v2camilogonsardesfeita005.html
CAPITULO VI
ASUNTO RESOLTO |
Naturalmente,
eu tamén mirei para onde sinalara Lier. Primeiro, tomei nota
mentalmente, por así dicilo, de dúas casas baixas, encaladas,
de aire semi-rural, claramente residuais, reliquias dos tempos en
que aquela parte da Vila aínda non se diferenciaba de maneira
tallante do estilo e do carácter da aldea. Despois, fixeime nun
grupo de catro individuos que estaban agora parados na acera de
enfronte, agardando para poder cruzar. Un deles tiña unha
fermosa barba dourada. Outro, ancho e forte, cunha colilla
arrinconada na boca, levaba chaqueta azul de dril, cruzada,
gastada, e con grandes bolsos laterais -polo tipo de chaqueta
supuxen que era Cabude, o chofer do coche de liña, en quen
Zhivago tiña postas tódalas súas esperanzas, e acertei; anque
recoñezo que non tiña máis razóns para pensar que era o
chofer que para pensar que era o cobrador. O máis alto de todos,
atlético e moreno, ía en mangas de camisa, arremangadas:
supuxen que era o cobrador -despois souben que se apelidaba Muíños-
e tamén acertei. E o máis baixo, o que parecía o máis novo
tamén, usaba gafas, e exhibía ledamente unha camisa de mangas
cortas moi de vangarda.
Zhivago explicoulles a Lier e mais
a Plastiras o grave problema que lle ocasionaba a súa mesa: Quería
que Cabude lle levase unha mesa ao River Club. Tal era a cuestión.
Pero que vos diga este qué mesa, agregou dirixindo cara a min a
súa mirada.
- Mucho mejor que las de aquí, ¿no
es verdad?
Agora referíase, naturalmente, ás
mesas do interior do café, non ás fráxiles e despreciables
mesas da terraza.
Eu non sabía por qué era moito
mellor, pero asentín: en efecto, era moito mellor, dixen con
forza.
Realmente, a mesa de mármore metéraselle
a Zhivago dentro da cabeza e desprazara todo o demais, mesmo á
gramática, para reinar en solitario. E o máis curioso era que
isto sucedera de golpe, supetamente, ao final da miña visita,
xusto cando eu quixen introducir o asunto do Perito de Guitián;
porque ata o entón non ma mencionara para nada.
A chegada ata nós do grupo de
Cabude sufriu un retraso. Xusto cando os seus catro compoñentes
ían aproveitar un claro no tráfico para facer o cruce, foron
abordados por outro grupo, este formado por dous rapaces e unha
rapaza, os dous primeiros con cabelo máis longo que o da rapaza,
un cunha guitarra pendurándolle da man, como se fose un bolso de
viaxe, e todos con pantalóns vaqueiros. Os rapaces falábanlle a
Cabude.
Lier, ao velos, informounos a todos
nós:
-Estes acamparon nunha tenda xunta
ao River Club. Xa levan alí dous ou tres días.
Tamén comentou Lier que as noites
xa ían quedando algo frías, impropias para durmir nunha tenda
de campaña.
-Pero eles frío non pasan.
Como botón de mostra, contounos
que, a mañá do día anterior, un dos rapaces e maila rapaza
estaban metidos nun saco de durmir. Os dous xuntos no mesmo saco,
fóra da tenda -é dicir, á vista de todos: porque había varias
persoas polos arredores, entre elas o propio Lier.
Os tres rapaces da tenda falaban,
como dixen, con Cabude: Cabude, en cambio, quizais para non poñer
en perigo a colilla da súa boca, a penas falaba con eles: limitábase
a mover negativamente a cabeza unha e outra vez. Á beira de
Cabude estaba o de barbas -o Barbas, sen dúbida, moi serio e
calado, mirando cara ao ceo. Os
outros dous do grupo de Cabude ficaban agora retrasados.
Finalmente, os dous grupos volveron
separarse. O de Cabude, agora si, empezou a cruzar a rúa cara a
nós, o rapaz baixo e de gafas coxeando esaxeradamente, bandeándose
como fráxil dorna no medio do temporal. As súas gafas eran moi
grosas. Dous ou tres metros antes de que chegasen, xa Zhivago lle
estaba berrando a Cabude, como se tivese medo de que se lle
escapase: preguntáballe se lle podía trasladar ata o River Club
no seu coche, de paso que ía para a súa casa, unha mesa.
Cabude non se dignou contestar ata
estar xusto dediante de Zhivago. Antes de contestar, cuspiu a
colilla no chan. Logo moveu negativamente a cabeza.
-Non podo -dixo tranquilo e lento.
Seguidamente preguntou estrañado:
-¿Unha mesa?
-¡Una mesa, es para el River Club!
Foi entón cando o Barbas lle
ofreceu os seus servicios a Zhivago, ante o asombro xeral.
-¡Lévocha eu! ¡Nada, iso está
feito! -díxolle.
Falou con vehemencia, como volcándose
no que dicía, como firmemente resolto a levar a cabo un traballo
benéfico, pero tamén con claridade, sen atropelar as palabras.
