Chama moitísimo a atención, pola insistencia e o ton alarmista
utilizado, o inquietante anuncio televisivo de Correos do Brasil no que
se reclama aos donos de cans que vacinen os seus animais. Dase por
descontado que as posibilidades que teñen os carteiros de seren
mordidos no exercicio diario do seu traballo son certamente moitas, pero
non é para menos a advertencia, visto o acontecido estes últimos
días.
Na rexión metropolitana de São Paulo un can
de raza rottweiller matou a dentadas á artesá Sonia Hosti, de
cincuenta anos, irmá da dona do animal. En Río de Xaneiro a víctima
foi desta vez un neno de catro anos, Kevin Martins, atacado por Tigre,
Bob e Marley, tres cans mestizos de pastor alemán e fila
brasileiro. Maila as profundas trabadas sufridas en todo o corpo
(cabeza, nádegas e pernas), os médicos conseguiron salvar a vida do
pequeno.
Despois de ser informado da traxedia, o alcalde
da cidade anunciou que vai enviar un proxecto de lei á Cámara
Municipal para prohibir a cría de cans pitbull terrier e fila
brasileiro por consideralos xeneticamente violentos. As cifras,
alarmantes, parecen darlle a razón: ata o mes de outubro deste ano
foron agredidas 13.252 persoas, entre elas moitos nenos, a maioría por
exemplares destas dúas razas.
Os pitbulls xurdiron no inicio do
século XIX en Inglaterra do cruzamento do bulldog e un tipo de terrier.
Feroces e de poderosos dentes e músculos, resultaron ideais para a
salvaxe diversión das pelexas de cans. En 1991 decretouse no Reino
Unido a sentencia de morte para os dez mil existentes, unha semana
despois do ataque sufrido en Londres por unha nena de seis anos. En 1989
xa fora declarado inimigo público nos Estados Unidos e ter un pitbull
considérase legalmente coma portar unha arma.
A historia do fila brasileiro ten varios
séculos e no seu labirinto xenealóxico aparecen razas como o mastín
inglés, o sabuxo e o antigo bulldog introducidas polos
holandeses na súa colonización do nordeste. Espallouse despois polo
interior, seguindo as marxes do longo río
São Francisco e, mesturado tamén con outros traídos polos
portugueses, converteuse nun bó can pastor e de caza, mesmo de onzas, e
nun eficiente gardián, polo que e adoptado polos grandes facendeiros
que tamén o utilizaban para filar (capturar) escravos fuxitivos.
Hoxe en día considérase patrimonio nacional.
De aí que a proposta do alcalde de Río levantase toda unha polémica
entre os defensores da única raza brasileira recoñecida, vai haber
trinta anos, pola Federación Cinolóxica Internacional (FCI). Alegan
estes que a fama de agresivos é unha lenda e que os problemas causados
non veñen da raza e si de determinados cruzamentos e, sobre todo, da
forma en como son educados polos seus donos nunha sociedade tan
violenta. |