v2vitorvaqueirotratadodoefemero003.html
A Otero Pedrayo, in memoriam |
Avanzaba na noite no camiño de
terra que beireaba o mato. O peito fervilláballe co devezo que
algúns alcois mesquiños lle inxectaran. Ao sobardar a fonte,
albiscou a figura, a silueta que se recortaba no luar denodado, a
exclusiva cor preta na súa indumentaria, os peitos deseñados na
chaqueta, o decote profundo existente na chambra, os finísimos
zapatos cravexados dende onde agatuñaban formas provocantes que
unha saia cinxía. Albiscou igualmente a face fermosísima, a
ollada incitadora e escoitou subitáneo, dentro das súas tempas,
o alarido do sexo. Achegouse á figura feminina e desexou bicala,
investigala. Adiantou a súa man direita e unha pancada doente,
dada co envés da man, estaloulle na face, derrubándoo. Cando se
ergueu do chan (de sangue e terra) sabía xa a dureza do combate
vindeiro, que se alongou por tempo ilimitado na alta noite. A
muller abateuno en veces infindábeis e el só puido tocala en
dúas ocasións: a primeira, coa palma da súa man a coxa dela, e
a ansiedade democoulle o alento. A segunda, cando en medio da
contenda rozou aqueles beizos cos seus beizos, sentiuse
desvairado, mentres se misturaba o ruído apagado que as botas
del xeraban co renxido metálico que, na terra, producía o
calzado da figura. Abandonou a loita, esmaiolado, cando viu o
sorriso soberbo da muller, a roupa da cal continuaba sen mácula.
O leito recibiuno dentro da súa morneza. Ao espertar, igual que
un asasino sen sosego, dirixiu os seus pasos ao campo de batalla,
onde se dexergaban con total claridade as pegadas que as súas
botas xeraran e non había, embora, o máis leve vestixio dos
zapatos da figura feminina, que eran cravexados.