E despois quedou calado, observando aos seus interlocutores con
ollos asustados e brillantes. Con seguridade, xa estaba algo
colocado; pero era dos que sólo son naturais, que sólo son eles
mesmos, cando o están. Levaba unha cazadora desabrochada, e tiña
unhas entradas moi fondas, pero a súa barba dourada compensáballe
con creces a escasez do cabelo -non se podía dicir outro tanto
do bigote de Lier.
-¿Tú?
Zhivago non sabía se aceptar ou
non.
-Pero ¿tú no tienes el coche...?
-Ti non te preocupes polo meu coche
-cortoulle o Barbas-. ¿Verdade, Fangio?
E o Barbas pousou unha man sobre o
ombro do máis baixo e o máis novo do grupo, o coxo de gafas
grosas, que sorriu tímido para dicir rapidamente e medio ruborizándose:
-¡Eu creo que o meu coche xa estará
listo!
Era, como dixen, o que levaba a
blusa de vangarda; unha blusa cun letreiro que poñía: Kentucky
University.
Cando xa parecía todo solucionado,
o Barbas díxolle a Zhivago:
-Sólo che poño unha condición.
-¿Que condición? -preguntou
Zhivago, agora con alarma.
-Xa falaremos -replicou o Barbas
con certo aire de misterio.
Debo dicir que ámbolos dous, o
Barbas e mais Fangio, resultaban simpáticos desde o primeiro
momento. Quizais fose simplemente polo seu aspecto -sendo tan
distintos. Concretamente, aquela blusa co letreiro de Kentucky
University, que sería en calquera outro mostra dunha sumisión
grotesca á anglomanía imperante na moda, en Fangio quedaba
graciosa, porque se vía que el a mercara simplemente por ser a
primeira que lle ofreceran. Pódese ir a favor ou en contra da
moda; mais o caso de Fangio era outro. El non se decatara da
existencia de iso que se chama moda; iso era todo.
O grupo do Barbas e Cabude pasou,
por fin, ao interior do café a tomar uns vasos na barra. Zhivago
permaneceu alí, na terraza, de pé. Seguía nervioso; pero
agora, ademais de nervioso, dubitativo.
CAPITULO VII
UN AVISO CHEO DE PRUDENCIA |
Mentres
eu escoitaba con toda a paciencia do mundo os liberais puntos de
vista do Dr. Zhivago sobre todo xénero de materias para
desengano de erros comúns; mentres o Dr. Zhivago e mais eu
estabamos sentados no despacho do primeiro, un coche de liña
conducido por Cabude paraba diante dunha tasca-café-comercio de
ultramarinos, penumbrosa e anárquica, illada na estrada, a dez
ou doce quilómetros da Vila.
-Un deses sitios onde hai de todo.
Podes tomar un vaso de viño, ou un café, ou unha ración de xamón,
que, por certo, é moi bo o que teñen alí. Podes comprar desde
tabaco ata pilas para a lanterna -explicábame Lier, que é a
quen lle debo os datos cos que fun elaborando este e algún outro
capítulo, como xa terá ocasión de ver o lector ; foi, Lier, o
meu grande informador, aínda que non, certamente, en tódolos
asuntos nos que eu estaba interesado en obter información.
A aquela altura do seu traxecto, o
coche non levaba case a ningún pasaxeiro, e case tódolos poucos
que levaba baixaran na parada aquela. As veces viña así de
baleiro. Dependía moito da hora, do día, da época do ano.
Debido á escasez de pasaxeiros, a
viaxe fora máis rápida; a penas houbera necesidade de facer
paradas ao longo do camiño, en contraste con outras veces en
que, cada dous ou tres quilómetros, había que deixar baixar ou
subir a un paisano.
Dado, pois, que, de tódalas
maneiras, o coche había chegar adiantado, Cabude (o chófer), Muíños
(o cobrador), e o Barbas e mais Fangio, que ían xuntos nun
asento dianteiro, acordaron entrar na tasca-comercio, etc., a
tomar unos vasos.
Era verdadeiramente insólito ver a
estes dous últimos, o Barbas e Fangio, sentados no coche de liña.
Naturalmente, isto só podía deberse a que estaban privados dos
seus propios coches, cada un por distintas razóns.
Polo que toca ao Barbas, a razón
é que quedara durmido ao volante do seu coche tres noites atrás.
Viña completamente pegado á esquerda da estrada, como puido
comprobar un veciño da Vila que se cruzou con el, e que, ante o
choque inminente, empezara a tocarlle a bucina desesperadamente:
o Barbas reaccionou no último momento para, pouco despois,
recaer no seu sono e acabar chocando, xa na entrada da Vila,
contra outro coche parado.
-Saíu ileso por verdadeiro milagre
-afirmaba Lier.
En canto a Fangio, tiña o seu
coche en reparación.
Polo demais, sabe Deus o que o
Barbas e Fangio andaran a facer na capital de provincia, da que
agora regresaban no coche de liña. Posiblemente, nada moi
distinto do que farían unhas horas máis tarde. Porque aínda
volveron a ela, xa ben entrada a noite.
