinta feira
O meu degoiro medra co percurso dos
días. Na soidade da rúa deste alfoz impertérrito da xeografía
de Vigo que chaman o Vaticano, encontro inconcibíbel o feito da
muller arrumar o seu carro diariamente ao pé da mesma porta. A
miña mente baralla diferentes hipóteses: penso, ás veces, que
a súa actuación se acha planeada minudenciosamente, que sabe
desde sempre que moro nesta casa, que está a executar unha
vinganza ou unha provocación, até que considero que as miñas
conxecturas empatan coa demencia, e conclúo que o ritual diario
se debe, con certeza, a que os actos humanos son, un día tras
outro, costumeiros, se cadra porque a nosa bioloxía, dende hai
miles de anos, ten a pegada antiga da reincidencia, semellante á
do carro rumando, preguiceiro como sempre, camiño da Alameda, en
canto medra dentro de min o degoiro e penso neses encontros na
clandestinidade dos que eu non gozo.
19 de xullo, sexta feira
Noite tras noite vaise
incrementando o tempo de vixilia e medran as dificultades para
conseguir adormecer. O leito troca aos poucos nun cárcere
despótico, nun terreo inimigo que nin radio, nin lectura, nin
pensamentos superficiais ou fundos dan esconxurado.
Paradoxalmente, ás veces sinto o insomnio como algo semellante a
un adormecemento que se vai apoderando do meu corpo e navego en
atmosferas de irrealidade, de substancias etéreas. Outras, como
en certos relatos horroríficos, son a vítima dun pauto
demoníaco inadiábel e outras, por derradeiro, aparezo aos meus
ollos como o simple produto do soño dun ser imaxinario, salagre
e infinitamente poderoso. Non consigo tirar da miña mente os
ciumes.
22 de xullo, segunda feira
Esta fin de semana discorreu baixo
o signo dunha infelicidade apracíbel, mestura de nostalxia e
desalento, que se afastaba da anguria apavorada que me invadiu o
sábado e domingo precedentes, cando o medo me fixo cismar na
posibilidade de perder para sempre a súa presenza. Nas dúas
datas agardei na xanela estritamente os quince minutos que
sucederon ás 9,45, aínda que sabía con certeza que ela non
viría. Durante o día arreguiceime ollando algunhas fotos de
Robert Mapplethorpe, percorrín con abraio certas páxinas de
Blanco-Amor e Shakespeare, pervaguei reportaxes televisivas sobre
a anódina fauna da chaira de Mongolia e a senlleira violencia
dos indios ianomami e sentín un arrandeo acendido perante
algunhas cenas de Adeus á miña concubina, de Chen
Kaige, que puñan de reestrea nos Multicines Centro. Coido que
debería escribir un poema, ou un relato brevísimo, sobre a
morte do soberano chou.
23 de xullo, terza feira, 15,00 horas
Ás veces, a conciencia fica cega
por unha turbazón irrazoábel da que descoñecemos a xénese.
Coido que ese sentimento, o de cegueira, foi o que me alagou
desde o día 17, cando adquirín a seguranza de que a muller do
Citroën agardaba as 10 horas de todos os días para comezar os
seus encontros furtivos. Sen embargo, olladas con frialdade as
circunstancias que concorren nos seus actos diarios e as
conclusións que deles poderían tirarse, cómpre recoñecer un
grao notábel de arroutamento nas miñas avaliacións, así como
a existencia doutras hipóteses que poden explicar a súa
puntualidade rigorosa. Por iso, nesta altura acredito que existe
unha alta probabilidade de que a muller veña visitar un doente e
que agarde a hora clave das dez para achegarse ao fogar no que
mora a enfermidade, o cal é un dado favorábel á delicadeza que
atesoura a visitante do Citroën luxoso, respectando a intimidade
dos primeiros aseos mañaneiros e concedendo unha marxe de tempo
suficiente para as tarefas de arrumado da vivenda. Non deixo de
recoñecer que esta hipótese supón para min un elemento de
acougo e mesmo podo chegar a comprender que sexa unha
construción do meu cerebro para diminuír os ciumes e o
desasosego que sinto perante a posibilidade de que ela poida,
diariamente, xacer entre outros brazos ou noutro leito.
Debería poñerme diariamente á
espreita ás dez da mañá nalgún punto discreto da Alameda de
Bouzas e coñecer o lugar ao que se dirixe.
