Vaise o mes de decembro coa fulgurante aparición dunha nova estrela no
firmamento televisivo brasileiro: Débora Rodrigues, a presentadora do
programa Fantasia do canal SBT (de luns a venres entre as catro e
media e as seis da tarde). Feito a semellanza do italiano 50 mulleres,
axiña conseguiu atraer a atención do público, a maioría adolescente,
que parece encantado, aparvado mesmo, coa presentadora e acompañantes
(Adriana Colin, Jackeline Petkovic e Valeria Balbi) que falan, cantan e
bailan envoltas sempre en vestidos curtos e moi escotados.
Tanto éxito fixo desbancar outros programas
dos primeiros lugares de audiencia e provocou máis dun colapso nas
liñas telefónicas da gran rexión metropolitana de São Paulo,
conxestionadas polas chamadas dos espectadores que pretendían
participar nos xogos e concursos con premios en metálico (non moito: de
cen a cincocentos dólares) e, de paso, eloxiar a fermosura de Débora
ou pedirlle o seu enderezo.
Débora Rodrigues, en realidade Débora
Cristina de Moura Rodrigues, ten vintenove anos e só saltou á fama
este ano cando decidiu aceptar unha substanciosa oferta económica para
posar núa na revista Playboy. A que era filla de camioneiro e
ela mesma conductora de
ómnibus e camións, enrolárase tres anos atrás cos Trabalhadores
Rurais Sem Terra (MST), o movemento social de máis forza hoxe no
Brasil, para loitar pola devolución e reparto xusto de terras, chegando
a ser unha das súas líderes. Deixou despois as estradas para aparecer
na capa da devandita revista do mes de outubro, e converterse, como
dicía a publicación, "na musa dos sem-terra, na doce brasileira que
descoñece as súas medidas de busto e cintura" .
Pero coa popularidade viñeron tamén os
reproches de moitos integrantes do movemento e o escándalo na prensa,
que dubidou da súa honestidade. Curiosamente, acaba de saír na súa
defensa Sebastião Salgado, un dos fotógrafos máis famosos do mundo, o
poeta brasileiro do máis puro branco e negro e do contraluz, o artista
que nos devolve a mensaxe da realidade e da épica do traballo humano.
(Conservo na memoria as impactantes reportaxes que dedicou aos
garimpeiros de Serra Pelada, aos desmanteladores de barcos de
Bangladesh, aos obreiros do Eurotúnel da Mancha e tamén aos Sem Terra,
que deu a coñecer no resto do mundo).
Preguntado pola mesma revista Playboy
deste mes de decembro que opinión lle merecía que Débora Rodrigues,
integrante do MST, posara núa respondeu que "o MST non é un
movemento relixioso... e que ela é dona do seu corpo, ten o dereito de
facer o que queira. Cando era camioneira, ninguén a criticaba..." |