Ao ver que baixaban os catro, unha
rapaza cabelo color palla & blue-jeans, que se situara
solitaria nun asento cun saco de viaxe á súa beira, ben
encostada, o xesto desdeñoso e fumando sen parar, preguntou con
imperioso acento matritense:
-¿Vamos a estar parados aquí
mucho tiempo?
Muíños dudibou: aquel tipo de
pregunta collíao desprevenido.
-Dez minutos, todo o máis -dixo
por fin.
A rapaza ergueuse, colleu toda
decidida o seu saco, e entrou tamén na tasca: meténdose
primeiro no WC -con ánimo heroico, hai que recoñecelo; porque o
necesitaba para meterse alí: un WC común para mulleres e homes
ou, mellor dito, feito, e "conservado", sobre a
suposición de que nunca habían entrar nel clientes femininos; e
sentándose logo nunha das poucas mesas que había no local,
desde a que pediu unha coca-cola ou algo así.
Os catro homes, por outra parte,
quedaron de pé, tomando os viños -desde logo máis de un por
cabeza- no mostrador. Falaban en voz baixa: o que menos falaba
era o Barbas; pero era, en cambio, quen despertaba máis atención
e interese cando falaba.
Ao cabo de algún tempo, pagaron os
viños e emprenderon un lento camiño de volta cara ao coche. Non
todos.
-O Fangio parece que estaba no
water -díxome Lier.
E o Barbas, pola súa banda,
despegouse de Cabude e de Muíños, acenándolles aos dous para
que seguisen andando, como así o fixeron: pensaron que o Barbas
quería ir tamén ao WC, e que quedaba agardando a que o
desocupase Fangio.
Pero o que, en realidade, fixo o
Barbas foi achegarse á rapaza. A cal xa estaba de pé, disposta
a iniciar igualmente a súa marcha cara ao autobús. Recibiu ao
Barbas con cara de susto -polo menos, segundo a descrición que
ela lle fixo a Lier dela mesma.
Resulta que o autobús no leva ben
os freos: isto foi o que lle espetou o Barbas á rapaza.
Agora ben, dentro de dez minutos, máis
ou menos, agregou, había vir outro coche para recollela.
Eles -é dicir, o Barbas e mais o
Fangio incluídos- ían levar agora o coche de liña ao taller,
seguíu explicando o Barbas, e desde alí darían o aviso
correspondente.
O sentimento da susto da rapaza
redondeouse.
E o Barbas rematou dicíndolle á
rapaza que fora o chofer o que lle encomendara transmitirlle
aquela información.
-Porque él no habla bien el
castellano.
O máis notable era a expresión do
Barbas: cos seus ollos azuis moi abertos, inocentes e como
implorantes, como pedíndolle mudamente perdón á rapaza por ter
que molestala. Tímida e trémula soáballe tamén a voz. Nos
momentos aqueles, o dono do establecemento desaparecera nun
cuarto interior, de maneira que quedaran eles dous soamente, a
rapaza e o Barbas.
Pouco despois, saía Fangio do WC.
El e mais o Barbas dirixíronse xuntos ao autobús. No intre en
que acababan de traspasar a porta do local, a rapaza sentiu
grandes risadas de Fangio.
O coche de liña arrincou. Os catro
amigos alongaban animadamente, no coche, a conversa que
mantiveran mentres bebían os viños.
-Muíños, o cobrador, anda sempre
de leria, pero tenche gracia. Ponse a falar e esquécese de todo
o demais. Cando o coche vai cheo de pasaxeiros, el é a diversión
xeneral. Non para en todo o camiño de facer chistes cos
paisanos. Ao mellor dille a un, cando vai cobrarlle o billete:
Hoxe imos seguir directos ata Buenos Aires. Pasa a viaxe soltando
disparates así. Os paisanos lévanlle a corrente. É un tipo célebre
-contábame Lier.
De todas maneiras, foi o propio Muíños
o primeiro en decatarse, cando xa levaban varios minutos de
viaxe. (O Fangio era tan despistado que nin se fixara en que a
rapaza quedara na tasca. Así que as risadas que esta lle oíu
cando saía co Barbas non debían de ter nada que ver con ela.)
-¡Coño! -exclamou Muíños-. ¿E
a rapaza que viña alí?
Muíños sinalou o asento baleiro
da rapaza.
Pero o Barbas tranquilizouno:
-Non, díxome a min que quedaba -a
súa voz soaba calma e segura-. Eu coñézoa. Ten unha tía en Río
e acordou quedar para facerlle unha visita.
Río era unha aldea a moi poucos
pasos da tasca-comercio, etc.
Durante o resto do camiño, non
tiveron que facer máis paradas. Non atoparon a ningún viaxeiro
que quixese subir, nin levaban tampouco a ningún que tivese que
baixar antes da parada final. Así que chegaron á Vila antes da
hora -os dous membros da tripulación xunto cos dous excepcionais
viaxeiros, o Barbas e mais Fangio, dispostos, os catro, a seguir
a súa tertulia polas tascas da Vila.
-É un bo rapaz, home -louvábame
Lier ao Barbas-, non é ningún túzaro, podes crerme, pero, ¿que
queres?, ás veces dálle por aí e...