BVG     Atrás    Índice de Páxinas

O moucho son dous ollos
                  espetados na fronte
                  da noite e das estrelas;
                  dous seixos aquedados
                  chantados entre lúas e meixelas;
                  dous silencios infindos, axexantes;
                  lumieiras sen luz,
                  palpabrexantes.
O moucho-espía,
o moucho-garda,
o moucho-escoita,
o moucho-sentinela,
o moucho-mastro,
o moucho-pólaergueita,
o moucho-vixiador,
o moucho-esteo,
o moucho-cariátide,
o moucho-outeiro,
o moucho-grímpola,
o moucho-carrapucho,
o moucho-xeo,
o moucho-sempremoucho:
                  fita os peitos da noite,
                  o arrecadén da noite,
                  o corpo da Nai Noite,
                  e albisca as padiolas
                  que levan os fantasmas, camiñando,
                  turrando da canseira,
                  como un exército vello e desafouto
                  que tira os seus feridos
                  e mortos do que fora
                  o campo da matanza.

© 2006 Biblioteca Virtual Galega