A
mesma noite.
Nada do anterior existe. Unha hora escasa
despois.
Luxosa terraza dunha non menos coidada
habitación da sexta planta do Hotel Meliá. Á esquerda, o Mar
Mediterráneo; con toda a súa grandeza. Á dereita as luces da gran
cidade que se prepara para ir durmir.
Edificios. Coches. Civilización. Ruídos.
Vida.
Nada do anterior existe.
Todo o escrito é unha novela.
Non máis.
Nestes momentos non sei o que está a pasar.
Cando ti te achegas ó remate da novela, pode que a historia xa teña o
seu propio final. Quen sabe ...
Pode que o pobo saharauí ande metido nun
suicidio colectivo volvendo a unha guerra que non queren pero necesitan.
Pode que tras escuras negociacións
diplomáticas, a RASD xa estea convertida nunha provincia, nunha
autonomía, nunha federación do reino marroquí.
Pode que o Referendo xa se teña celebrado. Cun
resultado.
En calquera sentido.
Pode que ... se cadra ... quizá ... todo segue
igual. Como estaba naquel caloroso verán de mil novecentos noventa e
catro.
Tanto ten.
Todo o escrito só é unha novela.
E as novelas queren un final. Precisan dun
desenlace.
Neste caso o que eu lle queira dar.
Posiblemente, o que ti, amigo, amiga lectora
estás a argallar nestes mesmos intres.
O que o propio protagonista querería ter
escrito.
Aquel para o que nos contou a súa historia.
Aquel para o que o propio Brahim non atopou
argumentos en toda unha vida.
Nin nos fusís. Nin nos libros.
|
Enviado
especial. (Axencias. Aaiun). Fontes fidedignas informan da
celebración do Referendo de Independencia do Sahara Occidental. |
O Representante
Especial do Secretario Xeral da ONU para o Referendo do Sahara informou
onte en rolda de prensa en Aaiun dos resultados do Referendo de
Independencia do Sahara celebrado a mediados do mes pasado.
O Sr. Martell, acompañado do Presidente da
RASD e do recente nomeado Embaixador de Marrocos no Sahara, anunciou que
dun corpo de votantes de 104.778 pasaron polas urnas distribuídas nas
principais cidades do Sahara un total 104.765 persoas. Segundo
responsables da MINURSO (Misión da ONU para o Referendo do Sahara
Occidental) non houbo que lamentar incidentes de importancia; unicamente
aqueles derivados das celebracións propias do acontecemento; o ambiente
foi festivo en todos os lugares do Sahara. O Representante Especial
informou que houbo 103.534 votos a favor da pregunta '¿Desexa vostede
que o Sahara Occidental sexa un país independente?'; pola contra, só
733 persoas se pronunciaron pola proposta contraria: '¿Desexa vostede a
integración do Sahara Occidental no Reino de Marrocos?'. 511 votos
foron declarados nulos. Non houbo papeletas en branco ...
Esta mañá, ás 6.30 hora local, os
derradeiros membros das FAR marroquís que quedaban no Sahara pasaron a
fronteira polo posto de El Janfra ...
Fontes próximas ó palacio Presidencial
Saharauí afirman que o Goberno ten recibido un comunicado de Rabat polo
que felicita á RASD tras o éxito dos resultados, ó tempo que solicita
a consolidación no máis breve posible das relacións Diplomáticas.
Ditas relacións, continúa o comunicado, deben ser preferentes como
corresponde a dúas nacións veciñas e ante todo irmás. As mesmas
fontes informan que os contactos, ó máis alto nivel, comezarán non
despois do vindeiro día sete, e que se celebrarán en Aaiun, capital da
RASD ...
Todas as partes implicadas e os numerosos
observadores internacionais presentes, felicítanse pola cordialidade e
o ambiente festivo no que se desenvolveu a consulta. Os observadores
destacan o interese amosado polas partes para reconstruír un futuro
diferente.
Estamos ante unha nova historia ... declarou o
Ministro de Exteriores marroquí mentres estreitaba nunha sentida aperta
ó Presidente da RASD.
Felicidades a ambos.
En especial a todo o pobo de Marrocos e ó seu
Monarca. Saber perder é a maior das victorias. |
BVG
Atrás
Índice de Páxinas
Ir ao índice de Páxinas