Chega un a Lugo e todo e un recender a polbo
cocido, que a cidade vive a súa festa grande, na que honra a San
Froilán, natural da mesma.
Entre tanta troula de casetas e barracas, o ir
e vir á comer o polbo e a carne ó caldeiro, acompañados dun bo tinto
da Ribeira Sacra, a ninguén lle queda un minuto para lembrar que
despois desta festa, a máis grande das do outono galego, veñen datas
de recollemento e lembranza dos que xa non se atopan entre nós.
Novembro, Santos no calendario máis popular,
comeza co día de defuntos, data triste para case todos, a pesar do cal
non faltan nas mesas galegas as larpeiradas propias do tempo, como son
os ósos de santo.
Tiña para min que era esta unha tradición
moderna en Galicia, e seguramente importada doutras partes de España,
pero vexan por onde atopo en La Voz de Mondoñedo do 29 de outubro de
1904 un anuncio de La Dulce Alianza, confeitería que aínda existe en
Mondoñedo, no que se anuncia que "En esta acreditada
confitería se pondrán a la venta, desde mañana domingo, los tan
exquisitos buñuelos de viento y huesos de santo, propios de la temporada".
Velaí que a tradición ten xa, polo menos, un século.
Pero o obxectivo destas liñas non son os ósos
de santo sen máis, senón un doce que non se fabrica nin consume en
Lugo, que eu saiba, anque levan o nome do patrón da cidade: Ósos de
san Froilán.
Poden atopar a receita nun libro estupendo
titulado "Los dulces de las monjas" do que é autora
Sor María Isabel Lora, monxa e cociñeira do mosteiro das Madres
Dominicas de Nuestra Señora del Rosario, de Daroca (Zaragoza). Segundo
explica na introducción, as receitas fóronlle transmitidas por súa
mai na vila natal de Manchones, tamén na provincia de Zaragoza.
Os ósos de San Froilán que non ofrece a monxa
fanse cunha masa de fariña, lévedo, ovos, azucre e reladura de limón,
amasado ata ter unha pasta fina. Unha vez léveda, fanse boliñas con
esta pasta e estíranse, facéndolles unhas marcas pouco profundas, para
que se abran ó fritilas en abundante aceite. Unha vez fritos, os ósos
de San Froilán salfírense con azucre moído.
Non sería mala cousa que algún pasteleiro da cidade probara a
fórmula.
Publicado en El Progreso o 13
de outubro de 2004
|
|