23 de xullo, terza feira, 22,35 horas.
Agora que posúo o convencemento,
que unha reflexión repousada me fornece, de seren falsidades
artelladas pola miña mente aluada as posíbeis reunións -ignoro
porque estiven a piques de escribir infidelidades- con propósito
de satisfacción sexual, impónseme o deber de coñecela. Mañá,
mentres agarda ao pé da miña porta, fumando o seu cigarro
cotián, achegareime e pedireille lume. Acho que é un pretexto
razoábel.
24 de xullo, cuarta feira
Achégase o carro, como todos os
días. Son as 9,46 e, no interior do meu peito, o corazón é
unha forza selvaxe que latexa perante a hipótese de, ao cabo,
coñecela. Desde hai algúns minutos considero, porén, que
talvez sexa insensata ou extravagante a estratexia de achegamento
que elaborei, baseada na petición de lume, xa que cómpre non
esquecer que saio do meu proprio fogar e, por tanto, a lóxica
ditamina que leve comigo aparellos capaces de prender un cigarro
ou, se iso non acontece, que dea volta sobre os meus proprios
pasos, ascenda a escadaría e vaia na súa procura. Emporiso,
alén do que poidan estabelecer as leis da lóxica, o meu
obxectivo basilar é a contemplación da súa face,
independentemente da racionalidade ou da absurdeza dos meus
comportamentos que, de certo, ela non avalía, porque se acha
allea -niso alomenos acredito, inda que, ás veces, a dúbida me
venza- á miña espreita diaria.
Agora vexo o carro, detido baixo a miña fiestra, mentres ela
comeza a tentar arrumalo. A súa man apóiase na alavanca do
cambio e podo abranxerlle o corpo íntegro, agás a súa face, e
ollo, con espanto, que ven vestida enteiramente de cor preta, o
cal robora, acho que de maneira definitiva, a miña crenza de que
as súas chegadas tiñan como obxectivo o encontro con alguén a
quen a vida lle fuxía do corpo con perseverante regularidade.
Arestora xa non podo tentar o achegamento, posto que a reflexión
que ten como suxeito a morte e o silencio que a estas -á
reflexión e á morte- acompañan, deben ser obrigatoriamente
respectados e ela, con certeza, agora mesmo pensará na morte.
29 de xullo, segunda feira
Como todos os anos, o vintecinco
fun a Compostela. Nesta ocasión, embora, o motivo esencial era
sinxelamente descubrir, entre a ondaxe humana, unha muller pola
que devezo. Aínda sen ter ollado nunca o seu rostro, tiven a
seguranza de que habería de recoñecela, se cadra polas mans,
pola vestimenta que ollei ao longo dos días que leva situándose
baixo a miña xanela ou polo xeito de seu de acender os cigarros.
Con este convencemento procureina nas marchas reivindicativas, no
cheiro secular das polbarías, na saída de oficios relixiosos
nos que se arboran conceptos decrebados e ofrendas caducas.
Procureina entre os espectadores que admiraban os gaiteiros do
Incio, a beleza impecábel de acibeche e de prata que lucían nas
montras, os ranchos de Melgaço, e as palabras acesas das arengas
na Praza da Quintana. Sen embargo todo foi en van, porque, de
certo, a probabilidade de ollar unha persoa concreta naquela
multitude debía ser cativa, alén do feito de eu nin tan sequera
posuír a certidume da súa presenza na cidade, e basear toda a
miña esperanza nun desexo infundado. Desexando fuxir do
desengano que a súa ausencia creara, marchei contra a tardiña
cara O Pindo, onde fiquei até a anoitecida do domingo en que
voltei a Vigo. Ao longo dos tres días, mentres a miña ollada se
espallaba na enseada do Ézaro e as miñas pernas fatigaban a
ascensión cara A Moa, reflectín no seu loito da última quinta
feira. Reflectín outravolta, nas posíbeis hipóteses que
xustificarían a súa vinda diaria a unha rúa de Bouzas.
Reflectín, finalmente, que a cor preta da súa indumentaria
podería deberse, con igual propriedade, ao loito convencional
reclamado por un falecemento, á actitude respectuosa de quen vai
practicar a confesión, ou á erótica de quen exerce o sexo
requintado que esta cor acubilla e que, con seguranza, de cor
preta serían as súas roupas íntimas, reflectín, mentres
guiaba o carro, e os meus ollos abesullaban aglaiados os areais e
as augas que se alastran entre a punta de Louro e a mariña sutil
de Caldebarcos.
