v2vitorvaqueirocamaradenevoa005.html
Se cadra Samuel Beckett cuñara
para nós
aquel tempo de espera. Certos sons espallábanse
nos vellos namorados dubitativamente
ciumentos, na follame, da mocidade. O tempo
non era rectilíneo, mais entre os fusilados
as chagas comezaban a florir. Nas fiestras
por tras das bambinelas, rematadas de encaixes
falseadas nas noites de alcois e de ferrollos,
as olladas medoñas, somentes de curuxas
caseñas, detectaban aos sapos saltimbancos.
Ti, arelante, agardabas, no lirismo da banda
de domingo, ao querido Godot, que se albiscaba
no meio dos cabelos metálicos, nas frautas,
ou tras das partituras de instrumentos selvaxes,
en canto ían florindo as follas ventureiras
como estigmas ou rosas nas mans dos fusilados.