BVG     Atrás    Índice de Páxinas

conxugara un poema para atoparche. e nel eu paseaba pola cidade. buscaba o lugar mellor no que vernos por vez primeira. e prometía levarlle flores, camelias aínda que en realidade era o poema o que che levaba polo seu ventre e detiña os teus pasos nos lugares acordados para os amantes. que estaban tamén no poema que fala da instantánea que nos devolven os escaparates da hora xusta na que acenden todas as luces do ceo nas rúas sen saída pero sobre todo da sombra das árbores que atardecen, abrazados eu sabía destes sitios polas novelas. así inventara os nomes para a cor dos teus ollos e pouco importaban xa a cidade e toda a súa arquitectura antiga, porque non sei o teu verdadeiro nome pero es de certo ti o que move os meus cabelos co seu alento seino porque eu na terraza do rhin, e ti sorrías dende o último verso.

© 2006 Biblioteca Virtual Galega