v2vitorvaqueirofragaprateada004.html
18
Ultrasóns afiados
resoaron imperceptibelmente.
Houbo ritmos acuáticos e máxicos
nas asas craniais dalgunhas freiras;
nas coxas axexantes tras das saias
de púberes hieráticas
naceron remexidas
e gabearon estremorecementos;
na magnética canle entre os dous seos
dalgunha dona, macia
na súa fermosura a piques da descida,
abrollou unha breca
que ergueu o voo
e atravesou pairando espectralmente
a bacía boente
como unha maina mediatriz do Lido.
A túa presenza etérea inda latexa
no encaixe avelaíño de Burano,
nos reflexos quecidos no bacino
ou nas ardentes portas de Torcello.