BVG     Atrás    Índice de Páxinas

Cheo de ilusión e vida nun día de sol primaveril levanto ben cedo de mañá para buscar aventuras mil. Poño o pote do caldo ó lume, colgado na garmalleira de ferro que serviu ós misteriosos celtas para facer a comida sen fume. Remexo coa coller o fondo do pote: o unto, verzas e patacas a fartar, remexo o fondo todo ben remexido, para a vianda non se quimar. Poño na cunca o caldo ben quente, despois visto a roupa dos domingos e calzo os vellos zapatos engrasados e voume despedindo dos amigos. Co fardel e o saco con ferramentas ó lombo e as bágoas caindo ó pensar, no que eu vou deixando para tras a cada paso que vou dando, ó camiñar. Subo no Industrial no lugar de Doade e por moitos pobos eu vou viaxando: Beariz, Avión, Abelenda e outros máis, Ribadavia e en Ourense estou chegando. Subo no tren que vai ata Sobradelo, na viaxe vexo moitos rostros duros, desconfiados, oprimidos pola incerteza. Apeo do tren e fóra séntome nos muros. Agarro o saco moi pesado, coas ferramentas e algunhas cousas mais, de pouca importancia: roupas e comida feita en casa para a viaxe, xunto cos compañeiros que van a ganancia. Unha viaxe ingloria. Pernas para que vos quero. Agachándonos da Garda Civil que nos perseguía, saco ó lombo e cada un andou por onde puido, camiñando sempre de noite e dormindo de día. Destino, procurar wolfrán no lugar de Casaio, pá, picachón, maceta e potas para comida facer, unha machadiña para a chavola poder montar e paus dos lados, pólas no tellado para non chover. Logo no día vindouro, de mañá, ¡alto quen está aí! Asalto feito por escapados da guerra, guerrilleiros, eles tiñan que sobrevivir e ás vezes "roubar". Fomos salvos por un amigo dos compañeiros. Eses galeguistas, soldados, labregos, artistas e valentes guerrilleiros cansados de se agachar, fuxindo da represión incomprensible, ós poucos, foron sendo mortos ó loitar. Eses guerrilleiros, sucios e barbados, fardel ó lombo e cara de moito sofrer, o fusil na man para se defender, loitaron, loitaron ata morrer.

© 2006 Biblioteca Virtual Galega