Eran
tantos sempre os libros que se presentaban, que desde 1564 George
Willer, libreiro de Augsburgo, decidiu facer dous catálogos anuais coas
novidades para as obrigadas feiras de primavera e outono de Frankfurt.
Xa desde o século anterior impresores, libreiros e escritores de toda
Europa acostumaban a reunirse nesa cidade renana para os intercambios
comerciais. Clausurada onte, a actual Feira do Libro de Frankfurt contou
coa presencia de miles de editores, axentes literarios, xornalistas,
libreiros e bibliotecarios, xuntos nun evento onde se decide, en
realidade, o que vai ler a maior parte do mundo nos próximos meses.
A Alemaña chegou tamén, como é lóxico,
Sergio Machado, presidente do sindicato brasileiro de editores e
director da Record, a prestixiosa editorial fundada polo seu pai en
1942. A súa empresa controla boa parte do mercado nacional, con máis
de cinco mil títulos no seu catálogo, entre eles obras de autores
consagrados, como as do seu amigo Jorge Amado, Gabriel García Márquez,
Rubem Braga, Graciliano Ramos, Irving Wallace, Eugenio Montale, Carlos
Drummond de Andrade, etc.
No pasado día 17 de setembro Sergio Machado
recibiu unha inquietante chamada telefónica na habitación do Hotel
Frankfurt Hall onde permanecía hospedado. Unha voz anónima
comunicoulle o secuestro da súa irmá Sonia, e nunha segunda chamada a
mesma persoa insistiu en que a cousa ía en serio e falou do pagamento
dun rescate. O empresario xa tiña daquela confirmación da noticia: a
súa irmá fora, en efecto, raptada na noite do venres, cando saía do
traballo e se dirixía ao seu domicilio en Botafogo. De corenta anos de
idade, casada e enxeñeira de profesión, Sonia Machado levaba a
dirección financeira da Record, da que é socia xunto cos seus irmáns
Sergio e Alfredo, herdeiros todos eles do negocio do pai, morto en 1994.
Despois de informar da situación aos seus
colegas e profundamente consternado, Sergio volveu para Río. Axiña
soubo que a súa irmá era a tercera víctima dun secuestro nesa semana
na cidade (que con este caso xa son 11 os que quedan aínda sen resolver
e que a policía contabiliza 42 no que levamos de ano). No pasado día
13 os secuestrados foron Rosane Manela, a filla do propietario da De
Millus, unha empresa de lencería, e Valmir Fernandes do Amaral, dono
dunha empresa de transportes.
Os parentes deste último teñen moitos motivos
para non entrar en contacto coa policía. Valmir xa viu como os seus
amigos eran secuestrados. O primeiro, Manoel Alves Lavoura, morreu no
cativerio en 1994 despois de pagar a súa familia dúas veces o rescate.
O seu irmán José sufriu a violencia por dúas veces. Os
secuestradores, sen cobrar nada, liberárono da primeira porque acababa
de operarse. Pero non tiveron compaixón. Na segunda, resistiuse e levou
un tiro no rostro. Despois de seis meses acabou morrendo. |
BVG
Atrás
Índice de Páxinas
Páxina Seguinte
Ir ao índice de Páxinas