BVG Atrás Índice de Páxinas |
Na póla branca |
||
|
I. Na póla branca |
v1xavierseoanenapola.html De sempre tiven unha gran admiración pola poesía de Oriente, en concreto a chinesa e xaponesa. Hai un punto de equilibrio, plenitude e serenidade nela que non é doado achar noutras latitudes. A súa sinxeleza é unha lección para hoxe e para sempre. Hai algo, un fío de luz, ou soño, que nos deixa sempre un alento de eternidade. A plenitude máis núa e transparente do misterio.
Estes haikus, xurdidos ao longo dos anos, queren constatar unha discreta homenaxe a esa eterna flor de crisantemo ou leve póla de cerdeira que é a poesía de oriente.
Un chío
de paxaro -resío
na xanela dourada.
*
Toda a miña nostalxia.
O sol nas ás
da andoriña que parte.
*
Can inmóbil,
ventando
-véspora no aire.
*
¡Humilde cebola!
Tantas capas dentro,
tantos soños...
*
Ven
e vaise,
a néboa branca.
*
Fráxeis, felices,
leves, nervosas, libres.
As andoriñas.
*
(Interior en inverno)
O mosquito.
Tamén el
vive aquí.
*
(Parque)
Fin da tarde.
O columpio repousa.
A xente vaise.
*
(Serán)
Sosegou a araxe.
Só tremen, na palmeira,
dúas crías de pardal.
*
Andoriña da noite,
o morcego saíu
en ziguizague.
*
Macetas de xeranios
en liña. Unha, rota.
Polo final, a cuarta.
*
(Cenit de estío)
En ceo tan puro
non ousa voar
ave ningunha.
*
As estrelas na sombra.
Silencio
do can que soña.
*
(Nocturno invernal)
Un vello automóbil
pola rúa chuviosa
pasea só.
*
O can, erguendo
a pata, mexa á porta
da oficina bancaria.
*
No parabrisas,
a bolboreta, branca.
¡Feliz viaxe!
*
A libélula... ven
de abrir os ollos
a flores e cerdeiras.
*
Úa o pombo.
Verán,
non me abandones.
*
Non ter présa.
Lenta é sempre a palabra,
longo o tempo.
*
Cando cerran os bares,
saen as estrelas.
Pero os borrachos non as ven.
*
¿Ao alto, a bolboreta,
porque sabe que o veo
da brisa ha de sostela?
*
A brisa é cega.
Mais o seu tacto
ilumina... e desperta.
*
Suor na face.
Golpe do sacho.
¡Terra fragante!
*
Froitos caídos
pola herba: algarabía
de formigas e insectos.
*
(A cerdeira)
Sé como ela,
que, sen nostalxia ou dor,
florece, soña, seca.
*
De tanto voar
sobre as margaridas
a abella ten as azas perfumadas.
*
¿Por que
movendo sempre a cola,
amiga labandeira?
*
¡Lonxedades do mar!
Perdida, escintilante,
a vela pasa.
*
Caligrafía misteriosa
dun pardal
na tarde branca.
*
Instante.
Sssss...
A libélula pasa.
*
Pestanexar
Dos ollos dun neno.
Chuvia de confeitos.
|
© 2006 Biblioteca Virtual Galega |