Ten
unha luz sempre especial este recanto da baía. Hai poucos días
celebrouse a festividade de Nosa Señora aquí, na igrexa do Outeiro da
Gloria, moi coqueta ela coa súa caixa octogonal e coas pilastras
separando as súas caras branqueadas de cal. Arte colonial do XVIII que
me fai lembrar o santuario da Peregrina de Pontevedra. A única torre,
cadrada, domina co seu campanario esta paisaxe soberbia. De debaixo do
outeiro, por entre as árbores, sobe é domingo o barullo da
feira do Russel, sempre ateigada de xente entre as barracas de quincalla
e roupa barata, verduras, froitas e peixe.
O balbordo e o cheiro xa non chegan ao outro
lado do outeiro, ao veciño Hotel Gloria, toda unha institución que o
pasado 15 de agosto cumpría 75 anos de vida. Foi construído a
petición do presidente Epitacio Pessoa que desexaba un hotel adecuado
para recibir os seus convidados que visitarían a capital nos fastos do
centenario da independencia do Brasil. Inaugurado en 1922, catro anos
despois do inicio das obras, empregouse nel por vez primeira no país o
formigón armado. Clasicista e moderno, na súa caprichosa e elegante
curva náutica, que parecía xogar coa forma da enseada, batían ás
veces, antes do recheo, as ondas do mar.
O actual director é o paulista Eduardo
Tapajós. Chegou á cidade con vinteún anos ten agora 69
como xefe do departamento de persoal dunha empresa de ómnibus, a
Relámpago, da que tamén era socio, e que en 1949 comprou o hotel.
Tapajós nunca máis deixou de dirixir este luxoso establecemento de
cinco estrelas cheo de "glamour".
Desde a belle époque (tropical) dos
anos vinte, foi a casa da maioría dos presidentes da República que
buscaron acougo entre as paredes da luxosa suite presidencial. Na
revolución dos 30 Darcy Vargas agardou nel a chegada do seu marido que
viña camiño do Río coas tropas victoriosas de daren o golpe de
estado. Anos máis tarde, o daquela vicepresidente Itamar Franco
refuxiouse tamén alí, onde tiña celebrado o seu casamento cando era
alcalde de Juiz de Fora, mentres en Brasilia votábase a destitución de
Fernando Collor de Mello, o que lle permitiu finalmente acceder á
presidencia.
Ademais da política, estiveron no Gloria
moitas estrelas das artes, do cine e da canción. Hospedouse, entre
elas, por exemplo, Ava Gardner en 1954 para promocionar A Condesa
descalza, pero unha tarde, bébeda de whisky e xenebra, comezou a
romper todo o que se lle puña por diante e foi cominada a abandonalo.
Contou tamén entre seus primeiros clientes con
Albert Einstein quen o dia 7 de maio de 1925 na habitación 400
concluíu tiña que ser neste lugar o seu manuscrito sobre a
teoría da luz no que demostraba a existencia dos fotóns. O documento,
enmarcado, forma parte do acervo do hotel. |