BVG     Atrás    Índice de Páxinas

TEMPO SACRO

É o recreo. Son os cativos os emperadores deste anaco esencial do cosmos máxico trazando labirintos de herba que os conducen pola gran ludoteca da vida manancial. Cabalgando teimudos en alados corceis perseguen polo aire as pompas de ilusión ou esa esfera lábil que convoca vontades na mesma dirección. Liberan arañeiras que van acumulando no exercicio discente e ventilan a mente como a ama de casa espalla co plumeiro sobre os mobles o día candeal que entra rebuldeiro pola aberta ventá. E cando o timbre rompe co seu balbordo a maxia do recreo como un soño de vidro que cae esnaquizado, volverán aniñar arañas no cerebro a teceren a rede do futuro. Gústame ver os nenos entrando no recreo co seu séquito azul de bolboretas brancas.

© 2006 Biblioteca Virtual Galega