Álvaro das Casas

(1901 - 1950)

 

 
Obras
Biografía
 
m1alvarocasas.html

     Álvaro das Casas Blanco naceu en Ourense en 1901. Cursou o Bacharelato na súa cidade de orixe e dirixiuse a Valladolid para se formar en Filosofía e Letras. Obtivo a licenciatura en 1920 e pouco despois comezou a exercer como profesor auxiliar na universidade vallisoletana. Dous anos máis tarde, en 1922, concluía os seus estudos de Doutoramento e pasaba a desempeñar, na Escola Superior de Policía da capital española, a cátedra de Lingua e Literatura Portuguesas. Tras un breve espacio de tempo en que traballaría como secretario político do alcalde de Madrid, trasladouse en 1928 ao Instituto de Fregenal de la Sierra, de onde marchou en 1930 para ocupar unha cátedra no Instituto de Noia, centro que viría a dirixir ata 1936. Tamén nesa altura fundaría en Compostela a revista Alento (1934), de carácter mensual, coa que se propuxo pór en andamento as ideas expostas na súa obra Verbas aos mozos galegos. O funcionamento universitario, publicada un ano antes.
     A súa actividade de axitación cultural foi moi intensa nos anos da República: fundou os grupos Ultreya, deu conferencias e colaborou na prensa. Moitas destas intervencións crearon polémica e enfrontamentos cos sectores nacionalistas e académicos.
     Da súa obra literaria, aparecida fundamentalmente nas editoriais Nós e Lar, destacan as súas pezas teatrais, moi breves (O outro, A morte de Lord Staüler, Pancho de Rábade, Matria, Mitin, O tolo de Lastra, A gavilla, Rechouchío), algunhas delas de propaganda galeguista. Mais tamén cultivou a poesía (publicando un pequeno libro de versos titulado Sulco e vento), a prosa (Xornadas de Bastián Albor, O xardín do castelo de Vidre, Ladaíña) e redixiu numerosos ensaios e monografías de temática varia (Antología de la lírica gallega, Cancionero popular gallego, Antología de poetas gallegos). Para alén disto, daría á luz un grande número de publicacións en castelán de exaltación españolista.
     Álvaro das Casas faleceu en Barcelona en 1950, poucos días despois de retornar de Bos Aires, e recibiu sepultura en Sabucedo dos Montes, en Ourense.

 

logoDeputación logoBVG © 2006 Biblioteca Virtual Galega