Madalena,
flores de plástico, coração de fogo é o título da curtametraxe
que levou o premio ao mellor vídeo experimental da última edición do Rio
Cine Festival, celebrada a semana pasada. O director Rogerio Terra
Júnior, un rapaz de Juiz de Fora (Minas Gerais) fai nela un vertixinoso
retrato, a penas tres minutos de mesturadas imaxes en super-8 e VHS, da
alma da súa cidade natal, sempre pioneira e dinámica.
Situada a 680 metros de altitude e con máis de
400.000 habitantes, Juiz de Fora ocupa unha posición estratéxica no
territorio. De feito, tivo as súas orixes no século XVIII cando máis
de cen traballadores, entre escravos negros e indios e asalariados,
abriron o chamado Camiño Novo para a ocupación das Minas Gerais. O val
do río Paraibuna, que marcou a súa forma urbana lineal, era pasaxe
obrigada nese percorrido entre o ouro e o mar.
No século XIX, cando é elevada á categoría
de cidade, foi o café quen levou a riqueza e un rápido
desenvolvemento. Traídos por Mariano Procopio, o presidente da
compañía Unión & Industria, máis de dous mil inmigrantes
alemáns (mecánicos, carpinteiros, constructores e especialistas en
pontes de ferro) construíron en 1861 os 144 km que separaban Juíz de
Fora de Petrópolis. Foi a primeira estrada pavimentada de Brasil.
Cincuenta anos antes outro alemán, o enxeñeiro Heinrich Ferdinand
Halfeld, déralle un novo pulo á colonización da rexión.
Foi tamén pioneira Juiz de Fora na
introducción da enerxía eléctrica, e aínda conserva no río
Paraibuna a primera central hidroeléctrica, hoxe transformada en museo,
de toda América do Sur. Estas e outras novidades converteron a cidade
desde a fin do Imperio nun importante centro industrial, téxtil sobre
todo, o que lle valeu o nome de "Manchester mineira".
Malia as dificultades e o longo proceso de
decadencia iniciado nos anos 30, Juiz de Fora nunca abandonou as súas
aspiracións industrializadoras. O optimismo actual baséase na
instalación dunha montadora de coches da Mercedes-Benz, a primera
fábrica deste tipo fóra de Alemaña. Na decisión deste fabuloso
investimento tiveron moito que ver as presións políticas dun dos
fillos da cidade, o ex-alcalde e anterior presidente da República,
Itamar Franco, quen ofreceu importantes incentivos fiscais.
En xaneiro comezaron as obras que levan un
ritmo acelerado para que nas vésperas do Nadal de 1998 poida saír o
primeiro "Classe A", o A-160, feito no Brasil, un coche que se está
xa a fabricar na propia Alemaña para ser vendido este outono en Europa.
A chegada da Mercedes vívese como unha
auténtica revolución. E animou á retraída colonia alemana, moi
perseguida durante a Segunda Guerra Mundial: estes días tramítase no
Concello unha lei pola que os descendentes de alemáns terán unha
reducción nos impostos municipais se reproducen nas súas casas a
pintoresca arquitectura xermánica. |
BVG
Atrás
Índice de Páxinas
Páxina Seguinte
Ir ao índice de Páxinas