A
nova etapa de creación do noso autor iníciase en 1980
co volume de contos, extraordinario por varios motivos,
Crónica de Nós. Diríamos que hai unha serie de fíos
que a crítica aínda non ten aclarado suficientemente,
que ligan a obra narrativa e a obra poética. De tal
xeito que Crónica de Nós non se comprenderá
sen o precedente de Con pólvora e magnolias,
onde residen moitas das súas claves, do mesmo xeito que
o seguinte poemario, O fin dun canto de 1982,
tampouco se comprende sen a presencia de Crónica de
Nós. Trátase en palabras do propio autor, do
primeiro poemario escrito con vontade de unidade, lonxe
dun simple amoreamento de textos de características
máis ou menos diferenciadas.
Composto por tres partes de
distinta intención e tonalidade, "Salutación ás
aigues", "Sombra de marbre e viño" e
"As escuras estancias", o poemario parte da
apelación aos deuses do pasado, introducindo o tema da
trascendencia relixiosa que se desenvolverá ao longo de
todo o libro para ser negada.
"E xa que sei amar
con desespranza /o adeus atroz do outono / e odio as
primaveras / convocando erectas solucións de estanques e
columas irtas, /podo eu celebrar o cínico morrer e
rexurdir dos deuses / creados pra confirmar ao labrego e
máis o hórrido señor / no inmutábel retorno das
flores e dos froitos"
As mencións de Eliot, Paul
Valéry; a glosa do salmo "Oh Ierusalem, se eu
te esquecer / que seque a miña man dereita / e a lingua
se me funda co paladar"; o compromiso coa loita
dos países do terceiro mundo e a súa igualación coas
loitas de Irlanda e de Galicia, "Convosco
Irlanda poboada de ventos sombras e raíces / queimando o
mundo en Derry e no Bogside / e Galicia ateigada de
millos nos socalcos de vran" ou a presencia dun
poema como o titulado Mogor que preludia xa pola linguaxe
e a temática o posterior Estirpe "Espiral guía
nosa nai emblema / circuito solsticio grande insecto /
aparición de aquel abrente cáustico / NO QUE O SOL É
CRIADO CADA ANO / e comparece con toniñas portadoras do
xasmín en cada ollo" e a asunción do ateísmo
e, por tanto, da imposibilidade de transcendencia que
observamos en Tito Lucrecio Caro "Besta irmá,
certo que non hai cousas por derriba das cousas /e o
terror dos deuses é unha braña seca /e temos que vencer
o poder impuro /e amar a paz de bronce e azul
espera" son algunhas das pautas propostas na
primeira parte do libro, continuada logo por unha
"Sombra de Marbre e viño" onde se desenvolven
os poemas máis líricos, máis intimistas, e tamén
máis tradicionais desde o punto de vista formal e
temático.
A parte final, denominada
"As escuras estancias" combina poemas de moi
distinta raíz, desde os poemas de homenaxe a camaradas e
lugares, aos poemas en que a procedencia evidente, aínda
que disfrazada, convérteos en fermosas homenaxes e, ao
mesmo tempo, reconstruccións dos grandes tópicos da
literatura universal. Referímonos, especialmente, ao
titulado "A un meu fillo" en que se renova o
que poderíamos denominar "tópico do regreso",
presente, por exemplo, en Kavafis pero tamén en Ronsard,
por citarmos unicamente os máis evidentes e que máis
adiante sinalaremos entre as principais características
da súa poesía baixo o epígrafe de
"representación da intertextualidade".
En
1986 edítase no cartafol titulado Homes e illas (Vigo,
Deputación de Pontevedra, 1986) un poema sobre as
Cíes
en homenaxe ao pintor Lodeiro, de quen se inclúen cinco
gravados xunto cun prólogo de Marisa Sobrino
Manzanares.
A composición en versos alexandrinos é tamén un
recorrente homenaxe a Manuel Antonio e un canto
á
presencia material das illas pero tamén aos misterios
abisais que a mente humana proxecta nelas, pois
permanecen
como símbolos polivalentes na nostalxia do refuxio que
encerran e na atracción irresistible cara a soa
final verdade que gardan.
En
1990 publícase na Colección Tabelaría barcelonesa o
poema Morte de Amadís (Barcelona, Antón Agra,
s.
d.) con gravados de Alberto Carpo. O libro desenvolve o
tema abismal da vellez e a morte, a través da
reinvención
dun episodio do mito cabaleiresco devandito que xa fora
parcialmente recreado en prosa polo autor.
Desta
maneira, asistimos ao momento último no que o heroe se
deixa ir no definitivo labirinto sen fin e sen principio
das
fluviais augas mortas dun Arnoia que discorre nunha nova
Brocelandia.
E
en 1991 aparece, con pinturas de Francisco Leiro, a obra Erótica
(Ourense, Eloy Lozano, 1991), un conxunto
de
oito composicións que abordan o transcorrer estacional
do mundo de Eros, ao xeito de lúdica arte amatoria en
estampas
fragmentarias de unións e diálogos de amantes. Esta
última obra presenta unha linguaxe rupturista e de
collage
en estreita comuñón temática con moitos dos motivos da
prosa deste momento, que encontramos tamén
en
boa parte dos poemas da serie "Buscalque",
"Despedida de Castro Laboreiro", "En las
orillas del Sar", "Quai
es
Brumes" e "Sorga" publicada no Boletín
Galego de Literatura (Méndez Ferrín, 1992:
150-154) e posteriormente
incluídos
en Estirpe.
[Branco
1993: 25]
A seguinte obra publicada
por Ferrín vai ser Estirpe de 1994
O
volume desenvolve unha evolutiva recreación da historia
da patria oprimida, entendida esta en todo
momento
como cifra e paralelo da historia propia, quer do falante
lírico quer do lector implícito, e así mesmo
como
exemplo da problemática das periferias, rescatada nos
últimos anos polos estudios poscoloniais.
Próximo,
pois, á narración épica, da que proceden tanto as
solemnes salmodias e o arcaísmo ritual coma as
fecundas
implicacións ideolóxicas e didácticas que se van
establecendo, o amplo volume benefíciase, así
mesmo,
da relación de identificación co referido que provocan
todas as variantes do discurso histórico.
Definido
polo escritor como "un manifesto en petición das
raíces e sustancias ancestrais", o libro,
opoñéndose
tanto
ao pensamento posmoderno da fin da historia coma aos
estereotipos provenientes do poder que a condición
periférica
impuxo ao coñecemento da identidade nacional, desenvolve
un esforzo cognitivo para restaurar a historia
comunitaria
para enlazar pasado e presente. [...] Se a serie inicial
construía un arcaico e perturbador mundo
ficcional,
combinando as noticias sobre Galicia tomadas da
historiografía clásica coas figuracións e as lendas do
imaxinario
popular autóctono, a outra gran epopea do volume,
desenvolta na serie "Quai des brumes", ten na
elusión,
a transducción e as técnicas fragmentarias máis
avanzadas, a súa base. Mesturando a intrahistoria cos
libros
de aventuras da mocidade, o conxunto, que crea unha
xeografía fantástica poboada por personaxes literarios
e
reais, navíos históricos e naufraxios famosos,
preséntase na clausura como relato ficticio narrado nas
tabernas
mariñeiras
da ría viguesa, co que se abre á liña máis persoal do
volume. [Vilavedra 2000: 189-190]
|