Os
representantes dos países que participaron en Manaus na reunión para
debater os proxectos ecolóxicos de preservación da rexión amazónica,
nunca pensaron sentir tan de preto as grandes contradiccións que supón
un desenvolvemento harmónico coa natureza.
A cidade, capital do estado do Amazonas, foi
levantada no medio da selva, na confluencia das escuras augas do río
Negro coas do Amazonas e hoxe en día, con máis dun millón de
habitantes, aínda conserva algo da grandeza e do luxo do que gozou nos
últimos decenios do século pasado, coa explotación da riqueza do
caucho natural. O emblemático edificio da súa Ópera, que tanto
admiraron os conferenciantes, constitúe o mellor exemplo da efémera
gloria daquela época.
Pero en Manaus, e tamén en quince concellos do
interior do estado, as prioridades, como ben puideron comprobar os
ilustres visitantes, son hoxe máis perentorias polo drástico
racionamento de auga e de enerxía eléctrica decretado hai uns días na
cidade (que foi, quen o diría, a segunda do país en contar co
invento). Na maior rede hidrográfica do mundo, esta grave situación
resulta certamente insólita.
As causas hai que buscalas na reducción do
nivel de auga no lago da hidroeléctrica de Balbina construída na
década pasada con moita polémica polo impacto ambiental que causou,
que é a responsable do abastecemento da cidade. Ao parecer, o fenómeno
metereolóxico de "El Niño" explicaría a falta de chuvias nas
cabeceiras dos ríos, sobre todo na do río Negro, que está a padecer
unha das maiores secas da súa historia.
As consecuencias son desastrosas e inesperadas.
Unhas empresas eliminan quendas de traballo e outras prolongan a xornada
ata o domingo, sobre todo as da zona franca do porto, unha área de
libre comercio creada hai trinta anos para intentar superar o illamento
da rexión. Prorrogouse o curso escolar un mes máis, os bancos abren
unha hora máis tarde e nos tribunais de Xustiza maxistrados e avogados
traballan sen toga porque o ar acondicionado, vital nesas latitudes, non
funciona.
A empresa Eletronorte (Centrais Elétricas do
Norte de Brasil S.A.) reaccionou ás protestas dos cidadáns co anuncio
de que vai importar de Estados Unidos dous barcos xeradores de enerxía
eléctrica que chegarán antes de fin de ano. Mentres, nos últimos
días o desabastecemento obrigou a moita xente a carretar botellas e
baldes con auga para limpar as sepulturas do cemiterio e preparalas para
o día de defuntos. A falta de luz pode ser, por desgracia, un inferno:
dous bebés prematuros que estaban na incubadora dunha maternidade
morreron porque a luz acabou e non había xerador para facer funcionar a
máquina. |