Algunhas das moitas especies de formigas que hai no Brasil amosan unha
insólita capacidade de adaptación aos tempos modernos. Coa chegada do
inverno introdúcense nos aparellos informáticos na procura dun abrigo
quente, seguras, ademais, de aproveitar os restos de comida e bebida
deixados preto do computador, da impresora ou do teclado. Para evitar os
posibles danos o remedio aconsellado contra elas é o cravo da India. O
seu cheiro logra afastalas.
Téñeno máis complicado en Norteamérica con
estes insectos. Unha praga de feroces formigas está a estragar os
cultivos dos estados da rexión sueste e ameaza con invadir en menos de
dez anos as ricas terras de California, espallándose por elas coa súa
característica voracidade. Trátase dunha especie de formigas
orixinaria do Brasil, das que aquí chaman "lava-pé", que terían
chegado, ao parecer, hai uns sesenta anos como polisóns nos cargamentos
de madeira desembarcados nos portos de Alabama e Florida. O curioso é
que a densidade de poboación nos Estados Unidos xa é cinco veces maior
que en Brasil ou Arxentina, pero os técnicos vénse incapaces de
controlar o seu crecemento con productos químicos, que provocan,
ademais, a morte doutros animais.
Desbotados, pois, os insecticidas, vaise
recorrer agora a outra táctica orixinal para erradicar esta praga: a do
estricto control biolóxico. Por iso, a pasada semana o Departamento
norteamericano de Agricultura soltou nas áreas tomadas polas formigas
millares de moscas phorid, recollidas no Mato Grosso e nos
arredores de Río, coa esperanza de que se confirmen na natureza as
experiencias levadas a cabo no laboratorio e se repitan alí as
condicións naturais que existen en América do Sur. As moscas
importadas legalmente do Brasil son os inimigos naturais deste tipo de
formigas, alomenos no medio tropical do que proceden.
As phorid son de pequeno tamaño, pero
letais. Pousan sobre as formigas e depositan os ovos nos seus corpos. En
dúas semanas as xa larvas achéganse á cabeza das formigas e córtana,
aproveitando despois o resto do bicho como abrigo onde poder
transformarse definitivamente en moscas.
Foi o profesor norteamericano Sanford Porter,
cando vivía no Brasil e facía pesquisas sobre entomoloxía, quen
descubriu estas "cortadoras de cabezas". Asegura que as moscas
importadas non traerán novos problemas e que se interesarán unicamente
polas formigas. Pero ¿quen o pode garantir? |
BVG
Atrás
Índice de Páxinas
Páxina Seguinte
Ir ao índice de Páxinas