30 de xullo, terza feira
Nesta altura cheguei a comprender
que me engaiola dela a súa rigorosa puntualidade, valor no que
acredito, porque na disciplina -estoume a referir á
autodisciplina- se alicerza un conxunto de nobres atributos: a
constancia, o traballo, o compromiso e -tamén- a amizade.
Engaiólame dela o seu feitío xangal e repousado, que somente
mudou o 9, terza feira, onde o seu nerviosismo se fixera
notábel. Engaiólame dela a ausencia da súa face, porque cría
dentro de min expectativas múltiples que día a día se anchean
o mesmo que un ouveo nun cavorco -esquecín a procedencia desta
frase- e engaiólanme, ao cabo, as sedas velaíñas, os liños
dos seus traxes, baixo os que adiviño, ás veces, unha pel mol e
sosegada e, outras, selvaxe e destemida. Ignoro, sen embargo, se
esta sensación que me asolaga, mentres tento avaliar o meu
enlevo cara esa muller, é o que se adoitamos chamar namoramento.
31 de Xullo, cuarta feira
Comeza a apropriarse de min o
presentimento de que xamais verei a súa faciana. Desde hai
vintenove días esa muller achégase ao pé da miña porta con
anoxante regularidade e intencións incógnitas que semellan un
reto ou unha recordación. Alemparte, xulgo notabelmente estraña
a actitude adoptada por min e que se manifesta nun comportamento
que nordean a mandria e a apatía e que ten como saída única o
refuxio na escrita. Sinto que esta actividade está a constituír
unha fuxida e, ao tempo, unha desculpa para non me enfrontar á
realidade. Infelizmente, a escrita posúe esta dupla faceta: á
escrita reputada como maquis, como arma de combate íntimo ou
colectáneo, opónselle a escrita conceptuada como bunker, como
parapeito, como torre ameada, como escudo. Como escudo: este é
hoxe, para min, o termo decisivo.
1 de agosto, quinta feira
Teño que acugular forzas para unha
ollada. Só unha longa ollada, pois carezo de azos abondos como
para poder dirixirme a ela, falarlle.
19 de agosto, segunda feira
Hai máis de dúas semanas que
deixou de vir, ficándome no espírito un acedo sabor de
desconsolo -ao non poder aturar sen dor a súa ausencia- e de
derrota pola miña covardía -ao non ser quen sequera de albiscar
o seu rostro-. Como o amor á patria, como o acto da produción
artística, como o absurdo agarimo a parentes abxectos, como o
medo á noite e á soidade, a réptis inofensivos, a roedores
efémeros e a pequenos arácnidos, como os instintos de
procreación e asasinato, en resumo, como a meirande parte dos
actos dos humanos, o namoramento é un produto da
irracionalidade. Máis aínda se o namoramento se produce sobre
unha face incógnita, actitude, sen embargo, que non é máis
absurda que a dalgúns namorados aos que somente enlean o
silencio, o costume e o fastío. Se alguén dixese que un
namoramento así é inverosímil lembraríalle a absurdeza -non
acho mellor termo- dalgúns amores que só conlevan a xenreira, o
rancor, a inimizade e, ás veces, o homicidio. Se callar, a
perspectiva que se ofrece perante dos meus ollos é o mellor
desfecho de todos os posíbeis porque así ficarei para sempre
coa lembranza imaxinada do seu rostro modélico, indestrutíbel
no percurso do tempo, aínda que, con sorpresa, vexo, neste
preciso intre, despois de tantos días, outravolta o Citroën que
chega despacioso, avanzando ronceiro, desde o cabo da rúa de
Tomás A. Alonso, que se achega á porta, que se detén ao pé da
beirarrúa, e ela desliga o motor e sae da viatura e camiña, con
paso afouto, cara a miña porta. Con pánico e abraio escoito
agora o timbre e fico inmóbil e alágame unha dúbida terríbel,
pois ignoro se debo abrir a porta e defrontarme a ela e ás
consecuencias que se derivarían deste encontro, ou quedar en
silencio e agardar que se afaste para sempre, porque dous
sentimentos simultáneos me asolagan, o da pavura infinda e o da
lene sospeita de esperanza que afirma que seriamos felices as
dúas xuntas.